1 Saara xeetanne laatamanne laapun laythi de7asu. 2 Hessafe guye, iya Kanaane biittan de7iya Qiriyaat-Arba (Kebroona) kataman hayqasu. Abrahaamey Saaris yeekisinne kayotis.

3 Yeeki simmidi, Abrahaamey ba mache aha matape dendidi bidi, Hiteta haysada yaagis; 4 “Taani hinte giddon imathe; ta mache aha mooganaw taw hinte gadiyape duufo bessi bayzerketi” yaagis.

5-6 Hiteti Abrahaame, “Godaw, nuuni odeysa si7a; neeni nu giddon wolqaama halaqa; neeni ne mache aha nu duufuwape nena lo77idason mooga; neeni ne mache aha mooganaw ba duufuwa oonika nena diggenna” yaagi zaaridosona.

7 Abrahaamey dendi eqidi, Hiteta sinthan ziggis. 8-9 I entako, “Hinte tana, ‘Ne mache aha mooga’ giiko, taani giyaba si7ite. Zohaara na7a Efroonas iya gadiya gaxan de7iya Makifeela geetetiya gongoluwa ta duufo oothanaw bayzana mela kumetha gaten nuna zal7iserketi” yaagis.

10 Hite addiya Efrooni he wode katama pengen shiiqida ba asa giddon uttis. Hiteti ubbay si7ishin, Abrahaameko yaagis; 11 “Hessada gidenna; ta godaw, ta odeysa si7a; taani gadiyaka iya giddon de7iya gongoluwaka new immayis; taani new iya ta asa sinthan immayis; neeni ne mache aha mooga” yaagis.

12 Abrahaamey he biitta asa sinthan zaari ziggidi, 13 asay si7ishin Efroona, “Ta odeysa si7arki! Taani he gadiya gate qanxana; neeni taape ekarki. Hessan taani ta mache aha moogana” yaagis.

14-15 Efrooni Abrahaameko zaaridi, “Ta godaw, taani odeysa si7a; gadey oyddu xeetu bira santime*Oyddu xeetu bira santime: Haysi oyddu kilo giraamenne bagga deexiya walahi bayna bira. kessana; shin hessi ne giddoninne ta giddon aybika gidenna; ne mache aha mooga” yaagis. 16 Abrahaamey Hiteti si7ishin, Efrooni gida gatiya ekis; he wode miishen oyddu xeetu bira santime Efroonas immis.

17 Yaati simmidi, Mamire katama matan Makifeelan de7iya Efroona gadey, yan de7iya gongoloynne he gadiyan de7iya mitha ubbay, 18 katama pengen shiiqida Hiteta ubba sinthan wogatho Abrahaame gade gidis.

19 Hessafe guye, Abrahaamey ba machiw Saara Kanaane biittan (Kebroona) geetetiya Mamire katama matan de7iya Makifeela geetetiya gade gongoluwan moogis. 20 Hessa gisho, he gadeynne yan de7iya gongoloy Hiteta sinthan higgiyan Abrahaames duufo gidis.