1 “Dunkaaniya gaatha baggaas al7o liinope oosetida, tammu geshe giigisa. Enta kaalose, ocha teera daaneysaninne zo7o qacinan daddada kiruubeta misiliyara alleeqisa. 2 Gesheti ubbay issi like gido; adussatethay laatamanne oydda, gompay qassi oyddu wadha gido. 3 Ichashu gesheta issife gathada sika; hanko attida ichashata hessada ootha. 4 Issife gahetidi siketida nam7u geshetas issuwa issuwa gaxan kaalose afilape oosetida sagaayota ootha. 5 Issife siketida koyro magarajuwa bolla koyro maaran kaalose afilape oosetida ishatamu sagaayota ootha; hessadaka nam7antho magarajuwa bolla wursetha gaxan ishatamu sagaayota ootha. 6 Geeshsha Dunkaaney issino gidana mela nam7un shaaketi siketida gesheta woli gathidi oysethanaw, ishatamu worqafe oosetida oykiyabata ootha.

7 “Geeshsha Dunkaaniya bollara kammana mela tammanne issi gesheta deesha ikisepe ootha. 8 Tammanne issi gesheti issi gina gido; issi issi magarajuwa adussatethay hastamu wadha, gompay oyddu wadha gido. 9 Ichashu gesheta issi baggara, usupun gesheta hanko baggara gathada sika. Usupuntho magarajoy dakoyetidi, dunkaaniyas sintha baggara daabuleto. 10 Woli gathi sikida geshetape issi magarajuwas macara bolla ishatamu sagaayota ootha; qassi hanko magarajuwas macara bolla ishatamu sagaayota ootha. 11 Nam7un shaaketi siketida gesheti issi kama gidana mela ishatamu naase biratape oosetida oykiyabata ootha. 12 He dunkaaniya geshetape palahida baggaa ekada Geeshsha Dunkaaniyas guye baggara kaqa. 13 Dunkaaniya geshetape adusatetha baggara palahida gompay issi issi wadha gidida gesheta Geeshsha Dunkaaniyas nam7u baggara kaqa.

14 “Dunkaaniyas bolla baggara daabulidi kammanaw zo7o qalamen tiyetida maraze itenne lo77o do7a ite ootha. 15 Geeshsha Dunkaaniya tuuqeta soqala mithafe ootha. 16 Issi issi tuuqiya adussatethay tammu wadha, gompay issi wadhanne bagga gido. 17 Nam7u tuuqeti issife oyketana mela issi issi tuuqiyas oysethiyabay de7o. Geeshsha Dunkaaniya tuuqeta ubbaa hessada ootha. 18 Geeshsha Dunkaaniya wuloha baggara laatamu tuuqeta ootha. 19 Entana essanaw enta garsan bira biratape oosetida oytamu luhoy de7iya tohota ootha. Issi issi tuuqiyas nam7u nam7u toho kessa. 20 Geeshsha Dunkaaniya pudeha baggara laatamu tuuqeta ootha. 21 Entana essanaw enta garsan bira biratape oosetida oytamu luhoy de7iya tohota ootha. Issi issi tuuqiyas nam7u nam7u toho kessa. 22 Geeshsha Dunkaaniyas guyera wuloha baggara usupun tuuqeta ootha. 23 Guye baggara de7iya maazanetas nam7u tuuqeta ootha. 24 He maazaniyan de7iya tuuqeti tohope huuphe gakanaw oyketo. Nam7u maazaneta medhiya nam7u tuuqeta hessatho oosetanaw bessees. 25 Hessadaka nam7u nam7u tohoy de7iya hospun tuuqeta oothada, entaw bira biratape oosetida tammanne usupun luhoy de7iya tohota ootha.

26 “Tuuqeta sathidi oythiya soqala mithafe oosetida tammanne ichashu liyoota kessa. Entafe ichashata Geeshsha Dunkaaniyas issi bagga miyen de7iya tuuqetas, 27 qassi ichashata hanko bagga miyen de7iya tuuqetas, hessadaka attida ichashata wuloha baggan de7iya tuuqetas ootha. 28 Ha gaxa tuuqiyapenne ya gaxa tuuqiyape yaa liyooti giddo tuuqiyara oyketo. 29 Tuuqeta worqan lanxa; liyoota oykanaw maaddiya sagaayota worqafe ootha; qassi liyoota worqan lanxa. 30 Geeshsha Dunkaaniya zumaa bolla ta nena bessidaysada ootha.

31 “Al7o liinope issi magarajo oothada, iya kaalose, ocha teera daaneysaninne zo7o qacinan daddada kiruubeta misilen alleeqisa. 32 Iya soqala mithafe oothada, worqan meeshetida kocataninne bira biratape oosetida oyddu tohoy de7iya tuussata bolla kaqa. 33 He magarajuwa Geeshsha Dunkaaniyas kaaran de7iya qaphetape garsan kaqa. Yaatada higgey xaafetida nam7u loche shuchata oykida Caaqo Taabotiya magarajuwas guye baggan wotha. He geshey, Geeshsha Bessaanne Ubbaafe Geeshsha Bessaafe shaakees. 34 Nagara atotetha kaman Caaqo Taabotiya kamma. 35 Xarpheezaa, Ubbaafe Geeshsha Bessaafe karera, Geeshsha Dunkaaniyape pudeha baggan wotha; xompe wothiya kocaa dugeha baggara wotha.

36 “Dunkaaniya penge magarajuwa, al7o liinope giigisada, kaalose, ocha teera daaneysaninne zo7o qacinan daddada alleeqisa. 37 Magarajuwas ichashu tuussata soqala mithafe oothada worqan lanxa; kocatika worqafe oosetidaysata gido. Tuussatas naase biratape ichashu tohota giigisa.”