1 “Aaroninne iya nayti kahinetethan taw haggaazana mela neeni enta dummayanaw haysada ootha; borey bayna wofaanonne nam7u maraze eka. 2 Geeshsha giste dhiille ekada, irsho yeggonna shamaho zaytera gindada uythu uuka. Qassi zaytey gelonna hara uythu uuka; hessadaka, lee7o uythu uukada zayten tiya. 3 Wofaanuwanne nam7u marazeta yarshiya wode he uytha ubbaa gaytan wothada taw shiisha.

4 “Yaatada Aaronanne iya nayta Geeshsha Dunkaaniya penge ehada haathan enti meecetana mela oda. 5 Hessafe guye, kahinetetha ma7ota, shamziya, efuudiya, efuudiya bollara ma7iya adussa ma7uwanne tiran ma7etiya ma7uwa Aarona mayza; dancuwaka dancisa. 6 Qacciya qaccisa; iya bolla, ‘Godaas dummatis’ geetetidi xaafetida worqa alleequwa wotha. 7 Tishsha zaytiya ekada iya huuphiyan tigada tiya. 8 Iya nayta ehada shamziya mayza. 9 Enta xeessaa dancisa; enta huuphiyanka qoobe wotha. Aaronanne iya nayta yaatada kahinetethan shuuma. Hessika, entaw merina woga gido.

10 “Wofaanuwa Geeshsha Dunkaaniya sinthe ehada, Aaroninne iya nayti iya huuphiyan banta kushiya wothana mela ootha. 11 Wofaanuwa Geeshsha Dunkaaniya pengiyan Godaa sinthan shuka. 12 Wofaanuwa suuthaafe guuthu ekada ne biradhiyan, yarsho bessa bolla de7iya kaceta tiya. Attidaysa yarsho bessaafe garsan gussa. 13 Hessafe guye, ulo ashuwa kammida modhuwa ubbaa, tiriyaas lo77o baggaa, nam7u kilahotanne enta kammida modhuwa ekada, yarsho bessaa bolla wothada xuugga. 14 Shin wofaanuwa ulo ashuwa, iya galbaanne maraaciya gutaape gaxa kessada xuugga. Hessi kahineta nagaraa quchiya yarsho.

15 “Nam7u marazetape issuwa ekada, Aaroninne iya nayti banta kushiya iya huuphen wothana mela ootha. 16 He maraziya shukada, suuthaa yarsho bessan oyddu maazanetan wurxa. 17 Iya ashuwa qanxerethada, ulo ashuwanne gedaa meeccada, huuphiya hara qommo ashotara issife yarsho bessan wotha. 18 Hessafe guye, kumetha ashuwa yarsho bessan xuugga. Hessika Godaas xuussa yarsho. He yarshuwa sawoy Godaa ufaysees.

19 “Qassi kahinetetha wogas eketida hanko maraziya ekada Aaroninne iya nayti banta kushiya iya huuphen wothana mela oda. 20 Iya shukada, suuthaafe guuthu ekada, Aaronasinne iya naytas ushacha haythatas gaxaa, enta ushacha kushiyasinne tohuwas wogga biradheta tiya. Attida suuthaa yarsho bessa oyddu maazanetan wurxa. 21 Yarsho bessan de7iya suuthaafenne tiyiya zaytiyape guuthu ekada, Aarona bollanne iya ma7uwa bolla, qassika iya nayta bollanne enta ma7uwa bolla wurxa. Hessan Aaroninne iya nayti banta ma7uwara taw dummatidaysata gidana.

22 “He marazey kahineta shuuma wogaas eketiya gisho, goyna modhuwa, ulo ashuwa kammida modhuwa, tiriya kammida moodhiya, nam7u kilahota, enta kammida moodhiyanne ushacha guye gedaa qanxada shaaka. 23 Godaa sinthan wothida uythatape, zaytey geliboonna uythaa, zaytera uukida uythaanne lee7o uythaafe issuwa eka. 24 Neeni ha katha ubbaa Aarona kushiyaninne iya nayta kushiyan wotha. Enti iya yuusho yarsho oothidi Godaas immiya yarsho oothidi Godaa sinthan shiisho. 25 Hessafe guye, enta kushepe ekada yarsho bessa bolla wotha; xuussa yarshuwara gathada, Godaa sawana mela yarsho bessa bolla taman xuugga. 26 Aaroni kahine gididi shuumetiya wode shukida maraziya angaasuwa ekada, Godaa sinthan yuusho yarsho ootha. Hessi hintena gakiya gisho gidana.

27 “Kahiney shuumetiya wode, Aaronanne iya nayta kahinetethan shuumanaw eketida angaaysuwanne toho ashuwa taw dummaya. Hessika, kahineta gakiya gisho gido. 28 Isra7eeleti ubbay kahine shuumanaw woyko anjetanaw Godaas Angaasonne guye toho yarsho immiya wode ashoy taw dummatidaysa gido. Shin gishoy Aaronasinne iya naytas gako; he wogay laametofo.

29 “Aaroni hayqida wode iya nayti iya kahinetetha ma7uwa laatto. Enti kahinetethan shuumetidaape guye he ma7uwa ma7o. 30 Iya naytape iya bessan kahine gididi, Geeshsha bessan haggaazanaw Geeshsha Dunkaaniya yaa na7i he ma7uwa laapun gallas ma7o.

31 “Aaroninne iya nayti kahine gididi shuumetiya wode shuketida maraziya ashuwa ekada, geeshsha bessan katha. 32 Aaroninne iya nayti maraziya ashuwa gaytan attida uythaara Geeshsha Dunkaaniya pengen mo. 33 Enti kahine gididi shuumetiya wode nagara atotethas yarshetida he ashuwa mona. Shin he kathay geeshshi gidida gisho, kahineta xalaali mo; hara asi oonika moopo. 34 Ashuwapenne kathaafe mishin attidi aqiko, taman xuugeto; geeshshi gidida gisho meetetofo.

35 “Aaroninne iya nayti kahine gididi shuumetiya wode, ta nena kiitida ubbaa ootha; ba7aaley laapun gallasan poleto. 36 Nagaraa atotethas issi issi gallasan issi wofaano shukada yarsha. Hessi yarsho bessa geeshshees. Yaatada yarsho bessa polo geeshshanaw shamaho zayte tiya. 37 Hessa laapun gallas gakanaw gallas gallas ootha. Yaatiko yarsho bessay polo geeshshi gidana. I polo geeshshi gidida gisho, iya bochiya asi woyko haraba ubbay geeyana.

38 “Laythan laythan yarsho bessan gallas gallas issi laythi gidida nam7u marazeta yarsha. 39 Marazetape issuwa wonta, qassi hankuwa omarsi yarsha. 40 Koyro maraziyara issi kilo giraame gidiya geeshsha lo77o giste dhiille, issi litiro shamaho zaytera gindada yarsha. Issi litiro woyne ushsha yarsho oothada gussa. 41 Hanko maraziya omarsi yarshashe wonta yarshoysa mela dhiille, zaytenne woyne ushsha shiisha. Hessi taw yarshetiya katha yarsho; iya sawoy tana ufayseysa gidana.

42 “Laythan laythan he xuussa yarshoy Geeshsha Dunkaaniya pengen, Godaa sinthan paci bayna yashetanaw bessees. He bessan taani ta deriyara gahetana; neeraka yan odetana. 43 Yan taani Isra7eeletara gahetana; ta bonchoy he bessa dummayana. 44 Taani Geeshsha Dunkaaniyanne yarsho bessa dummayana; enti taw kahine gididi haggaazana mela Aaronanne iya nayta dummayana. 45 Yaatada, taani Isra7eeleta giddon daana; enta Xoossaa gidana. 46 Enta giddon daanaw Gibxefe enta kessida Goday, enta Xoossay tana gideysa enti erana. Taani Godaa, enta Xoossaa.