30
Gibxes Kessida Zelelsi
1 Qassika Godaa qaalay haysada yaagishe taako yis: 2 “Asa na7aw, Ubbaa Haariya Goday haysada yaagees gada tinbite oda.
“ ‘He gallasaa ayye!
Yaagada zeleela.’
3 He gallasay matis!
Godaa gallasay gakis!
He gallasay shaari kammida gallas
kawotethata ubbaas meto gallas gidana.
4 Gibxe bolla oli yaana;
Tophe bolla un7i yaana.
Daroti Gibxe biittan hayqana;
iya duretethay bonqetana; iya baasoy shodetana.
5 He olay Tophe, Liide, Liibe, Arabenne caaqo dere ubbay Gibxera issife mashshan wursana” yaagees.
6 Gibxe maaddeysati kundana; iya otoruwa wolqay wurana. Migdoolape bidi Aswaana gakanaw, enti mashshan hayqana. Taani Ubbaa Haariya Goday hessa odayis. 7 Gibxey biitta ubbaafe aadhida baysa biitta gidana; iya katamati hara laaletida katama ubbaafe aadhidi laaletidi attana. 8 Taani Gibxe taman oythiya wodenne iya maaddeysati ubbay hayqidi wuriya wode, taani Godaa gideysa enti erana.
9 “He wode taani saro de7iya Tophe asaa daganthanaw asata markaben kiittana. Gibxey pirdetiya gallas Tophe asaa bolla waayey yaana. He gallasay gakis” yaagees.
10 Ubbaa Haariya Goday haysada yaagees: “Babiloone kawa Nabukadanaxoora kushen taani Gibxe duretetha dhaysana. 11 Kawotethata ubbaafe aadhidi, wozana mino olanchota kaalethidi yidi, biitta dhaysana; enti Gibxe asaa bolla mashshe shoddidi, biittan aha kunthana. 12 Nayle shaafa taani melisana; taani Gibxe iita asata kushen aathada immana; he biittanne yan de7iyaba ubbaa allagatan dhaysana. Taani Goday haysa odas” yaagees.
13 Ubbaa Haariya Goday haysada yaagees: “Mempisa kataman de7iya eeqatanne misileta ubbaa ta dhaysana; Gibxe biittan zaaridi halaqay deenna; biitta ubbaa taani yashisana. 14 Taani Phatroosa geetetiya dugeha bagga Gibxe baysa kessana; pudeha baggara de7iya Xo7aane kataman tama yeddana; Tebisa katama pirdana. 15 Gibxe miixa gidida Pelusiyaman ta hanquwa gussana; Tebisa asa ubbaa wursana. 16 Taani Gibxen tama oythana; Pelusiyami daro waayetana; Tebisa dirsa gimbey laaletana; Mempisa katamaa duuxonna metoy gakana. 17 Onaninne Bubastu kataman de7iya na7atethati ubbay mashshan wurana; maccasay di7etidi baana. 18 Gibxe wolqaa ta mentherethiya wode Xafinaasan gallasi qammana; I otoruwa wolqay wurana; Gibxe shaari kammana; he katama yuushon de7iya gutati ubbaa di7etidi baana. 19 Taani Gibxe hessada oothada pirdana. Taani Godaa gideysa enti he wode erana” yaagees.
20 Nuuni di7etida tammanne issintho laythan, koyro ageenan, laapuntha gallasan, Godaa qaalay haysada yaagishe taako yis. 21 “Asa na7aw, ta Gibxe kawa qesiya menthas; iya woyshaninne curqan xaaxidi, koolidi pathiya hiilli baawa; hizape guye I minotethi demmidi mashshe oykanaw danda7enna. 22 Hessa gisho, Ubbaa Haariya Goday haysada yaagees. Taani Gibxe kawas morke gidana. Kase iyaw meqida qesiyanne lo77o de7iya qesiya nam7aaka ta menthana; iya mashshay iya kushepe sa7an wodhanaada oothana. 23 Taani Gibxeta kawotethata giddoninne hara biittatan laallana. 24 Taani Babiloone kawa nam7u qesiya minthada, ta mashsha iya oythana. Shin Gibxe kawa qesiya menthana; ba morkiya sinthan I hayqana haniya asada oolana. 25 Taani Gibxe kawa qesiya daabursada, Babiloone kawa qesiya minthana. Taani Babiloone kawa ta mashsha oythiya wodenne I Gibxe bolla denthiya wode Gibxeti taani Godaa gideysa erana. 26 Gibxeta taani kawotethata giddoninne biitta ubban laallana. Taani Godaa gideysa enti he wode erana” yaagees.