1 Yayqoobi iya aaway Yisaaqi de7ida Kanaane biittan de7is.

2 Yayqooba yeletetha taarikey haysafe kaallidi xaafetidaysa.

Yoosefi tammanne laapun laytha na7a gidida wode ba aawa machetape, Baalipenne Zilpafe yeletida ba ishatara mehe heemmees. I ba aawas ba ishati oothida iitabata odees.

3 Isra7eeley Yoosefa cimidi yelida gisho, ba hara adde nayta ubbaafe aathidi dosees. Hessa gisho, iyaw alleeqetida ma7o giigisis. 4 Iya ishati enta aaway iya entafe aathidi doseysa be7ida wode iya ixidosona. Mal7o qaalaka iyako odetanaw danda7ibookona.

5 Issi wode Yoosefi amuho amuhidi, ba ishatas odin enti iya kaseysafe aathidi ixidosona. 6 I entako, “Taani amuhida amuhuwa si7ite. 7 Nuuni gaden giste mirqishin ta mirqey dendidi luule eqis. Hinte mirqeti yuuyi aadhidi ta mirqiyas ziggidosona” yaagis.

8 Iya ishati, “Neeni nu bolla kawotada nuna haaranaw qopay?” yaagidi oychidosona. Enti iya amuhuwa gishonne iya odaa gisho, kaseysafe aathidi ixidosona.

9 Qassika Yoosefi hara amuho amuhidi ba ishatas odis. “Heko, taani hara amuhoka amuhas. He amuhuwan awi, ageeninne tammanne issi xoolintoti taw ziggoosona” yaagis.

10 Ba ishatas odida amuhuwa ba aawas odida wode iya aaway, “Haysi waanida amuho? Tuma taani, ne aayanne ne ishati yidi, ne sinthan zigganeyee?” yaagidi hanqetis. 11 Iya ishati iya qanaatidosona, shin iya aaway he odaa ba wozanan wothis.

12 Issi gallas iya ishati Seekeman banta aawa meheta heemmanaw bidosona. 13 Isra7eeley Yoosefa, “Ne ishati Seekeman meheta heemmeysa eraasa. Haaya, taani nena entako kiittana” yaagis.

Yoosefika, “Ero” yaagis.

14 I iyako, “Bada ne ishatinne mehey saro gideysa be7ada entaba taw yada oda” yaagidi Yoosefa Kebroona zangaarape kiittis.

Yoosefi kiitetidi Seekema bis. 15 Yan demba bessan enta koshshan yaa haa simeretishin, issi asi iya demmidi, “La na7aw, ay koyay?” yaagidi oychis.

16 I, “Ta ishata koyayis; enti mehiya heemmiya bessaa be7idaako, hayyana taw odarkii” yaagis.

17 Uray, “Haysafe bidosona; enti, ‘Nuuni Dootane baana’ gishin si7as” yaagis. Hessa gisho, Yoosefi ba ishata geedo kaalli bidi, enta Dootanen demmis.

18 Shin I haahon de7ishin, enti iya be7idosona. I entako gakonna de7ishin, wodhanaw iya bolla maqetidosona. 19 Enti issoy issuwako, “Hini be7ite, amuhuwa goday yees. 20 Haayite, iya wodhidi, ha ollatape issuwan yeggoos. Hessafe guye, ‘Do7i iya mis’ yaagana. Yaatidi, iya amuhuwa wursethaa be7ana” yaagidosona.

21 Robeeli hessa si7ida wode, enta kushepe iya ashshanaw koydi, “Iya wodhoko; 22 iya wodhanaape mela biittan de7iya ha ollan yeggite; iya bolla kushe wothofite” yaagis. Robeeli hessa giday, iya enta kushepe ashshidi guye aawako zaaranaasa.

23 Yoosefi ba ishatako gakida wode I ma77ida alleeqetida ma7uwa iyape qaari ekidosona. 24 Iya efidi haathi bayna mela ollan yeggidosona.

25 Enti kathi mishin hassayoona Isma7eela asati Galadape Gibxe bishin, dhoqu gidi be7idosona. Enti banta gimaleta bolla sawuwa, madiyanne karbiya caanidosona.

26 Yihudi ba ishata, “Nuuni nu isha wodhidi, iya suuthaa qottiko nuna ay maaddanee? 27 Haayite, iya Isma7eela asaas bayzoos. I nu isha, nu suuthunne nu asho gidiya gisho iya bolla nu kushiya wothoko” yaagis. Iya ishati iya odaa ma77idosona. 28 Hessa gisho, Midiyaame biitta zal7anchoti yaara aadhishin, iya ishati Yoosefa ollafe kessidi, Isma7eela asatas laatamu bira santimen bayzidosona. Enti Yoosefa Gibxe biitta efidosona.

29 Robeeli ollaako simmidi, Yoosefi yan baynaysa be7ida wode, azzanidi ba ma7uwa daakis. 30 I guye ba ishatako bidi, “Na7ay yan baawa; hiza, taani ay hanosha?” yaagis.

31 Enti Yoosefa ma7uwa ekidi, issi deeshe shukidi, he suuthan naaqidosona. 32 Alleeqetida iya ma7uwa banta aawako efidi “Nuuni haysa demmida; haysi ne na7a ma7uwakonne ane be7a” yaagidosona.

33 Yayqoobi ma7uwa eridi, “Haysi ta na7aa ma7uwa; ta na7aa do7i mis. Yoosefi tumaka zaazetis” yaagis.

34 Yayqoobi azzanidi, ba ma7uwa peedhis. Kayo ma7o ma7idi, ba na7aas daro gallas yeekis. 35 Iya adde naytinne macca nayti ubbay iya minthethanaw yidosona. Shin I minettonna ixidi, “Akay, taani yeehoy yeehoshin duufo gelana” yaagidi, Yoosefas yeekis.

36 He wode Midiyaame biitta asati Yoosefa, Gibxe kawa moorinnatanne kawa naageysata halaqa gidida Phoxfaaras bayzidosona.