1 Hessafe guye, he uray tana guye zaaridi, Xoossa keethas doloha baggara de7iya kare bagga dirsa pengiyako ehiya wode dirsa pengey gordetidi uttis. 2 Goday taako, “Ha pengey gordan daanape attishin, nam7antho dooyetenna. Goday Isra7eele Xoossay yaara gelida gisho oonika yaara gelenna. Hessa gisho, he pengey gordan daana. 3 Gidoshin, Isra7eele halaqay, Godaa sinthan uythi maanaw yan uttanaw danda7ees. Pengiya barandaara I gelanawunne keyanaw danda7ees” yaagis.

4 He uray tana pudeha pengiyako efiya ogiyara efidi, Xoossa keethas sintha bagga gathis. Yan gidada ta be7iya wode, Heko, Godaa bonchoy Xoossa keethaa kumidi uttidaysa be7ada som7ora sa7an gufannas.

5 Goday taako, “Asa na7aw, Xoossa keetha wogatanne iya higgeta ubbaa ne be7eysanne si7eysa loythada naaga. Xoossa keethaa gelanawunne keyanaw bessiya asatinne bessonna asati oonanteko loythada akeeka. 6 Makallancho Isra7eele asaas, Ubbaa Haariya Goday haysada yaagees gada oda. ‘Hinteno, Isra7eele asaw, hinte oothiya tuna oosota aggite. 7 Hinte taw ta kathaa, modhuwanne suuthu yarsho oothidi shiishiya wode wozanaynne ashoy qaxaretiboona allaga asata Xoossa keethi gelsidi ta keethaa tunisideta; ta caaquwa menthideta. 8 Ta geeshsha miisheta bolla aawatona ixidi, ta keethan allagata aawaydeta’ ” yaagees.

9 Hessa gisho, Ubbaa Haariya Goday haysada yaagees: “Isra7eele asaa giddon de7iya allaga asi, ba wozananinne ba ashuwa qaxaretiboona, oonika ta keetha gelopo.”

10 “Tana aggidi, Isra7eele asaara eeqa goyinnida Leeweta ta seerana. 11 Enti ta keethan oosancho gido; ta keetha dirsa pengeta naago; Xoossa keethaa oosuwaka ootho. Enti xuussa yarshonne asay ehiya hara yarsho shuko; qassi asaas oothanaw asaako shiiqo. 12 Shin enti kase Isra7eele asaa eeqa goyinnisida gishonne asaa nagarako kaalethida gisho, enti banta nagaraa seera ekana mela ta kushe denthada caaqas” yaagees Ubbaa Haariya Goday. 13 Enti kahine gididi oothanaw taako shiiqopo; woyko taw dummatida geeshshabakonne Ubbaafe Geeshsha Bessaako shiiqopo. Enti banta oothida tuna oosuwa gisho, oyshetana. 14 Hessa gisho enti Xoossa keethan aawatanadanne iya giddon oothanaw de7iya ooso ubbaa oothana mela ta enta shuumana.

15 “Shin Isra7eele asay tana aggidi, ta sinthafe haakida wode Xoossa keethaa wogaa ammanetidi polida, Leewe koche gidida kahineti, Saadoqa yarati, taw oothanaw taako shiiqo. Modhdhuwanne suuthaa shiishidi enti ta sinthan ootho” yaagees Ubbaa Haariya Goday. 16 Xoossa keethaa enti gelo; taw oothanaw ta yarsho bessa enti shiiqo; aawatetha enti oyko. 17 Enti Xoossa keethaas giddo dabaaba geliya wode, liinope dadetida ma7o ma7o; giddo dabaaba pengen woyko Xoossaa keetha giddon oothiya wode suufe ma7o ma77ofa. 18 Enti banta huuphen liino goxidi; banta xeessan liino qantha sure danco; cawaya ma7o ma7ofo. 19 Asay de7iya kare dabaaba enti keyanaape sinthe Xoossa keethan oothishe ma7ida ma7uwa qaaridi, geeshsha kifiletan wotho. Hessika, asay enta geeshsha ma7uwa bochidi qohetonna melasa.

20 “Kahineti banta huuphiya meedetofo woyko adussidi dichofo; banta huuphiya maaran qanxeto. 21 Ay kahineti giddo dabaaba geliya wode woyne ushshi uyopo. 22 Enti azini hayqida, woyko sayo maccas ekofo. Isra7eele asaape geela7o eko; woyko azinay kahine gididi de7ishe hayqida maccas eko.

23 “Kahineti Godaas dummatidabaanne dummatonnaba giddon de7iya dummatethaa ta asaa tamaarso; geeshshinne tuna giddon de7iya dummatethaa enta besso. 24 Ay mootoy dendikoka, kahineti higgey odeysada pirdo. Ta higgeynne ta wogay geysada ta ba7aaleta boncho; ta Sambaata dummayidi boncho.

25 “Kahiney hayqida ahako shiiqidi, bana tunisopo. Gidoshin, hayqiday aawa woyko aayo woyko iya adde na7a woyko macca na7a woyko isha woyko azina gelaboonna micho gidiko bana tuniso. 26 Tunidaape guye, laapun gallas gam7o; hessafe guye, I geeshshi gidana. 27 Geeshsha bessan haggaazanaw giddo dabaaba geliya wode ba nagaraa gisho yarsho shiisho” yaagees Ubbaa Haariya Goday.

28 Kahinetas laati baawa; ta entaw laata. Isra7eele biittan entaw ay laataka immopite; enta laatay tana. 29 Enti katha yarsho, nagara yarshonne naaqo yarsho mo. Isra7eele biittan Godaas dummayidaba ubbay entassa. 30 Koyro gakiya dumma dumma kathaa xeera ayfeynne hinte Godaas immiya imota ubbay kahinetassa. Hinte keethay anjetana mela hinte dhiilliyafe koyro kushiya entaw immite. 31 Kahineti bawuta woyko do7i wodhida kafo asho woyko mehe asho moopo.