1 Yoosefi ba keetha kaapuwa, “Neeni ha asati tookanaw denda7ida keena enta ogoruwan kathi kuntha. Enta ubbaa miishiya enta ogoruwa doonan doonan yegga. 2 Yaatada wursetha kaaluwa ogoruwa doonan ta bira wancaanne I shammanaw ehida miishiya yegga” yaagidi kiittis. I Yoosefi gidaysada oothis.

3 Sa7i wontin he asati banta hareta ekidi baanaw dendidosona. 4 Enti he katamaape keyidi haaki boonna de7ishin, Yoosefi ba keetha kaapuwako, “Ha asata geedo kaalla. Neeni enta gakida wode entako, ‘Hinte ayis keeha iitan zaaridetii? 5 Haysi ta goday uyeysanne xuuraba demmiya wanca gideysa ereketii? Ayis kaysotidetii? Haysi hinte oothidabay daro iitaba’ yaaga” yaagis.

6 Yaatin I enta geedo kaali gakidi, he gidaysadaka entaw odis. 7 Shin enti, “Godaw haysa melaba ayis odetay? Hessa melaba oosoy nuupe ne aylletape haako. 8 Nuuni hari attoshin, nu ogoruwa doonape demmida miishiya Kanaane biittafe guye zaaridi new ehidaysa eraasa. Ne godaa keethaafe nuuni worqa woyko bira waati kaysotanee? 9 Ne aylleta giddon he wancay bentida uray hayqo. Qassi attida nuka nu godaas aylle gidana” yaagidosona.

10 I entako, “Hessa gidiko lo77o, hinte gidaysada hano. Wanca ekida oonika ta aylle gidana; attidaysati saron beeta” yaagis.

11 Hessafe guye, enti ellesidi banta ogoruwa ogoruwa sa7an wothidi billidosona. 12 He kaapoy ubbaafe bayra ogoruwape doomidi wursetha kaaluwaysa gakanaw koyidi, he wanca Biniyaame ogoruwape demmis. 13 Hessan enti azzanidi, banta ma7uwa peedhidosona. Banta ogoruwa hareta bolla caanidi, guye katama simmidosona.

14 Yihudi ba ishatara Yoosefako geliya wode Yoosefi son de7ees; enti iya sinthan sa7an gufannidosona. 15 Yoosefi entako, “Hinte aybi palaba oothidetii? Ta mela asi xuuraba demmanaw danda7eysa hinte ereketiyee?” yaagis.

16 Yihudi, “Ta godaas nuuni ay gaanee? Nuuni ay odetiyabay de7ii? Nu xillotetha nuuni waati bessanee? Xoossay ne aylleta naaquwa qoncisis. Hiza nuunika he wancay bentida urayka ta godaas aylle gidida” yaagis.

17 Shin Yoosefi, “Hessa melaba oothanaysi taape haako; ta wancay iyape bentida ura xalaali ta aylle gidana. Hanko hinte hinte aawako guye saro simmite” yaagis.

18 Yihudi iyako shiiqidi “Ta godaw, neeni kawa mela gidikoka taani neera odetanaw nena woossayis. Tana ne aylliya hanqetofa. 19 Neeni ta goday nuna ne aylleta, ‘Hintew aawi woyko ishi de7ii?’ gada oychadasa. 20 Nuunika, ‘Nuus cimida aaway de7ees. I cimatethan yelida kaalo na7ayka de7ees. He na7aa ishay hayqis, ba Aayen issino, iya aaway iya daro dosees’ yaagida.

21 “Neeni nuuko, ‘Taani iya be7ana mela taw ehite’ yaagadasa. 22 Yaatin nuuni, ‘He na7ay ba aawape shaaketanaw danda7enna; shaaketiko iya aaway hayqana’ yaagida. 23 Shin neeni, ‘Hinte kaalo ishay hintera yoona ixiko, ta ayfiya zaari be7eketa’ yaagadasa. 24 Nuuni nu aawako simmidi bida wode ne gidaysa iyaw odida.

25 “Nu aaway, ‘Guye bidi guutha kathi shammite’ yaagin, 26 nuuni iyako, ‘Nu kaalo ishay nuura boonna ixiko, ura ayfiya be7anaw danda7oko. Nu kaalo ishay nuura biyaba gidiko, nuuni yaa baana’ yaagida.

27 “Yaatin nu aaway nuna, ‘Ta machiya Raheela taw nam7u adde nayta yelidaysa hinte ereeta. 28 Entafe issoy taape shaaketidi bin, iya do7i moonna aggenna yaagas. Hachi gakanaw taani iya be7abike. 29 Haysa qassi taape hinte shaaki efin, iitabay iya gakiko, hinte tana ta cimatethan afuthu muzishe ta hayquwa matayeta’ ” yaagis.

30-31 “Hessa gisho, ha77i taani guye ta aawako biya wode Biniyaamey taara baanaw bessees. Ta aaway na7aa shempofe dosiya gisho, na7ay nuura baynaysa be7iko hayqana. Nuuni ne aylleti nu aawa cimatetha afuthan duufo gelsoos. 32 Taani ne aylley na7aa ta waasetethan ekas. Qassi, ‘Ta aawaw, taani iya new saro zaarada ehonna ixiko ta de7uwa ubban ne baadethay tana gako’ yaagas.

33 “Yaaniya gisho, taani ne aylley na7aa gisho aylletada haysan attana na7ay ba ishatara guye simmo. 34 Na7ay bayna taani waanada guye ta aawako simmanee? Tana ta aaway seeletana seela bessofo” yaagis.