1 “Biittaa shaakanaw mazgabetida kochata sunthay haysa: Pudeha baggara issi saami Daane kochaas imeto. Hessika Hetloonape Hamaata efiya ogiya kaallidi, yaape Damasqo biittan de7iya Haxar-Enaana katamaa gakees. Hessi dolohape bidi wuloha gakanaw de7iya bessaas pudeha bagga zawa gidana. 2 Daane zawara oyketidi, dolohape wuloha gakanaw de7iya issi saamay Aseera kochaas imeto. 3 Aseera zawara oyketidi, dolohape wuloha gakanaw de7iya issi saamay Niftaaleme kochaas imeto. 4 Niftaaleme zawara oyketidi, dolohape wuloha gakanaw de7iya issi saamay Minaase kochaas imeto. 5 Minaase zawara oyketidi, dolohape wuloha gakanaw de7iya issi saamay Efreema kochaas imeto. 6 Efreema zawara oyketidi, dolohape wuloha gakanaw de7iya issi saamay Robeela kochaas imeto. 7 Robeela zawara oyketidi, dolohape wuloha gakanaw de7iya issi saamay Yihuda kochaas imeto.

8 “Yihuda zawara oyketidi, dolohape wuloha gakanaw de7iya issi saama dummaya wotha. Iya gompay tammanne nam7u kilo mitirenne bagga gido. Dolohape wuloha gakanaw de7iya adussatethay issi kochaa shaakin gakiya saamara gina. Iyaw giddo ginan Xoossa keetha de7ees.

9 “He bessaafe neeni Godaas dummayada wothiya bessay tammanne nam7u kilo mitirenne bagga adussenne tammu kilo mitire dalga gido. 10 He bessaafe baggay kahinetas dummatida besse gido; I pudeha baggara tammanne nam7u kilo mitirenne bagga adusse; wuloha baggaranne doloha baggara ichashu kilo mitire dalga gido. Xoossa keethay iyaw giddo ginan de7ees. 11 Ha dummatida bessay Isra7eele asay ta ogiyape kare kare keyida wode entara kare keyida Leewetada giddona, ammanetidi taw oothishe gam7ida, geeshsha kahinetas, Saadoqa yaratas imeto. 12 Hessi Godaas dummatida biittafe entaw dumma gisho; I Ubbaafe geeshsha Bessi. Enta zaway Leewetas saaman imeto.

13 “Kahineta zawara oyketidi, Leewetas adussatethay tammanne nam7u kilo mitire bagga, dalgatethay ichashu kilo mitire gidida issi saami imeto. 14 Enti he biittafe bayzanaw woyko laammanaw koshshenna. He biittay lo77o biitta gidiya gisho, hara asa kushen gelanaw bessenna; Godaas I geeshsha besse.

15 “Attida nam7u kilo mitirenne bagga dalganne tammanne nam7u kilo mitirenne bagga adussa bessay katamaa asa ubbay keethaasinne mehe heemmiya besse gido; katamay he biitta giddo ginan de7o. 16 He katamay oyddu maazanera de7ees. Pudeha baggay oyddu mukulunne ichashu xeetu wadha; dugeha baggay oyddu mukulunne ichashu xeetu wadha; doloha baggay oyddu mukulunne ichashu xeetu wadha; wuloha baggay oyddu mukulunne ichashu xeetu wadha. 17 Katamaas hentha gadey de7o; he gadey pudeha baggara, dugeha baggara, doloha baggaranne wuloha baggara nam7u xeetanne ishatamu wadha dalga gido. 18 Xoossa keethay keexetidi simmin, geeshsha bessan attida bessay doloha baggara adussatethay ichashu kilo mitire; wuloha baggara adussatethay ichashu kilo mitire gido. Attida biittay he kataman de7iya asaas goshsha biitta gidana. 19 He kataman de7iya Isra7eele zare gidida oonika he biitta goyanaw danda7ees. 20 Hinte dummaya bessaa oyddu maazaney tammanne nam7u kilo mitirenne bagga aduqo. He bessay katamay keexetida bessaanne geeshsha bessaa gujees.

21 “Geeshsha bessaafenne katamaa bessaafe attida biittay halaqaa gisho gido. Hessika tammanne nam7u kilo mitirenne bagga gidida geeshsha bessaafe bidi doloha bagga zawa gakees. Wuloha baggan de7iya tammanne nam7u kilo mitire gidida katamaa biittay wuloha baggaa zawa gakees. Hessada hanidi geeshsha bessaynne Xoossay keethay giddon gidana. 22 Hessa gisho, Leeweta biittaynne katamaa biittay halaqaas imetida biittafe giddon gidana. He halaqaa biittay pudeha baggara Yihuda laatan, garsa baggara Biniyaame laatan zawatees.

23 “Attida kochatas biittay haysada hanidi shaaketis. Dolohape wuloha gakanaw de7iya issi saamay Biniyaame kochaas imeto. 24 Biniyaame zawara oyketidi, dolohape wuloha gakanaw de7iya issi saamay Simoona kochaas imeto. 25 Simoona zawara oyketidi, dolohape wuloha gakanaw de7iya issi saamay Yisakoora kochaas imeto. 26 Yisakoora zawara oyketidi, dolohape wuloha gakanaw de7iya issi saamay Zabloona kochaas imeto. 27 Zabloona zawara oyketidi, dolohape wuloha gakanaw de7iya issi saamay Gaade kochaas imeto. 28 Gaade dugeha zaway Tamaara katamaape dendidi, Mariba Qaadesan de7iya pultouwa gakidi, Gibxe shaafa kaallidi, Medetiraane Abbaa gakees.

29 “Hinte Isra7eele asaas shaakana biittay haysa; hessi enta gishuwa” yaagidi Ubbaa Haariya Goday odis.

30 Katamaape keyiya pengeti haysata. Pudeha baggara de7iya oyddu mukulunne ichashu xeetu aduqiya pengiyafe doomidi, 31 katamaa pengeti Isra7eele kochata sunthan xeegetana. Pudeha baggara de7iya heedzu pengeti Robeela penge, Yihuda pengenne Leewe penge gidana. 32 Doloha baggara oyddu mukulunne ichashu xeetu wadha aduqiya heedzu pengeti, Yoosefa penge, Biniyaame pengenne Daane penge gidana. 33 Dugeha baggara oyddu mukulunne ichashu xeetu aduqiya heedzu pengeti, Simoona penge, Yisakoora pengenne Zabloona penge gidana. 34 Wuloha baggara oyddu mukulunne ichashu xeetu wadha aduqiya heedzu pengeti, Gaade penge, Aseera pengenne Niftaaleme penge gidana.

35 “Katamaa yuushoy kumethi wadhin, tammanne hospun mukulu wadha gidana. He wodepe doomidi he katamay, ‘Goday Yan De7ees’ geetetidi xeegetana” yaagees.