1 Hiza, hinte Kiristoosara hayqope dendidaysada, Xoossaafe ushacha baggan uttida Kiristoosi de7iya bessan, salon de7iyabata koyite.Maz 110:1. 2 Salon de7eyisata bolla hinte qofaa wothitepe attishin, sa7an de7iyabata bolla wothofite. 3 Hinte hayqon shaaketida mela ha alamiyape shaaketideta. Hinte de7oy Kiristoosara issife Xoossan geemmis. 4 Hintew de7o gidida Kiristoosi qonciya wode he wode hinteka iyara bonchon qoncana.

5 Hessa gisho, hintenan de7iya alame amotta wodhite. Hessatika laymatethi, tunatethi, laymatanaw amotethi, eeqa goyinno mela gidida uuzetethi. 6 Hayisata gaason Xoossaa hanqoy kiitetonna asaa bolla yaana. 7 Hinteka kase he iita ogiyan biya asaa giddon de7ishe haysata oothideta.

8 Ha77i hinte hessata oothopite. Qassi hanqo, ixo, kachi, zigirsinne borso oda hintefe diggit. 9 Ceega asatethaa iya oosuwara hintefe qaarida gisho, issoy issuwas wordotopite.Efe 4:22. 10 Xoossaa medho daaniya, eratethan laametida ooratha asatethaa ma7ite.Medhe 1:26; Efe 4:24. 11 Ha ooratha medhetethan, Girike asi woyko Ayhude asi, qaxaretiday woyko qaxaretonnay, Barbare asi*Barbare asi: Guussay tamaariboonna woyko eronna woyko yeletida mela si77i gidi de7iya asi guussu. woyko Iskute asi†Iskute asi: Guusay wozana mino asi woyko wozana iita asi guussu. aylley woyko womaannoy baawa. Kiristoosi ubbaa; I ubban de7ees.

12 Hessa gisho, Xoossan dooretida asada geeshshatanne dosetidaysata gididi, maarotethaa, keehatetha, ashketethanne danda7a ma7ite.Efe 4:2. 13 Issoy issuwa danda7ite. Oonika ba laggiyan qohetidabay de7iko iyaw atto go. Goday hintew atto gidaysada hinteka wolis atto giite.Efe 4:32. 14 He ubbaa bolla ubbaba issife shiishidi qachiya siiqo ma7ite. 15 Xoossay hintena issi asi oothidi xeegiday, sarotethaas gidiya gisho Kiristoosa sarotethay hinte wozanaa haaro.

16 Kiristoosa qaalay hinte wozanan kumidi de7o. Cincatetha ubban issoy issuwa tamaarsitenne zorite. Mazmuren, sabaninne ayyaana yethan Xoossaa wozanape galatishe yexite.Efe 5:19-20. 17 Xoossaa Aawa Yesuusa baggara galatishe hinte odetiyaba woyko oothiyaba ubbaa Godaa Yesuusa sunthan oothite.

18 Macheto, ammaniya asaas bessiyaba gidiya gisho, hinte azinatas haaretite.Efe 5:22; 1 Phex 3:1.

19 Azinatoo, hinte macheta siiqite; entaw iitopite.Efe 5:25; 1 Phex 3:7.

20 Nayto, hintena yelidaysatas ubbaban kiitetite; hessi Godaa ufaysiyabaa.Efe 6:1.

21 Aawato, hinte nayti ufaysi qanxonna mela enta camethofite.Efe 6:4.

22 Aylleto, sa7an hintew godaa gididaysatas ubbaban kiitetite. Godaa bonchishe suure wozanape kiitetidi enta ufaysitepe attishin, asi be7o gidi oothopite.Efe 6:5-8. 23 Hinte oothiya ooso ubbaa asas gidonashin, Godaas oothiya mela wozanape oothite. 24 Godaape laata woyto oothidi hinte ekeysa erite; hinte Godaa Kiristoosa haggaazeeta. 25 Xoossay asa som7o be7idi pirdonna gisho, oonika iita ooso oothiko ba iita oosuwa gisho zaaro ekana.Efe 6:5-8.