1 Nabukadanaxoori kawotida nam7antho laythan amuho amuhis. He amuhoy iya daganthin, dhiskoy iya ekonna ixis. 2 Hessa gisho, I amuhida amuhuwa iyaw odana mela maroti, bitanchoti, murunneysatinne xoolinto taybeysati yaana mela kawoy kiittis. Enti yidi iya sinthan eqidosona. 3 Kawoy entako, “Tana daganthiya amuho amuhas; he amuhoy aybeko eranaw koyayis” yaagis.

4 Xoolinto taybeysati Soore doonan, “Kawaw, merinaw kawota! Ne amuhuwa nuus ne aylletas oda; nu new iya birshethaa odana” yaagidosona.

5 Kawoy entako, “Hinte ha amuhuwanne iya birshethaa tana erisonna ixiko, ta hintena qanxana; hinte keethay buure yeggiya bessi gidanaysa ta hintew minthada odayis. 6 Shin hinte amuhuwanne iya birshethaa taw odiko, imota, woytonne daro boncho taape demmana. Hessa gisho, ane amuhuwanne iya birshethaa tana erisite” yaagis.

7 Enti zaaridi, “Kawoy amuhuwa nuus ba aylletas odo; nu iya birshethaa erisana” yaagidosona.

8 Kawoy zaaridi, “Ta mino qofa hinte eriya gisho wode adussanaw hinte koyeysa ta erayis. 9 Hinte amuhuwa taw odonna ixiko, issi pirdi hintena naagees. Hanotay laametana gidi hinte ufaysi oothiya gisho taw wordonne gene qaala odanaw maqetideta. Hessa gisho, amuhuwa taw odite. Yaatiko, hinte iya birshethaa erisanaw danda7eysa ta erana” yaagis.

10 Xoolinto taybeysati zaaridi, “Kawoy oychiya oysha zaaranaw danda7iya issi asika biittan baawa. Ay gitanne wolqaama kawoy marota, bitanchotanne xoolinto taybeyisata hessa melaba oychidi erenna. 11 Kawoy oychida oyshoy deexo; asa giddon doonna xoossatape attishin, hessa kawas qoncisanaw danda7ey baawa” yaagidosona.

12 Kawoy daro yilotidi, Babiloonen de7iya cincata ubbaa wodhanaada kiittis. 13 Cincata wodhanaw awaajoy keyis; Daanelanne iya laggeta wodhanaw asi kiitetis.

14 Kawa naageysata halaqay Ariyooki, Babiloonen de7iya cincata wodhanaw keyiya wode Daaneli iya cincatethaninne hiillan odisis. 15 I kawa naageysata halaqaa Ariyooka, “Kawoy haysa mela iita awaajo ayis kessidee?” gidi oychis. Ariyooki hanota Daanelas odis. 16 Daaneli kawako gelidi, amuhuwa birshethaa erisanaw baw wodey imetana mela woossis.

17 Hessafe guye Daaneli ba soo simmidi, ba heedzu laggetas, Anaaniyas, Misa7eelasinne Azaariyasi hanota odis. 18 Enti Babiloonen de7iya hanko cincatara issife hayqonnaada, salo Xoossay maarota oothidi, ha xuura entaw qoncisanaada woossana mela entaw odis.

19 He qamma xuuray Daanelas qoncis. Daaneli salo Xoossaa haysada yaagidi galatis;

24 Hessafe guye, Daaneli Babiloonen de7iya cincata wodhisanaw kawuwape kiita ekida, Ariyookako bidi, “Cincata wodhopa; tana kawako gelsa; taani iya amuhuwa birshethaa iya erisana” yaagis.

25 Ariyooki ellesidi Daanela kawako gelsidi, kawako, “Yihudape di7etidi yida asaape kawa amuhuwa birshethaa erisanaw danda7iya ase demmas” yaagis.

26 Kawoy Bilxasoora geetetiya Daanela, “Ta amuhida amuhuwanne iya birshethaa tana erisanaw danda7ay?” gidi oychis.

27 Daaneli haysada yaagidi zaaris: “Kawaw, ne oychida xuuraa qoncisanaw danda7iya cinca asi, maroy, bitanchoynne, murunniya asi baawa. 28 Shin xuura qoncisiya issi Xoossi salon de7ees. Wursetha wodetan hananaba I, nena bessis. Ne arsan zin7ada, ne be7ida amuhoynne qoncethay haysa.

29 “Kawaw, ne arsan zin7ada, sinthafe yaanaba qopadasa. He wode xuura qoncisiya Xoossay sinthafe hananaba nena bessis. 30 Ha xuuray taw qonciday, ta hara asape cinca gidida gisho gidenna. Shin neeni kawoy, amuhuwa birshethaa eranaadanne ne huuphen simeretiya qofa akeekana melasa.

31 “Kawaw, ne daro gita, phooliyanne xeellanaw yashshiya misiley ne sinthan eqidaysa be7adasa. 32 He misiliya huuphey, walahi bayna worqafe, iya tiraynne kusheti birape, uloynne wodireti naase biratape, 33 suyley biratapenne toho yacha baggay biratape baggay biittafe medhetis. 34 Neeni misiliya xeelliya wode, issi shuchi asa kushey bochonna dhoqolletidi, biratapenne biittafe medhetida misiliya toho yacha bolla wodhidi gaaccis. 35 He wode birati, urqi, naase biratay, birinne worqey ubbay gaacetidi, bonen wudumman de7iya suulaa mela gidin, aykoyka attonnashin carkoy pitidi efis. Shin misiliya bolla wodhida shuchay zuma gididi sa7aa kumis.

36 “Amuhoy haysa; ha77i birshethaa nuuni new odana. 37 Kawaw, neeni kawota kawo. Salo Xoossay new kawotethinne wolqa, minotethinne boncho immis. 38 Neeni biitta ubbaa haaranaada oothis; ase, do7anne salo kafo ne kushen wothis. Hessa gisho, worqa huuphey nena.

39 “Neepe guye, minotethan nena gakonna hara kawotethi dendana. Kaallidi, biitta ubbaa haariya, naase birata gidiya, heedzantho kawotethi dendana. 40 Wursethan ubbaa gaaccidi liiqisiya biratada minnida oyddantho kawotethi dendana. Birati ubbaa gaaccidi liiqiseysada I, baape kase dendida kawotethata gaaccidi liiqisana.

41 “Tohotinne toho biradheti baggay biratape, baggay biittafe medhetidaysa ne be7idaysada, he kawotethay shaaketida kawotethi gidana. Birati biittara walaketin, neeni be7idaysada baggay biratada mino gidana. 42 Toho biradheti baggay birata, baggay biitta gididaysada, ha kawotethaas baggay mino, baggay shugo gidana. 43 Birati biittara walaketin neeni be7idaysada he nam7u bagga asay geloninne ekon walaketana. Shin birati biittara walaketanaw danda7onaysada enti issino gididi gam7anaw danda7okona.

44 “He kawota laythan, salo Xoossay kundonna, hara asas aadhidi imetonna kawotethaa essana. He eqida kawotethay, he kawotethata ubbaa gaaccidi dhaysana; shin I merinaw eqidi daana. 45 Asa kushey bochonna zumaape dhoqolletidi, wodhidi, biratape, naase biratape, biittafe, birapenne biittafe medhetida misiliya gaaccida shuchaa birshethay he kawotethaa.

“Gita Xoossay sinthafe hananaba kawa bessis. Amuhoy tuma; birshethayka ammanetidaysa” yaagidi zaaris.

46 Hessafe guye, kawoy Nabukadanaxoori Daanela bonchidi, gufannis; asay iya sinthan yarsho yarshana melanne ixaane cuyisana mela kiittis. 47 Kawoy Daanela, “Tuma ne Xoossay xoossata Xoosse, kawota Godanne xuura qoncisiya Xoosse. Neeni ha xuuraa qoncisanaw danda7iday hessa gishosa” yaagis.

48 Hessafe guye, kawoy Daanela aathidi bonchis; daronne al7o imotata iyaw immis. Babiloone biitta haariya ase oothis; Babiloonen de7iya cincata ubbaa bolla halaqa oothidi shuumis. 49 Daaneli oyshan, kawoy Sidiraaqa, Misaaqanne Abdanaago Babiloone biitta ayseysata oothidi shuumis; shin Daaneli kawo keethan gam7is.