1 Godaa qaalay haysada yaagishe taako yis. 2 “Asa na7aw, Sayre zumako ne som7uwa zaarada tinbite oda: 3 ‘Neno, Sayre zumaw, ta new morke gidana; taani ta kushiya ne bolla denthada, nena kallonne baysa kessana. 4 Taani ne katamata laallana; ne baysa gidana. Taani Godaa gideysa ne he wode erana’ ” yaagees Ubbaa Haariya Goday.

5 New Isra7eelera wuronna morketethi de7iya gisho, enta un7aa wodenne enta wursetha pirdaa wode, enta ne mashshas aathada immadasa. 6 Ta Ubbaa Haariya Goday ta de7uwan caaqayis: taani nena hayqon pirdana; ne hayqope kessa ekanaw danda7aka. Ne ase wodho ixonna gisho ase wodhey nena kallana. 7 Taani Sayre zumaa kallonne baysa kessana; yaara oonika aadhona mela oothana. 8 Taani ne dereta ubbaa ahan kunthana; dereti, shaafatinne zangaarati mashshan hayqidaysata ahan kametana. 9 Ta nena merinaw baysa oothana; ne katamati kallo attana; Taani Godaa gideysa hinte he wode erana.

10 “Taani Goday Isra7eeleninne Yihudan de7ishin hinte, ‘Ha nam7u kawotethatanne ha nam7u biittata nu oykana; enti nubaa gidana gida gisho, 11 Hinte enta morkidi, enta bolla yilotida gishonne qanaatida gisho ta hintew seerana. Ta hintena pirdiya wode taani tana gideysa hintena erisana.’ 12 Hinte, ‘Isra7eele dereti baysa attidosona; nuuni midi dhaysana mela nuus imetidosona’ gidi, cayida cashsha ubbaa taani Goday si7idaysa hinte he wode erana. 13 Ne ta bolla otoron odetida odaanne zawi bayna haasayida haasaya taani si7as. 14 Biitta ubbay ufaytiya wode taani hintena baysa kessana. 15 Isra7eele laata biittay baysa gidida wode hinte ufaytida gisho, Sayre zumaw Edoome biitta ubbaa taani baysa oothana. Taani Godaa gideysa hinte he wode erana” yaagees Ubbaa Haariya Goday.