1 Mardikiyoosi ha hanidaba ubbaa si7ida wode, azzanidi ba ma7uwa peedhidi, kayo ma7o ma7idi, ba huuphen bido qolis. Ba qaala dhoqu oothidi, yibbata yeeho yeekishe, katamaa giddon yuuyis. 2 Kayo ma7o ma7idi kawo keethi gelanaw oonika danda7onna gisho, I kawo keethi geliya pengiya gakanaw bis. 3 Kawa awaajoy si7etida biitta ubban Ayhudeta giddon gita kayoy, xoomi, yeehoynne zelelsi doometis. Entafe daroti qassi kayo ma7o ma7idi, kayotanaw bido bolla uttidosona.

4 Astiri dangirixetinne iyo naagiya shuufati yidi, Mardikiyoosaba iw odida wode iya daro azzanasu. Mardikiyoosi kayo ma7uwa qaaridi, hara ma7o ma7ana mela iyaw ma7o yeddasu; shin I ekonna ixis. 5 Hessafe guye Astira, kawoy iw kiitetana mela wothida Hataka geetetiya shuufa xeegada, Mardikiyoosa metoy aybeko qassi I ayis kayotiyako erana mela iyako kiittasu. 6 Hataki kawo keethi geliya pengiya matan katamaa dabaaban de7iya Mardikiyoosako bis. 7 Mardikiyoosi, ba bolla gakidaba ubbaa qoncisidi, iyaw odis. Qassi Ayhudeta kumethi wursanaw Haami kawo buqura minjiya keethaas immanaw qopida miishiya likiyara ubbaa ashshona geeshshidi odis. 8 Hessa xalaala gidonashin, Ayhudeta wursanaw Suusa kataman keyida awaajoy xaafetida worqatiya Astiris immana melanne haniyaba ubbaa iw odana mela odis. Qassi Astira kawako gelada, ba asay wuronnaada gaannatana mela Hatakas odis.

9 Hataki yidi, Mardikiyoosi gidaba ubbaa Astiris odis. 10 Astira, Hataka zaarada, Mardikiyoosako haysada yaagada kiittasu. 11 “Macca gidin, adde gidin, oonika xeegetonna de7ishe, kawuwara gahetanaw kawo gadhos giddo dabaaba geliko, hayqo. Shin I xeegetonna kawako geliya wode kawoy ba worqa xam7aa xeeraa iyako zaaridi bessiko, he uraa xalaali paxa attees. Ha higgiya kawa zoreysatape bidi, coo asaa gakanaw de7iya asi ubbay erees. Shin taani hastamu gallas gidoosape kawako gelanaw xeegeta erike” yaagasu.

12 Mardikiyoosi Astira kiitida kiitaa si7idaape guye, 13 haysada yaagidi iiko kiittis; “Taani kawo gadhon de7iya gisho, hara Ayhudetape attishin, tana bochiyabay baawa gada qopofa! 14 Neeni haysa mela woden si77i giiko, Ayhudetas maadoy harasoope yaana. Enti tuma attana; shin neeninne ne aawa keethaa asay hayqana. Neeni kawo macho gidada yiday haysa mela wodeseko ooni erii?” yaagis.

15 Astira Mardikiyoosako haysada yaagada zaarada kiittasu; 16 “Bada Suusa kataman de7iya Ayhudeta ubbaa shiisha; xoomidi taw woossite. Heedzu gallasinne heedzu qammi wurana gakanaw, kathi moopite; haathe uyopite. Taani tana haggaaziya maccatara hessada xoomana. Hessafe guye, higgiyan digetidaba gidikoka, kawoy de7iya bessaa taani gelana. Taani hayqikoka hayqana” yaagasu.

17 Mardikiyoosi bidi, Astira iya kiittidaysada ubbaa oothis.