Medhetetha Maxaafa
Gaatha Qofa
Medhetetha maxaafay, salo sa7a medhetethi, asa medhetethi, eko geloba, nagaraba, doona buqetethabanne Isra7eele asa doomethi odees. Medhetetha Maxaafay nam7u ayfe kifiletan shaaketees.
1. Shempo 1—11 gakanaw de7iya kifiley, Addaamepe Abrahaame gakanaw de7iya asa zeretha doometha taarike qoncisees. Ha kifiliyan, salo sa7a medhetethi, asa medhetethi (Shem 1—2). Addaamenne Hewaanni kiitetetha ixo, nagara gaason baadethinne hayqoy asa koche ubba bolla yuussaa (Shem 3). Qaayelanne Aabela taarikenne asa yeletethi (Shem 4—5). Nohe ammanetethi, asa iitatethinne dhayo haathi (Shem 6—10). Babiloone gimbe, doona buqetethinne asa laaletethi (Shem 11) bessiya taarike paadidi odees.
2. Shempo 12—50 gakanaw de7iya kifiley, Isra7eele koyro aawata taarike odees; enta giddofe Xoossas kiitetethan eretida Abrahaame dooretetha, kaallidi iya na7a Yisaaqa, iya na7a na7a gidida Yayqoobanne tammanne nam7u Yayqooba nayta taarike qoncisees. Ha tammanne nam7u Yayqooba nayti, tammanne nam7u Isra7eele kochaas doomethi gidida mayzata. Ha tammanne nam7u Isra7eele nayta giddofe Yoosefa taarikey ha maxaafan daro odetida taarike.
Ha maxaafay, asa zeretha taarike odiyaba gidikoka ubbaafe aathidi Xoossi oothida iya gita oosuwa paadidi bessees. I ba asaas immida ufaysa qaalay, Xoossay ba asaas merinaw qopeysa bessees. Maxaafay gaxape gaxa gakanaw nagara pirdey, ba asaa kaalethey, enta maaddeynne enta taarikiya giigisey Xoosse gideysa bessees.
Maxaafa Ayfe Qofata
Medhetetha taarike (1:1—2:3)
Addaamenne Hewaanno (2:4-25)
Nagari alame geluwa (3:1-24)
Nagari alamen daayethaa (4:1—6:8)
Nohenne dhayo haatha taarike (6:9—9:29)
Babiloone gimbiyanne asa laaletethi (11:1-9)
Seema yeletetha susaa (11:10-32)
Abrahaame xeegetethanne duussaa (12:1—25:11)
Isma7eela yeletetha (25:12-18)
Yayqooba yeletetha (25:19—35:29)
Eesawe yeletetha (36:1-43)
Yoosefanne iya ishata (37:1—45:28)
Isra7eele asay Gibxe biittan (46:1—50:26)
1
Medhetethaba
1 Xoossay koyro salotanne sa7a medhis. 2 He wode sa7i giigonanne aybika bayna mela de7ees. Dhumi biitta ma77ida wolqaama haathata bolla de7ees. Xoossa Ayyaanay haathaafe bollara qaaxees.
3 Hessafe guye, Xoossay, “Poo7oy hano” yaagin, poo7oy hanis. 4 Poo7oy lo77o gididaysa Xoossay be7is; poo7uwa dhumape shaakis. 5 Xoossay poo7uwa, “Gallas” gidi sunthis; qassi dhumaa “Qamma” gidi sunthis. Sa7i qammis wontis; hessi koyro gallas.
6 Hessafe guye, Xoossay, “Bollara de7iya haatha garsan de7iya haathaafe shaakiya salo gufanthoy hano” yaagin hanis. 7 Xoossay salo gufantho giigisidi, salo gufanthofe bollara de7iya haatha garsan de7iya haathaafe shaakis. 8 Xoossay he gufanthuwa, “Salo” gidi sunthis. Sa7i qammis; wontis; hessi nam7antho gallasa.
9 Hessafe guye, Xoossay, “Mela bessay qoncanaada Salope garsan de7iya haathi ubbay issi bessi shiiqo” yaagin hanis. 10 Xoossay he mela bessaa, “Biitta” gidi sunthis; qassi issi bessan shiiqida haatha, “Abba” gidi sunthis. Yaatidi, Xoossay hessi lo77o gididaysa be7is. 11 Hessafe guye, Xoossay, “Biittay mithi maata doliso; zeretha ayfey de7iya kathinne zeretha ayfey giddon de7iya mithi dolo” yaagis; hessadaka hanis. 12 Biittay mithi maata iya qommon qommon dolisis. Xoossay hessi lo77o gididaysa be7is. 13 Sa7i qammis wontis; hessi heedzantho gallas.
14 Hessafe guye, Xoossay, “Gallasa qammafe shaakanaw poo7oti salon hano. Enti qamanne, gallas, wodenne laythi erisanaw malla gido. 15 Biitta bolla poo7ana mela enti salo gufanthon hano” yaagis; hessadaka hanis. 16 Xoossay nam7u gita poo7ota medhis. Awi gallas, ageeni qamma poo7ana mela oothis. Hessadaka Xoolintota medhis. 17 Xoossay enti ha sa7a bolla poo7ana mela salon wothis. 18 Hessi, gallasinne qamma haarana melanne poo7o dhumape shaakana melasa. Xoossay hessi lo77o gididaysa be7is. 19 Sa7i qammis wontis; hessi oyddantho gallas.
20 Hessafe guye, Xoossay, “De7oy de7iya dumma dumma medhetethati haathan daro; kafotika sa7ape bollara, salo gufanthofe garsan piradho” yaagis. 21 Yaatidi Xoossay abban de7iya gita do7ata, haatha giddon woxi qaaxiya medhetethata ubbaanne paalliya kafota ubbaa iya qommon qommon medhis. Xoossay hessi lo77o gididaysa be7is. 22 Xoossay enta, “Yeletite, darite, abba kumite, kafoti biitta bolla daro” yaagidi anjis. 23 Sa7i qammis wontis; hessi ichashantho gallas.
24 Hessafe guye, Xoossay, “De7oy de7iya medhetethati enta qommon qommon, meheta, sa7ara gooshetiya medhetethatanne do7ata enta qommon qommon biittay kesso” yaagin hanis. 25 Hessada oothidi enta ubbaa medhis. Xoossay hessi lo77o gididaysa be7is.
26 Hessafe simmin, Xoossay, “Ase nuna daanisidi ane medhoos. Enti abba moluwa, salo kafota, biitta bolla woxi qaaxiya medhetetha ubbaa haaro” yaagis. 27 Hessada Xoossay ase bana daanisidi medhis. I ase Xoosse daanisidi medhis; enta addenne maccas oothidi medhis.
28 Xoossay entana, “Yeletite, darite, sa7a kumite; haarite. Abba molo, salo kafotanne biitta bolla woxi qaaxiya, de7oy de7iya medhetetha ubbaa haarite” yaagidi anjis.
29 Hessafe guye, Xoossay, “Taani biitta ubbaa bolla zeretha ayfey de7iya katha ubbaanne zeretha ayfey giddon de7iya mithi ubbaa hintew immas; hessi hintew kathi gido. 30 Qassika ha sa7an de7iya mehenne do7a ubbaas, salo kafo ubbaasinne sa7ara gooshetiya medhetetha ubbaas miyaba gidana mela, cil7o mithinne maata immas” yaagis; hessadaka hanis. 31 Xoossay ba medhida ubbabaaka xeelliya wode daro lo77o gididaysa be7is. Sa7i qammis; wontis; hessi usupuntho gallas.