1 Kaseysadaka, Phawuloosinne Barnabaasi Iqoniyoonen Ayhudeta woosa keethi gelidi daro Ayhudetinne Ayhude gidonnaysati ammanana gakanaw qaala odidosona. 2 Shin ammanibona Ayhudeti, Ayhude gidonnayisata wozanaa laammidi ishata bolla denthethidosona. 3 Hawaareti yan daro wodiya gam7idosona. Enti yayyonna Godaaba odidosona. Goday malaatatanne oorathaba enti oothana mela entaw maata immidi, I ba aadho keehatetha qaalay tuma gideysa qoncisis. 4 Shin he katama asay shaaketidi, baggay Ayhudetara baggay qassi Hawaaretara gidis.

5 Ayhude gidonaysatinne Ayhudeti banta halaqatara issife gididi hawaareta qohanawunne shuchan caddanaw koydosona. 6 Hawaareti hessa eridi, Lisxiranne Darbe geetetiya Liqa7oona katamatanne enta heeran de7iya biitta baqatidosona. 7 Yan Wongela odidosona.

8 Yeletoosape doomidi nam7u tohoy wobbin hemeti eronna issi addey Lisxiran de7ees. 9 He addey Phawuloosi odishin uttidi si7ees. Phawuloosi iya tishshi oothi xeelliya wode paxanaw iyaw ammanoy de7eysa be7idi, 10 ba qaala dhoqu oothidi, “Sitti gada ne tohuwan eqa” yaagis. Yaatin, gupi dendi eqidi hemethi doomis.

11 Phawuloosi oothidaysa asay be7idi banta qaala dhoqu oothidi Liqa7oona doonan, “Xoossati ase daanidi nuuko wodhidosona” yaagidosona. 12 Barnabaasa, “Diya” gidi, Phawuloosi odan waannatiya gisho, iya, “Hermena” gidi sunthidosona. 13 Katamaape gaxan de7iya eeqa Diya keethaa kahineynne asay kormatanne alleeqo ciishshata hawaaretas yarshanaw koyidi katamaa penge ehidosona.

14 Shin Barnabaasinne Phawuloosi hessa si7ida wode enti oothanaw qopidaysa ixidi, banta ma7uwa peedhidosona. Asaa giddo woxi gelidi, 15 banta qaala dhoqu oothidi, “Asaw, haysa ayis oothetii? Nuka hinte mela ase. Ha pathonabape salonne sa7a, abbanne enta giddon de7iya ubbaba medhida de7o Xoossaako hinte simmana mela hintew nuuni Wongela odoos.Kessa 20:11; Maz 146:6. 16 I, beni asay banta oge baana mela yeddi aggis. 17 Shin ira saluwape bukisis, kathaaka wodiyan wodiyan immis, kathi immidi hintena daro ufaysis, yaatidi hintew lo77oba oothidi baw marka dhaysibeenna” yaagidosona. 18 Hawaareti hessa gidi, bantaw asay yarshonna mela waaydi diggidosona.

19 Anxookepenne Iqoniyoonepe yida Ayhudeti, asaa banta bagga zaaridi shuchan Phawuloosa caddidosona. I hayqidaba daanin katamaape gaxa goochi efidi yeggidosona. 20 Shin ammaneysati yidi, iya yuushon eqidashin I dendidi katamaa gelis. Wontetha gallas Barnabaasara issife Darbe bis.

21 Enti Darbe kataman Wongela odidi darota ammanthidaape guye Lisxira, Iqoniyoonenne Phisden de7iya Anxooke simmidosona. 22 Yan ammaneyisata minthethishenne enti ammanon minnidi de7ana mela zorishe, “Xoossaa kawotethaa gelanaw nuuni daro waaye ekanaw bessees” yaagidi tamaarsidosona. 23 Qassi woosa keethatas huuphen huuphen cimata dooridosona. Xoomidaapenne woossidaape guye enti ammanida Godaas enta hadara immidosona.

24 Phisde biitta kanthi aadhidi Phinfile bidosona. 25 Phergen qaala odidaape guye Axaale bidosona. 26 Banta oosuwa polidaape guye, Axaalep Xoossa aadho keehatethas enta hadara immida Anxooke markabera guye simmidosona.

27 Anxooke gakida wode woosa keethaa asaa shiishidi Xoossay entara oothida oosuwa ubbaanne Ayhude gidonna asay ammanana mela entaw waati penge dooyidaako odidosona. 28 Hessan ammaneysatara daro wode gam7idosona.