1 Wursetha gallasan un7ethiya wodey yaanaysa era. 2 Asay bantana doseyisata, miishe siiqeyisata, ceeqeteyisata, otoreyisata, cayeyisata, bantana yelidaysatas kiitetonaysta, galatonaysta, geeshshatethi baynayisata, 3 siiqoy baynayisata, maarotethi eronnayisata, zigireyisata, bantana haaronnayisata, wozana minota, lo77o dosonnayisata, 4 morkees aathidi immeyisata, qofi baynayisata, otoron sugeteyisata, Xoossaafe aathidi asho ufaysanaw doseyisata gidana. 5 Enti ammaniya daanosonape attishin, ammano wolqaa kaddoosona; neeni hessa mela asatape baqata.

6 Entafe issoti issoti asa keethaa gelidi nagaran oyketidaysatanne dumma dumma amon sugetiya daaburancho maccasata bolla godatosoona. 7 He maccasati ubba wode tamaarosonashin, tumaa eranaw danda7okona. 8 Yaanesinne Yambareesi Musera eqetidaysada ha asati guuggey oothonaysatanne ammanon kundida asata gidiya gisho tumaara eqetoosona.Kessa 7:11. 9 Shin Yaanesanne Yambareesa eeyatethay qoncidaysada enta eeyatethayka asa ubbaa sinthan qoncana gisho entaw hanenna.

10 Shin neeni ta timirtiya, ta duussaa, ta qofaa, ta ammanuwa, ta danda7aa, ta siiquwa, ta gencaa, 11 ta goodetethanne ta metuwa eraasa. Anxooke, Iqoniyoonen, Lisxira katamatan tana gakidabaanne taani danda7ida metuwa eraasa; Goday tana he ubbaafe ashshis.Hawa 13:14-52; 14:1-20. 12 Kiristoos Yesuusan Xoossaa ufaysiya de7o daanaw koyiya ubbay goodettana. 13 Iita asatinne baletheysati bantaw baletishenne harata balethishe kasepe iiti iiti baana.

14 Shin ne tamaarida tumaaninne ne ammanida ammanuwan eqa. Ne oodefe tamaaridaako eraasa. 15 Neeni ne na7atethafe doomada Kiristoosa Yesuusa ammanada, atotethi demmiya cincatethi immanaw danda7iya Geeshsha Maxaafata eradasa. 16 Geeshsha Maxaafaa ubbay Xoossaafe imetida qaala. He maxaafay tumaa tamaarsanaw, balidaysata seeranaw, suurisanawunne xillotetha duussas koshshiya zore immanaw maaddees. 17 Xoossaa asi polonne lo77o ooso ubbaa oothanaw giigidaysa gidana mela maaddees.