1 Godaa qaalay haysada yaagishe taako yis. 2 “Asa na7aw, ne biitta asaas haysada yaagada oda: ‘Ta issi biitta bolla olaa ehiya wode he biitta asay banta bolla yaaba wochiya asi dooro banta giddofe dooro. 3 He wochiya uray morkey yishin be7idi, asay naagetana mela moyze punniko, 4 Oonika moyze punuwa si7idi, naagetonna ixin, oli yidi iya wodhiko, suuthaa acoy iya oyko. 5 I moyze punuwa si7idi, naagetonna ixida gisho iya suuthaa acoy iya bollana. I si7idi naagetidaba gidiyako hayqope attanashin. 6 Shin wocheysi morkey yeysa be7ishe, moyze punnidi asaa erisonna aggiko, olay yidi, he asaape issi asi wodhiko, he uray ba nagaran hayqees; shin taani iya suuthaa wocheysa kushepe ekana’ ” yaaga.

7 “Asa na7aw, ta nena Isra7eele asaas wochiya asi oothas; ta new odeysa si7ada asaa akeekisa. 8 Taani issi iita asi, ‘Neeni tuma hayqana’ giya wode, I ba nagaraape simmana mela ne iyaw odonna ixiko, he uray ba nagaran hayqees; shin taani iya suuthaa gisho nena achana. 9 Shin nagaranchoy ba nagaraape simmana mela ne odin, I ixiko, I ba nagaran hayqees; shin ne ne shempuwa ashshaasa.”

10 “Asa na7aw, Isra7eele asaas haysada yaagada oda: ‘Hinte, nu nagaray nu qohoy nu bolla de7ees; hessa gaason nu gilqida. Yaatin, nu waanidi paxa daanaw danda7oona?’ ” yaageeta. 11 Taani Ubbaa Haariya Goday ta de7uwan caaqayis: “Nagaranchoy ba nagaraa aggidi, de7on daana mela koyaysipe attishin, nagaranchuwa hayquwan ufaytike. Hinteno, Isra7eele asaw, simmite; hinte iita oosuwa aggite! Ayis hayqanaw koyeetii?” yaagis.

12 Asa na7aw, ne biitta asaas oda. “Xillo asi nagara oothiko, iya kase xillotethay iya ashshena; qassi nagaranchoy ba nagaraape simmiko, kase nagaraa gisho I pirdetenna. Xillo asi nagara oothiko, kase xillotethaa gisho de7on daanaw danda7enna. 13 Taani xillo asako, ‘Neeni tuma de7on daana’ yaagida wode, I ba xillotethan ammanetidi nagara oothiko, ba oothida nagaran I hayqanaape attishin, kase xillotethay iyaw qofetenna. 14 Qassi taani nagarancho asako, ‘Neeni tuma hayqana’ yaagida wode I ba nagaraape simmidi, tumanne suure ooso oothiko, 15 miishe tal7anaw oykidaba zaariko, kaysotidaba guye immiko, nagara ooso aggidi, de7o immiya higgiya naagiko, I tuma de7on daanape attishin, hayqenna. 16 I kase oothida nagaray issoy qofetenna; ha77i tumanne suure ooso oothida gisho, I tuma de7on daana.

17 “Gidoshin, ne biitta asay, ‘Godaa ogey like gidenna’ yaagosona; shin like gidonnay enta ogiya. 18 Xillo asi ba xillotethaa aggidi, nagara oothiko, I ba nagaran hayqana. 19 Qassi nagarancho asi ba nagaraape simmidi, tumanne suure ooso oothiko, he oosuwan I de7on daana. 20 Shin hinte, ‘Godaa oge like gidenna’ yaageeta. Isra7eele asaw, ta hinte issuwa issuwa bolla hinte oosuwada pirdana” yaagis.

21 Nuuni di7etida tammanne nam7antho laythan, tammantho ageenan, ichashantho gallasan, Yerusalaamepe kessi ekidi yida issi asi katamay kundidaysa taw odis. 22 He uray yaanape issi gallasi sinthe, omarsa wode Godaa kushey ta bolla de7ees; ta doonay dooyetis; wontetha gallas he uray taako gakiya wode taani oda doomas.

23 Godaa qaalay haysada yaagishe taako yis. 24 “Asa na7aw, Isra7eele biittan laaletida katamatan de7iya asay haysada yaagosona: ‘Abrahaamey barka de7iya issi asi; I ha biitta laattis; shin nuuni daro; biittay tuma nuus laata gididi imetis’ ” yaagosona.

25 Hessa gisho, Ubbaa Haariya Goday haysada yaagees gada entaw oda. “Hinte ha77ika suuthara de7iya asho meeta; eeqa goyinneta; shempo wodheeta. Haysa ubbaa oothishe hinte tuma biitta laattanee? 26 Hinte hinte mashshan ammaneteta; tuna ooso ootheeta; hinte ubbay hinte shooruwa macheta tuniseeta. Haysa ubbaa oothishe hinte tuma biitta laattanee?” yaagees.

27 Ubbaa Haariya Goday ba de7uwan caaqidi haysada yaagees: “Laaletida katamatan de7iya asay mashshan hayqana; katamaape gaxan de7iya asaa taani bazzo do7aas kathi oothana; dere bollanne gongolo giddon de7iya asay iita hargen hayqana. 28 Ta he biitta kallonne baysi kessana; enti otortiya wolqay wurana; Isra7eele dereti ay asika yaara kanthonna baysi gidana. 29 Enti oothida tunaa gaason taani biitta kallonne baysi kessiya wode, taani Godaa gideysa enti erana” yaagees.

30 “Asa na7aw, asay katamaa dirsa mataninne banta keethata pengen eqidi, issoy issuwara haysada yaagidi, nebaa odetees. ‘Haayite; Godaa matape yida qaalay woygiyako ane si7oos’ yaagosona. 31 Enti kase asay yeysada neeko yoosona; ta asada ne sinthan uttoosona; ne odeysa si7oosona; shin oothokona. Enti siiqoba haasayoosona; shin enta wozanay go77a xalaala yaaretees. 32 Ne entaw issi siiqo mazmure lo77o girsan yexiyanne diithi loythidi diixiya asa mela. Enti ne odeysa si7oosona; shin oothokona. 33 Shin ne odeysi tuma poletana; poletiya wode, nabey enta giddon de7eysa enti erana” yaagis.