1 Waasoy dochidaape guye, Phawuloosi ammaniya asata xeegisidi enta zoridaape guye, sarothidi Maqedoone baanaw keyis. 2 He biittara aadhishe qaala odishe asaa daro minthethidaape guye Girike biitta bis. 3 I yan heedzu ageena uttidi, markabera Soore baanaw qopidi de7ishin, Ayhudeti bana wodhanaw koyeysa eridi Maqedoonera guye simmanaw koyis.

4 Phawuloosa moyzidaysati Beeriyape Pharhusa na7aa Sophaxiroosa, Teselonqefe Arsxirokoosanne Sikonduusa, Darbefe Gaayoosa, Iisepe Tikiqoosa, Xirofmoosanne Ximotiyoosa. 5 Hessati sinthe bidi nuna Xiro7aadan naagoosona. 6 Nuuni Uytha Baaliya bonchidaape guye, Filphisiyuusape markabera dendidi, ichashantho gallasan enta Xiro7aadan gakidi yan laapun gallas gam7ida.

7 Saamintafe koyro gallasan nuuni uythaa menthanaw shiiqidi de7ishin, Phawuloosi wontethe baanaw qopida gisho, entaw qaala odishe giddi bilahe gakanaw odaa adussis. 8 Nuuni shiiqidi uttida pooqiyan daro poo7oy de7ees. 9 Ewuxikoosa geetetiya issi na7atethay maskoote bolla uttidi, baana dogidi dhiskis. Phawuloosi oda adussida wode Ewuxikoosi dhisko eeyidi heedzantho pooqiyape kundidi hayqidaysa asay denthis. 10 Shin Phawuloosi wodhidi, iya bolla gufannis. Iya idimmidi, “I hayqibeenna, hirgofite” yaagis. 11 Hessafe guye, pude pooqiya bolla keyidi uythaa menthidi mis. Sa7ay wontana gakanaw asaas odidaape guye dendidi bis. 12 He paxida na7atetha soo efidi daro ufaytidosona.

13 Shin Phawuloosi bana yaape mokana mela nuus odida gisho, kasetidi markabiyako bidi, Asoosa baanaw dendida. Ayis giiko, I tohon baanaw qopida gisho nuna hessatho kiittis. 14 I nuura Asoosan gahetin markabiyan iya ekidi Mixiline bida. 15 Wontetha gallas yaape dendidi markaben Kiyoosa sinthan de7iya bessaa gakida; qassi wontetha gallas Saamosa pinnidi kaalliya gallas Milixe gakida. 16 Phawuloosi Iisen daro gam7onna Efesoona matara aadhanaw qopis. Baw danda7etiko Phanxeqosxe Baaliya gallas Yerusalaame gakanaw eesotees.

17 Phawuloosi Milixepe Efesoona kiittidi woosa keethaa cimata xeegisis. 18 Woosa keetha cimati iyako yin, entako haysada yaagis: “Taani Iise gelida koyro gallasape doomida hintera de7ida wode ubban waana de7idaako hinte ereeta. 19 Ayhudeti duulatidi ta bolla meto gathikoka taani ashketethaninne daro afuthan Godaas oothas. 20 Dabaabanka hinte keethan keethan hintena tamaarsishe hintena maaddiyabape issibaaka pacisabike. 21 Taani Ayhudetasinne Ayhude gidonaysatas nagarape Xoossaako simmana melanne nu Godaa Yesuusa ammanana mela markatas.

22 “Yan tana aybi gakaneeko erike, shin ha77i taani Geeshsha Ayyaanas kiitetada Yerusalaame bayis. 23 Geeshsha Ayyaanay qashoynne waayey tana naageysa katama ubban taw markatis. 24 Shin ta wothaa polanawunne Godaa Yesuus Kiristoosape ekida oosuwa, Xoossaa aadho keehatetha Wongela markateysa polanaw ta shempiw pathonnabada taybas.2 Ximo 4:7.

25 “Taani ha77ika Xoossaa kawotethaa markatashe hinte ubbaa giddon yuuyas. Hizape guye, hintefe oonika tana be7onnaysa erayis. 26 Hessa gisho, hintefe issi uray dhaykoka ta oyshetonnaysa hachi hintew geeshshada odayis. 27 Ayis giiko, Xoossay oothanaw qopidaba ubbaa hintew aybibaaka ashshona odas.

28 “Ba na7aa suuthan wozida Xoossaa woosa keethaa naagite. Geeshsha Ayyaanay hintena halaqaa oothidi doorida wudiyasinne hinte huuphiyas naagetite. 29 Taani bidaape guye, wudiyas qadhetonna wozana mino suudhumeti hinte giddo gelanaysa taani erayis. 30 Ammaneyisata banta geedo kaalethanaw wordo tamaarsiya asati hinte giddofe dendana. 31 Hessa gisho, taani heedzu laythi qammanne gallas afuthan hintena huuphen huuphen minthethidaysa qopishe naagetite.

32 “Ha77ika hintena minthanawunne geeshsha asaara laatisanaw danda7iya Xoossaasinne iya aadho keehatetha qaalas hintena hadara immayis.

33 “Taani oodde bira woyko worqa woyko afila amottabike. 34 Taani ta kushen oothada tananne taara de7eyisata koshshidaba maaddidaysa hinte, hinte huuphen ereeta. 35 Hinte haysada daaburidi oothishe daaburanchota maaddanaysanne Godaa Yesuusi, ‘Ekeysafe immeysi anjetidaysa’ gida qaala hinte qopanaw besseysa taani hintena ubbaban bessaas” yaagis.

36 Phawuloosi hessa odi ongidi enta ubbaara gulbatidi Xoossaa woossis. 37 Enti ubbayka Phawuloosa idimmidi yeekidi yeeridosona. 38 I Zaaridi, “Tana be7eketa” yaagida qaalay enta daro azzanthis. Enti markabiya gakanaw iya moyzidosona.