1 Goday ba odidaysada Saaro anjis; ba gelida qaalaka polis. 2 Saara qanthatada Xoossay gida wodey gakin cimida Abrahaames adde na7a yelasu. 3 Abrahaamey Saara yelida na7a suntha Yisaaqa gidi sunthis. 4 Abrahaamey ba na7a Yisaaqa Xoossay kiitidaysada yeletida hospuntho gallasan qaxaris. 5 Iya na7a Yisaaqi yeletiya wode, Abrahaames laythi xeeta. 6 Saara, “Xoossay taw miiche immis; qassi haysa si7iya ubbay taara miicana” yaagasu. 7 Qassika Saara, “Saara Abrahaames na7a yelada dhanthana giday oonee? Gidikoka taani ha7i iyaw I cimida wode na7a yelas” yaagasu.*Miiche: “Yisaaqa” guussay “I miicees” guussu.

8 Guutha na7ay diccidi; dhanthi duuthis; Abrahaamey Yisaaqi dhanthi duuthida gallas wolqaama gibira giigisis. 9 Shin Gibxefe yida Aggaara Abrahaames yelida na7ay Yisaaqa toochishin Saara be7asu. 10 Saara Abrahaameko, “Ha aylle na7ay ta na7a Yisaaqara ubbaka laattonna gisho, gadhindiwunne I na7aa kessada goodda” yaagasu.

11 He oday ba na7a bochiya gisho, Abrahaamey daro metootis. 12 Shin Xoossay Abrahaame, “Ne kochay Yisaaqa baggara xeegetana gisho ne na7aasinne ne ayllees daro metootopa; Saara new odiyaba ubba si7a. 13 Qassi ika ne koche gidiya gisho aylle na7a taani iya gita dere oothana” yaagis.

14 Wonta guura Abrahaamey dendidi guutha kathinne koddan haathe kunthidi, Aggaaro toossidi, I na7a iyo idinthidi kessi goodis. Iya bada, Barsaabe mela biittan daaburasu. 15-16 Haathay koddaafe wurida wode iya, “Na7ay hayqishin, uttada be7ike” gada, na7a issi buure garsan yeggada, nam7u xeetu wadha gideysa mela bada utta aggasu. Yan uttada, ba qaala dhoqu oothada yeekasu.

17 Xoossay na7a waasuwa si7is. Xoossa kiitanchoy Aggaaro salope xeegidi, “Aggaare, waanadii? Xoossay na7a yeehuwa si7ida gisho babofa; 18 danda eqada, na7a denthada ne kushiyan oyka; taani iya gita dere oothana” yaagis. 19 Xoossay iyo haatha olla bessin, bada koddan haathe kunthada na7aa ushshasu. 20 Na7ay dicciya wode ubban, Xoossay iyara gidis. I mela biittan de7idi, dongen dukiya ase gidis. 21 I Paarana mela biittan de7ishin, iya aayiya Gibxefe iyaw macho immasu.

22 He wode, Abimelekey, ba toora mocona Fikoolara Abrahaameko bidi, “Neeni oothiyaba ubban Xoossay neera de7ees. 23 Neeni ta bolla woyko ta nayta bolla woyko ta zeretha bolla cimmada gene oothonna mela, ha7i haysan, Xoossa sinthan taw caaqa. Taani new keehidaysada, neenika taasinne neeni betetethan de7ida ha biittees keeha” yaagis.

24 Abrahaamey, “Taani caaqayis” yaagis.

25 He wode, Abrahaamey Abimeleke aylleti ekida haatha ollaba Abimelekes maggannis. 26 Shin Abimelekey, “Hessa ooni oothidaako taani erike. Neenika qassi taw odabaaka; taani hachi gakanaw hessa si7abike” yaagis.

27 Hessafe guye, Abrahaamey dorsatanne miizata ehidi, Abimelekes immin, enti nam7ay caaqidosona. 28 Abrahaamey laapun uzzo dorsata wudiyape shaakis; 29 Abimelekey Abrahaame, “Ha neeni dumma shaaka wothida laapun uzzo dorsata ayis shaakadii?” yaagidi oychis.

30 Abrahaamey, “Taani ha haatha olla bookidaysas marka gidana mela, ha laapun uzzo dorsata taape eka” yaagis.

31 Hessan he nam7u asati caaqida gisho, he bessay Barsaabe (Caaqo Haatha Olla woyko Laapun Haatha Olla).

32 Barsaaben caaquwa caaqidaape guye, Abimelekeynne iya toora moconay Fikooli dendidi, Filisxeeme biitta simmidosona. 33 Abrahaamey Barsaaben tamarsiik geetetiya mithi tokis. Hessan Godaa, Merina Xoossa xeegidi iyaw goyinnis. 34 Abrahaamey Filisxeeme biittan daro wode de7is.