Phawuloosi Qolaasiyasa Asaas
Xaafida Kiita
Gaatha Qofa
Phawuloosi Qolaasiyasa asaas xaafida kiitay xaafetiday, Guutha Iisen, Efesoonape doloha baggara de7iya Qolaasiyasa kataman de7iya woosa keethasa. He woosa keetha essiday Phawuloosa gidonna ixikoka, Roome biittan Iise waanna katama gidida Efesoonape wongela odiya asaa kiittey iya gidiya gisho, Qolaasiyasaska iyaw aawatethi de7ees. Qolaasiyasa woosa keethan, “Xoosse eranawunne kumetha atotethi demmanaw asi ubbay ayyaana wolqatanne maatata goyinnanaw koshshees” giya wordo astamaareti de7eysa Phawuloosi si7is. He astamaareti tamaarsiya harabay qassi, “Asi ubbay qaxaro daaniya wogatas haaretanawunne katha woga ubba naaganaw koshshees” yaagosona.
Phawuloosi ha kiitaa xaafiday, tuma ammano timirtiya tamaarsidi, enta wordo timirtiya laallanaasa. I zaarida zaarotape issoy, “Yesuus Kiristoosi kumetha atotethi immees; hara haymaanotetinne oosoti iyape haassosona” yaagees. Xoossay Kiristoosa baggara alamiya medhis; qassi iya baggara zaaridi baako ehana. Ha alamiyas atotetha ufaysi de7ey Kiristoosa ammanonna. Hessa gisho, Phawuloosi ha gita timirtey ammaniya asaa de7on waanidi ooson pee7anaw bessiyako odees. Ha kiitaynne Efesoona asaas xaafida kiitay, banta oykida qofaninne kiitan woli daanosona. Ha nam7u maxaafata giddon de7iya dummatethay, Efesoonan Kiristoosi woosa keethas huuphe, Qolaasiyasan Kiristoosi medhetethas huuphe.
Ha kiita Phawuloosape ekidi Qolaasiyasa gathanaw bida Tikiqoosara issife de7ey Anasmoosa gideysa erisoy maaddiyaba. Ayis giiko, Phawuloosi Anasmoosa geetetiya ba oosanchuwaba Filmoonas hara kiita xaafis.
Maxaafa Ayfe Qofata
Gelo qofa (1:1-8)
Galata woosa (1:3-8)
Kiristoosi oone (1:9—2:19)
Kiristoosan de7iya ooratha de7o (2:20—4:6)
Kuusha qofanne sarotho (4:7-18)
1
1 Xoossaa shenen Kiristoosi Yesuusa hawaare gidida Phawuloosinne nu ishaa Ximotiyoosi, 2 Qolaasiyasa kataman de7iya Kiristoosan geeshshatasinne ammanetida asaas xaafida kiitaa.
Xoossaa nu Aawape aadho keehatethaynne sarotethay hintew gido.
Galata Woosa
3 Nuuni hintew woossiya wode Xoossaa nu Godaa, Yesuus Kiristoosa Aawa ubba wode galatoos. 4 Nuuni Kiristoos Yesuusan de7iya hinte ammanuwanne geeshshata ubbaas de7iya hinte siiquwa si7ida. 5 Hessa hinte oothiday hinte ufaysay salon hintew naagetida gishosa. Hinte tuma kiitta gidida Wongela koyro ammanida wode he ufaysaa si7ideta. 6 Hinte he Wongela si7ida wodenne Xoossaa aadho keehatetha tumaa shaaki erida wodepe doomidi hinte giddon hanidaysada biitta ubban diccishenne ayfishe de7ees.
7 Hinte hessa nuura issife Kiristoosas oothiya ammanetida, dosetida Ephafirape tamaarideta.Qola 4:12; Filmo 23. 8 I hessa bolla gujidi Ayyaanay hintew immida siiquwaba nuus odis.
9 Hessa gisho, nuuni hintebaa si7ida gallasaape doomidi, Xoossay ba sheniya hintena bessaana melanne, Geeshsha Ayyaanay immiya eratethaninne cincatetha ubban hintena kunthana mela ubba wode hintew Xoossaa woossoos. 10 Hessadaka, hinte, Goday koyeysada daana mela, ubba wode iya ufaysana mela, lo77o ooso ubban hinte ayfe ayfana melanne Xoossaa aathidi erishe diccana mela Xoossaa woossoos.
11 Xoossaa boncho wolqay hinte ubbaba gencanaadanne danda7anaada ba minotethaa immidi hintena ufayso. 12 Qassi geeshshata poo7o kawotethaa laattana mela hintena oothida Aawa galatite. 13 I nuna dhuma wolqaafe ashshidi ba dosiya na7aa kawotethaako ehis. 14 Iyan wozetidi iya suuthan nagara atotethi demmida.Efe 1:7.
15 Kiristoosi bentonna Xoossaas tuma leemiso. I medhetetha ubbaafe bayra. 16 Ubbabay iya baggara medhetis. Bentiyabatinne bentonnabati, wolqatinne godati, haareysatinne maata aawati, saloninne sa7an de7iya ubbay iyawunne iya baggara medhetis. 17 I ubbabaape kase de7ees. Ubbabay iyan ba bessan bessan oyketidi de7ees. 18 I ba asatethi gidida woosa keethas huuphe. I ubbaafe bolla gidanaw hayqope dendon sinthenne bayra.Efe 1:22-23.
19 Xoossay ba kumetha Xoossatethaara iyan daanaw koyis. 20 Qassi masqaliya bolla gussida ba na7aa suuthan sarotethi medhidi saloninne sa7an de7iya ubbaa iya baggara baara sigethis.Efe 2:16.
21 Haysafe kase hinte qofaa iitatethay hintena Xoossaafe shaakisinne iyara morke oothis; hinte oosoyka iita. 22 Shin ha77i Kiristoosi ashon hayqida hayquwa baggara Xoossay hintena baara sigethidi, geeshshata, borey baynaysatanne xillota oothis. 23 Hinte, hinte ammanuwan qaaxonna minnidinne xaphidi daanaw bessees. Hinte Wongela qaala si7ida wode ekida ufaysaa minthi oykite. He Wongelay hinte si7idaysanne biitta ubban sabbaketidaysa. Ta, Phawuloosika ha Wongelas oosancho gidas.
Phawuloosa Hawaaretetha Ooso
24 Taani hinte gisho ha77i ekiya waayan ufaytayis. Kiristoosi iya asatethi gidida woosa keethaas ekida waayiya taani ta ashuwan polayis. 25 Xoossaa qaala hintew polada odana mela taw imetida maatan woosa keethaas oosancho gidas. 26 Ha qaalay kase aadhida wodiyan yeletethaa ubbaafe geemmidi de7is. Shin ha77i Xoossay ha xuuraa ammaniya ubbaas qoncisis. 27 Xoossay Ayhude gidonna asaa giddon ha xuuraa boncho duretetha qoncisis. Ika boncho ufaysi gidida hinte giddon de7iya Kiristoosa.
28 Hessa gisho, issi issi asi Kiristoosan kumetha asi oothidi shiishanaw cincatetha ubban asaa tamaarsoninne zoren Kiristoosaba sabbakoos. 29 Xoossay ba gita wolqan tanan oothiya gisho, ha77i gakanaw iya wolqan baaxetaysinne daaburayis.