1 Yayqoobi dendidi ba ogiya bishin Xoossa kiitanchoti iyara gahetidosona. 2 Yayqoobi enta be7ida wode “Haysati Xoossa olanchota” yaagidi, he bessa Mahanayma (Nam7u guta) gidi sunthis.

3 Yayqoobi Edoome biittan Sayre giya bessan de7iya ba isha Eesaweko kiita baape sinthe kiittis. 4 I enta, “Hinte ta godaa Eesawes gaanabay haysa, ‘Taani ne aylley Yayqoobi, ha77i gakanaw Laaba matan gam7as. 5 Taw miizi, harey, dorsinne deeshi, adde aylletinne macca aylleti de7oosona. Ha7i taani ha kiita ta godaa sinthan saba demmandinasha gada kiittas yaagis’ yaagite” yaagidi kiittis.

6 Kiitetidaysati Yayqoobako simmidi, “Nuuni ne isha Eesaweko bida. Ika qassi neera gahetanaw yees. Iyara oyddu xeetu asay de7oosona” yaagidosona.

7 Yayqoobi daro babidi baara de7iya asa nam7u cugan shaakis. Ba dorsa, deesha, miizanne gimaleta nam7u cugan shaakis. 8 I, “Eesawey yidi issi cuga oliyaba gidiko, attida cugay kessi ekana” gidi qopis.

9 He wode Yayqoobi haysada yaagidi woossis, “Abeeti Godaw, ta aawa Abrahaame Xoossaw, ta aawa Yisaaqa Xoossaw, tana, ‘Ne biitta, ne dabbotako simma, taani new lo77oba oothana gidayso, tana si7arki’, 10 neeni ne aylliyas keehidabasinne ammanetetha ubbaas taani bessona asi. Taani Yordaanose shaafa pinniya wode taw issi xam7a xalaali de7ees; shin ha7i taani nam7u cuga godaa gidas. 11 Taani nena woossayis ta isha Eesawe kushepe tana ashsha. I yidi, tananne aayeta enta naytara dhaysona aggenna gada yayyayis. 12 Shin neeni tana, ‘Taani new tuma lo77oba oothana. Taani ne sheesha taybanaw danda7etona abba shafeda oothana’ gidaysa qopa” yaagis.

13 He gallas qamma I yan aqis. Baw de7iyaba ubbaafe ba isha Eesawes immanaba qoridi kessis. 14-15 I, nam7u xeetu macca deeshatanne laatamu deesha marazeta, nam7u xeetu macca dorsatanne laatamu dorsa marazeta, hastamu dhanthiya gimaleta enta maratara, oytamu macca miizata, tammu korma boorata, laatamu macca haretanne tammu adde hareta qoridi kessis. 16 Hessata wuden wuden shaakidi ba aylletas immidi, “Taape sinthe bidi wudiya wudiyape haahon haahon laaggite” yaagis.

17 Sinthan kaaletheysa, “Ta ishay Eesawey neera gahetidi, ‘Neeni oodesee? Neeni aw bay? Ne sinthan de7iya mehe ubbay oodebayee?’ yaagidi oychiko, 18 ne iyako, ‘Haysati ne aylliya Yayqoobasa, I ta godaa Eesawes immanaw yeddidaysata. Ika nuupe guyera yees’ yaaga” yaagidi kiittis.

19 Qassi nam7anthuwa, heedzanthuwanne wudiya kaalliya harata ubbaa, “Hinte Eesawera gahetiya wode haysada geeta; 20 ‘Ne aylliya Yayqoobi nuupe guyera yees’ goonna aggofite” yaagidi kiittis. I, “Taani immanaw sinthe yeddidaysan iya irxisana. Ooni eri hessafe guye taani iyara gahetiya wode I tana moki ekana” yaagidi qopis. 21 Hessa gisho, ba immanaba baape sinthe yeddis. Shin I ba huuphen he gallas qamma yan aqis.

22 He qamma Yayqoobi dendidi, ba nam7u macheta, ba nam7u aylleta, ba nayta tammanne issota ekidi, Yaaboqa shaafa pinnis. 23 I enta shaafa pinthi simmidi baw de7iyaba ubbaa pinthidi yeddis. 24 Shin Yayqoobi barka guye attis.

He wode issi asi sa7i wontana gakanaw iyara baaxetishe aqis. 25 He uray iya xoonanaw danda7onaysa be7ida wode Yayqoobas bulxiya bochin, iya bulxey kesuwape keyis. 26 Yaatin uray iya, “Sa7i wontana haniya gisho, tana yedda” yaagis.

Shin Yayqoobi, “Neeni tana anjonna nena yeddike” yaagis.

27 Uray, “Ne sunthay oonee?” yaagidi oychis.

I zaaridi, “Yayqooba” yaagis.

28 Uray, “Neeni Xoossaranne asara baaxetada xoonida gisho, hizape ne sunthay Yayqooba geetetofo, Isra7eele (Xoossara baaxetis) geeteto” yaagis.

29 Yayqoobi uraa, “Ne sunthay oonee?” yaagidi oychis.

Shin uray, “Neeni ta suntha ayis oychay?” yaagidi iya anjis.

30 Hessa gisho, Yayqoobi, “Taani Xoossa som7on be7as shin paxa de7ayis” yaagidi, he bessa Phin7eela (Xoossa som7o) gidi sunthis. 31 I Phin7eelape dendiya wode iya bolla xalqey dolis. Iya bulxe kessay sakiya gisho dogees. 32 Yayqooba bulxey wodire ashuwa matan boshetida gisho, Isra7eele asay mehes bulxe asho hachi gakanaw mookonna.