Amoxe Maxaafa
Gaatha Qofa
Amoxey K.Y.S. 760 laytha heeran, Hosepe guuthara sinthe dendidi, pudeha bagga kawotetha, Isra7eele bolla tinbite odida nabe. I xeegetanaape sinthe mehe heemmiya asi. I dugeha kawotethan yeletikoka, Goday I Beetele katama bidi Isra7eelen tinbite odana mela iya kiittis. Amoxey, Araamey, Filisxeemey, Xiroosi, Edoomey, Amooney, Moo7abeynne Yihudi pirdetanaysa odis. Gidoshin, Amoxey Isra7eelen de7iya dure asay maadoy bayna manqota qohiya gisho, Isra7eeley seeretanaw de7eysa ba adussa kiitan qoncisis.
Isra7eelen, Beetele geeshsha bessan oothiya kahineti Amoxey banta biittan tinbite odonna mela iya mootidosona; digganaw koydosona (7:10-17). Amoxe kiitata giddon qoncidi bentiya kiitay, “Suure pirdi pulto haathada, xillotethi melonna shaafa haathada goggo” gidi Isra7eele asaa naagisiya kiita.
Goday Isra7eele asa allaga kawotethata giddon laallanaysa gujidi odis. Shin xoossay ba deriya zaaridi ehanawunne gashtisanaw ufaysa qaala immidaysa gujidi odees.
Maxaafa Ayfe Qofata
Kawotethata bolla odetida pirda (1:1—3:2)
Isra7eeleynne Samaarey pirdetana (3:3—6:14)
Isra7eele pirda malliya Ichashu qoncethata (7:1—9:10)
Isra7eeles sinthan de7iya ufaysa (9:11-15)
1
1 Ooziyani Yihuda biittan, Iyo7aasa na7ay Iyorbaami Isra7eele biittan kawotida laythan Taqoha biittan mehe heemmeysatape issoy, Amoxey, biitti qaaxanaape nam7u laythafe sinthe Isra7eeleba odida tinbitey haysa:
2 I,
“Goday Xiyoone zuma bolla gudees;
Yerusalaame kataman dechees.
Mehe heemmiya bessati meloosona;
Qarmeloosa zuma bolla de7iya irxay shullees” yaagis.
Isra7eele Shooro Kawotethati Pirdetana
Soore
3 Goday, “Damasqo asay zaari zaari oothida nagaraa gisho, taani enta seeronna aggike. Enti Galada biitta asaa birata achi de7iya gaaren gondorsidi yedhidosona. 4 Hessa gisho, taani kawa Haza7eela keethan tama yeddana; he tamay kawa Ben-Hadaada miixata maana. 5 Taani Damasqo katamaa pengiya menthana; Aweena zangaaran de7iya asaa yedethananne kawota xam7aa oykidaysata Beet-Edenape dhaysana; Soore asay de7etidi, Qiira baana” yaagees.
Filisxeeme
6 Goday, “Gaaza katamaa asay zaari zaari oothida nagaraa gisho, ta enta seeronna aggike. Enti biittan de7iya asa ubbaa di77idi, Edoome biitta asas bayzidosona. 7 Hessa gisho, taani Gaaza katamaa dirsan tama yeddana; he tamay katamaa miixata maana. 8 Ashdoodan de7iya asaa taani yedethananne kawota xam7aa oykidaysata Asqaloonape dhaysana. Eqroona kataman de7iya asaa seerana; Filisxeeme asaape attidaysati hayqana. Taani Ubbaa Haariya Goday hessa odayis” yaagees.
Xiroosa
9 Goday, “Xiroosa katamaa asay zaari zaari oothida nagaraa gisho, taani enta seeronna aggike. Enti caaqida ishatetha caaquwa menthidi, de7etida asa ubbaa Edoome asaas bayzidosona. 10 Hessa gisho, taani Xiroosa katamaa dirsan tama yeddana; he tamay katamaa miixata maana” yaagees.
Edoome
11 Goday, “Edoome asay zaari zaari oothida nagaraa gisho, taani enta seeronna aggike. Enti banta ishaa Isra7eele mashshan yedethidosona; enti entaw qadhetibookona; enta yiloy merinaw irxenna. 12 Hessa gisho, taani Temaana katamaa bolla tama yeddin, he tamay Boosora katamaa miixata maana” yaagees.
Amoone
13 Goday, “Amoone asay zaari zaari oothida nagaraa gisho, taani enta seeronna aggike. Enti banta zawa aassanaw Galada biittan de7iya qanthatida maccasata uluwa daakidosona. 14 Hessa gisho, taani Raaba katamaa dirsan tama yeddana; he tamay katamaa miixata maana. Hessafe guye, olaa gallas waasoy darana; olanchoti goteda wolqaamana. 15 Enta kawoynne iyara oothiya halaqati ubbay de7etidi baana” yaagees.