1 Farse kawoy Qiroosi kawotida heedzantho laythan, Bilxasoora geetetiya Daaneli hara qoncethi be7is. He qoncethay tuma; qoncidabay wolqaama olaba. He qoncethaa erana mela akeeki iyaw imetis.

2 He wode taani, Daaneli, heedzu saaminta yeekas. 3 Heedzu saamintay wurana gakanaw kathi mabike; ashoy woyko woyne ushshi ta doonako shiiqibenna; ta huuphiya tiyettabike 4 Koyro ageenan laatamanne oyddantho gallasan, gita Xegroosa shaafa matan eqas. 5 Taani xeelliya wode liino ma7o ma7ida issi addiya be7as. I ba xeessan Afeeza worqafe oosetida danco dancis. 6 Iya asatethay phooliya al7o shuchu daanees; iya som7oy wol7antha mela wol7amees; iya ayfey tama laco daanees; iya kusheynne iya tohoy qushetida naase biratada poo7ees; iya qaalay daro asa girsada kooshimmees.

7 Ha qoncetha taani, Daaneli tarka be7as. Taara de7iya asay be7ibookona; enti daro dagammida gisho baqatidi qosetidosona. 8 Taani ha gita qoncethaa be7ashe, tarka attas. Taw wolqi ixin daaburas; ta som7oy bullatis. 9 Taani iya kooshincha si7ida wode sa7an ta som7uwara gufannada, tana bala aggas.

10 Hessafe guye, issi kushey tana bochis; taani kokorashin, ta kushiyaninne ta gulbatan tana denthidi essis. 11 I taako, “Daro dosetida Daanela, taani new odiya qaala loythada akeeka; denda eqa. Taani kiitetada neeko yas” yaagis. I taako haysada gin, taani kokorashe denda eqas.

12 Qassika, “Daanela, yayyofa! Neeni akeeka demmanaw qopada, ne Xoossaa sinthan nenatethaa kawushida koyro gallasape doomidi, ne woosay si7etis; ta new zaaro ekada yas. 13 Shin Farse kawotethaa halaqa gidida ayyaanay laatamanne issi gallas tana teqis. Taani, tarka Farse kawotethaa halaqaara yan attida gisho, kiitanchota halaqatape issoy, Mika7eeli, tana maaddanaw yis.Qon 1:13-15. 14 Ha qoncethay sinthafe hananaba bessiya gisho, taani neeko yiday, wursetha gallasan ne asaa bolla hananaw de7iyaba new qoncisanaasa” yaagis.

15 I hessa taw odiya wode, taani sa7an gufannada, gaanaba dhayas. 16 Hessafe guye, ase daaniya issoy ta mettersha bochis; ta doonay dooyetin, odetethi doomas. Ta sinthan eqidaysako, “Ta godaw, ha qoncethay tana daro daganthida gisho daro daaburas. 17 Taani ne aylley, neera, ta godaara waanada odetanaw danda7ayna? Ta wolqay wuris; shempanawuka taw ixetis” yaagas.

18 He ase daaniya issoy nam7antho tana bochidi, taw wolqa immis. 19 I taako, “Daro dosetida addiyaw yayyofa! Saroy new gido. Minna; xaala” yaagis.

I hessa gidi tana minthin, taani minnada, “Ta Godaw, neeni tana minthida gisho taw oda” yaagas.

20 I zaaridi, “Taani neeko ayis yidaako ne eray? Ha77i ta simmada Farse halaqa gidida ayyaanara oletanaw baana; taani biiko Girike halaqa gidida ayyaanay yaana. 21 Shin Tuma Maxaafan xaafetidaba taani new odana. Taani entara oletiya wode, hinte halaqaa Mika7eelape attishin, tana maaddiya hari baawa.”