Phawuloosi Ximotiyoosas
Xaafida Nam7antho Kiita
Gaatha Qofa
Phawuloosi Ximotiyoosas xaafida nam7antho kiitay, Phawuloosara issife oothiyanne Phawuloosa matan maaddiya na7atetha, Ximotiyoosa zorida zoriya oykis. He zoriya ayfe qofay, “Gencan minnanaw bessees” giya zore. Ximotiyoosi zorenne minthetho qaala ekiday, Yesuus Kiristoosaba tuma markatana mela, wongela qaalanne Gal7a Caaqo timirtiya minthidi oykana melanne metoynne ixoy darikoka tamaarsoninne wongela sabbakon minnana melasa.
Ximotiyoosi, hadanne eeyatetha palamape haakana mela iyaw dumma mino zorey imetis. Hessa mela oday ase dhaysesipe attishin aykoka maaddenna.
He ubban Ximotiyoosi akeekanaw bessiyabay, Phawuloosa hanotaanne iya duussa; hessika, iya ammanuwa, iya genca, iya siiquwa, iya danda7aanne iya gakida metuwa leemiso oothidi kaallanaysa. Phawuloosi ha kiita xaafiday, I ba wotha ongidi hayqos giigetida wodena.
Maxaafa Ayfe Qofata
Gelo qofa (1:1-2)
Godan yeellatopa (1:3-18)
Ammanthiya Kiristoosa wotaadare gida (2:1-26)
Wursetha woden asay ay daanane (3:1-9)
Ammanetada de7a (3:10—4:8)
Sarothonne anjo (4:19-22)
1
1 Xoossaa shenen, Yesuus Kiristoosan bentida de7o ufaysaa markatanaw Yesuus Kiristoosa hawaare gidida Phawuloosape, 2 ta dosiya na7aa Ximotiyoosas kiitetida kiita.
Xoossaa Aawapenne nu Godaa Kiristoos Yesuusape aadho keehatethay, maarotethaynne sarotethay new gido.Hawa 16:1.
Ximotiyoosas Imetida Zore
3 Taani, ta woosan qammanne gallas nena qopayis. Taani woossiya wode ta mayzata Xoossaanne taani lo77o kahan haggaaziya Xoossaa ne gisho galatayis. 4 Taani ne afuthaa qopayis; nena be7ada ufaytanaw daro laamotayis.
5 Qassi new de7iya tuma ammanuwa erayis. He ammanoy beni ne wogga aaye Loydininne ne aaye Ewuniqin de7iya ammanuwa mela.Hawa 16:1. 6 Hessa gisho, taani ta kushiya ne bolla wothida wode Xoossay new immida imota neeni zaara eethana mela akeekisayis. 7 Ayis giiko, Xoossay nuus wolqaa, siiqonne nu huuphe haariya Ayyaana immispe attishin, yashsha ayyaana immibeenna.
8 Hiza, nu Godaas markatanaw yeellatopa; qassi iya gisho qashetida tananka yeellatopa. Shin Xoossay new immiya wolqan Wongela gisho, taara meto eka. 9 Xoossay ba sheneninne ba aadho keehatethan nuna ashshidi, ba geeshsha dere oothanaw nuna doorisipe attishin, nuuni oothida oosuwa gisho gidenna. Ha aadho keehatetha Kiristoos Yesuusa baggara merinaa wodetape sinthe nuus immis. 10 Ha77i ha aadho keehatethay nuna ashshiya Kiristoos Yesuusa yuussan qoncis. I hayqo wolqaa dhaysidi, Wongela baggara dhayonna de7o nuus qoncisis.
11 Taani Wongela sabaake, hawaarenne astamaare gidana mela Xoossay tana dooris.1 Ximo 2:7. 12 Taani hessa gisho ha metuwa ekayis; shin ta ammaney ooneko eriya gisho yeellatike. Taw imetida hadara he gallasay gakanaw I naaganaw danda7eysa erayis.
13 Taani nena tamaarsida tuma qaala leemiso ootha oykada Kiristoos Yesuusa baggara nubaa gidida ammanuwaninne siiquwan de7a. 14 Nu giddon de7iya Geeshsha Ayyaana wolqan new imetida lo77o hadara naaga.
15 Iise biittan de7iya ubbay taape haakidaysa eraasa; enta giddon Figeluusinne Hermogeneesi de7oosona.
16 Anesfoori tana daro wode minthethida gisho Goday iya soo asaas qadheto. Taani qasho keethan de7iya wode I tanan yeellatibeenna. 17 Hessa bolla I Roome katamaa yida wode tana minthi koyidi demmis. 18 Wursetha gallasan Goday iyaw qadhetana mela taani Godaa woossayis. Efesoona kataman I tana ay mela maaddidaako ne loytha eraasa.