22
Dawita Xoono Mazmure
(Maz 18:1-50)
1 Goday Saa7ola kushepenne iya morketa ubbaa kushepe ashshida gallas Dawiti Godaas ha mazmuriya yexis.
2 Goday ta zaalla;
taw miixaa;
I tana ashsheysa.
3 Ta Xoossay taani baqatada attiya zaalla;
I ta gondalliya;
I ta atotetha wolqaa.
I taani baqatada attiya bessi;
ne tana makallanchota kushepe ashshaasa.
4 Galati bessiya Godaa taani xeegana;
taani ta morketape attana.
5 Hayqo zuley tana teqis;
dhayo di7oy tana daganthis.
6 Si7oole wodoroy tana qachana hanees;
hayqoy xiheda tana oykis.
7 Tana metoy un7ethin Godaa xeegas;
tana maaddana mela ta Xoossaako waassas.
I ba keethan ta qaala si7is;
ta waassida waasoy iya haythan wodhis.
8 Xoossay hanqetida gisho,
biitti qaaxis; buqetis;
salota xaphoy kokoris; qaaxis
9 Iya siidhiyape cuyay keyis;
iya doonape tama lacoynne
xuuggiya bonqoy keyis.
10 Saluwa phalqidi duge wodhis;
iya tohuwape garsara sakana dhumi de7ees.
11 Kiruubetan uttidi paallis;
carko qefiya bolla uttidi bis.
12 Bana dhuman teqis;
iya dunkaaney irara siketida shaara.
13 Iya sinthan de7iya poo7uwape
tama bonqoy keyees.
14 Goday salope guummis;
Ubbaafe dhoqa Xoossay ba qaala sissis.
15 Ba dongiya dukidi, ba morketa laallis;
wol7antha poo7o kiittidi, enta yedethis.
16 Goday seerida wodenne
hanqetidi peenuqida wode,
abba giddon biittay bentis;
Sa7aa baasoyka qoncis.
17 Goday bollafe kushe yeddidi,
tana oykis;
ciimmo haathaafe tana kessis.
18 I tana ta wolqaama morketape,
ta wolqaafe bolla gidida tana ixeysatape ashshis.
19 Ta metuwa gallas enti ta bolla dendidosona;
shin Goday tana zempiseysa.
20 I tana dalga bessi kessis;
tanan ufaytida gisho tana ashshis.
21 Ta xillotethaada Goday taw qanxis;
ta kushe geeshshatethaada taw zaaris.
22 Ayis giiko taani Godaa ogiya kaallas;
qassi ta Xoossaa aggada iita oothabike.
23 Taani iya higgiya ubbaa naagas;
iya wogaa polanaysa aggabike.
24 Taani iya sinthan suure de7as;
tana nagarape naagas.
25 Goday taw ta xillotethaadanne
ta geeshshatethaada zaaris.
26 Neeni keehatas keeha;
suuretas neeni suure.
27 Geeshshatas neeni geeshshi;
shin geellatas neeni morke.
28 Bantana kawusheyisata ashshaasa;
shin otoranchota kawushaasa.
29 Abeeti Godaw, ta xompey nena;
Goday ta dhumaa poo7isis.
30 Ne maaduwan ta morketa yedhada baana;
ta Xoossan gimbe dirsa gupa aadhana.
31 Xoossaa ogey suure;
Godaa qaalay geeshshi;
iyako baqatiya ubbaas I gondalle.
32 Goday attishin, hara xoossi oonee?
Nu Xoossay attishin, hara zaalli oonee?
33 Xoossay taw mino miixaa;
I ta ogiya polo oothees.
34 I ta tohuwa gen7e tohoda minthees;
tana dhoqa bessan minthidi essees.
35 I ta kushiya olas loohisees;
ta qesey naase birata donge dukees.
36 Tana ashshiya ne gondalliya taw immadasa;
ne katisoy tana gitayees.
37 Ta hemethaa dalgisaasa;
ta gaadiya minthaasa.
38 Ta morketa yedethada mentherethas;
enti dhayonna de7ishin guye simmike.
39 Enti zaaridi dendonna mela shocas;
ta tohuwape garsan kundidosona.
40 Olas taw wolqa dancisadasa;
ta morketa taw gulbatisadasa.
41 Ta morketa ta sinthafe baqatisadasa;
tana ixeyisata dhaysas.
42 Maade koyidi waassidosona;
shin oonika enta ashshibeenna.
Godaa enti xeegidosona;
shin I entaw koybeenna.
43 Taani enta baanada liiqisas;
oge urqada enta yedhas.
44 Makalla ta asaape tana ashshadasa;
kawotethata bolla tana shuumadasa;
ta eronna asay taw haaretis.
45 Allaga derey tana aaddashees;
ta woriya si7idi taw kiitetoosona.
46 Enti wolqa dhayidosona;
banta miixape kokorishe keyidi yoosona.
47 Goday de7on de7ees! Ta zaallay anjeto.
Tana ashshiya zaallay dhoqu dhoqu go.
48 I ta haluwa keyiya Xoossaa;
kawotethata taape garsan haarisees.
49 Ta morketape tana ashshees;
ta morketa bolla tana dhoqu dhoqu oothaasa;
Oda medhiya asape tana ashshaasa.
50 Abeeti Godaw taani kawotethata giddon nena galatana;
ne sunthaa yexana.
51 Xoossay ba kawas gita xoono immees;
ba tiyida Dawitasinne iya kochaas,
merinaa siiquwa bessees.