1 Hessafe guye Xoossay Yayqooba, “Dendada pude Beetele keyada yan de7a. Neeni ne isha Eesawepe baqatida wode new qoncida Xoossas yan yarsho bessi giigisa” yaagis.

2 Hessa gisho, Yayqoobi ba soo asaanne iyara de7eyisata ubba, “Hinte giddon de7iya allaga xoossata diggite. Hintena geeshshite, hinte ma7uwa laammite. 3 Haysafe dendidi pude Beetele boos. Ta metuwa gallas taw si7ida, taani bida bessa ubban taara gidida Xoossas taani yan yarsho bessi giigisana” yaagis. 4 Enti bantaw de7iya allaga xoossata ubbaanne banta haythan aathida worqa ubba kessidi Yayqoobas immidosona. Yayqoobi hessata Seekeman de7iya wolaa garsan moogis.

5 Hessafe guye, Yayqoobinne iya adde nayti dendidi biyade enta yuushuwan de7iya asa bolla Xoossa yashshay wodhida gisho entana kaallidi oykanaw oonika danda7ibeenna.

6 Yayqoobinne iyara de7iya asa ubbay Kanaane biittan de7iya Beetele geetetiya Looza gakidosona. 7 Yan I yarsho bessi giigisis. I he bessa El-Beetele (Beetele Xoossa) gidi sunthis. I ba ishaape baqatidi biya wode Xoossay iyaw qonciday he bessaana.

8 Irbiqa dichiya Diboora yan hayqasu. Beetelepe garsara de7iya wolaa garsan iya moogetasu. Hessa gisho, he mitha sunthay Alon-Bakute (Yeeho Wola) geetetis.

9 Yayqoobi Masephexoomepe simmidaape guye, Xoossay iyaw zaari qoncidi iya anjis. 10 Xoossay, “Ne sunthay Yayqooba. Shin hizape neeni Yayqooba geetetaka, ne sunthay Isra7eele geetetana” yaagidi iya “Isra7eele” gidi sunthis.

11 Qassi Xoossay Yayqooba, “Taani Ubbaa Danda7iya Xoossa. Neeni yeleta, dara. Dereynne kawotethati neepe keyo. Kawotika ne gulbatape keyo. 12 Taani Abrahaamesinne Yisaaqas immida biitta, new immana. Neepe guye taani ha biitta ne sheeshas immana” yaagis. 13 Xoossay iyara odetida bessaafe pude keyis.

14 Yayqoobi Xoossay iyara odetida bessan qofisiya shucha mala essidi iya bolla woyniyanne zayte tigis. 15 Yayqoobi Xoossay iyara odetida bessa “Beetele” gidi sunthis.

16 Enti hessafe guye, Beetelepe dendidi bidosona. Enti Efraata gakanaw guuthu attishin, Raheelo iqethi oykin daro waayetasu. 17 Iqethay iyo waaysida wode iyo yelisiyara, “Babofa; haysika adde na7a” yaagasu. 18 Shin iya hayqos matada shempoy keyana hanishin, ba na7a Benoona (Meto na7a) gada sunthasu. Shin iya aaway Biniyaame (Ta ushacha) gidi sunthis.

19 Hessafe guye, Raheela hayqa aggasu. Beeteleme geetetiya Efraata efiya ogiya gaxan moogetasu. 20 Yayqoobi I duufuwa bolla hawulte shucha essis. He hawultey hachu gakanawuka Raheeli duufuwa erisees.

21 Isra7eeley hessafe dendidi Edera gimbiyafe hefinthan ba dunkaaniya tokis. 22 Isra7eeley he biittan de7ishin, Robeeli ba aawas yelida aylle Baalira aqis. Isra7eeley he odaa si7is.

Yayqooba adde nayti tammanne nam7a. 23 Liya nayti Yayqooba bayra na7a Robeela, Simoona, Leewe, Yihuda, Yisakooranne Zabloona. 24 Raheeli adde nayti Yoosefanne Biniyaame. 25 Raheeli aylle Baali adde nayti Daanenne Niftaaleme. 26 Liya aylle Zalafa adde nayti Gaadenne Aseera. Ha nayti Yayqoobas Masephexoomen yeletida adde nayta.

27 Yayqoobi Kebroona geetetiya Qiriyaat-Arba matan Mamiren de7iya ba aawa Yisaaqa soo bis. He bessay kase Abrahaameynne Yisaaqi de7ida bessaa. 28 Yisaaqi xeetanne hospun tammu laythi de7is. 29 I daro wodiya de7idi lo77o cimidi, hayqidi ba mayzatan gahetis. Iya nayti Eesaweynne Yayqoobi iya moogidosona.