6
Isra7eeley Simmibeenna
Isra7eele asay, “Haayite! Ane Godaako simmoos. I nuna mentherethis, shin I nuna koolana; I nuna madunxisis, shin I nu madunthaa qachana. Nam7u gallasape guye I nuna pathana; heedzantho gallasan nu iya sinthan daana mela nuna denthana. Ane Godaa eroos; iya eranaw minthidi kaalloos. Xalqey doleysada I qoncana; torche iri yeysada I nuuko yaana” yaagidosona.
Goday, “Ta hintena Efreema asaa waato? Ta hintena Yihuda asaa waato? Hinte siiqoy wonta xaasa mela; ellesidi dhayiya aka mela. Hessa gisho, taani nabeta baggara hintena qanxerethas; ta doonape keyida qaalan hintena wodhas. Ta pirday hinte bolla poo7oda wagaggi gaana. Ta yarsho gidonashin maarota koyayis; xuussa yarsho gidonashin Xoossaa ero koyayis.
“Shin enti Addaameda, caaqo menthidosona; yan taw ammanetona ixidosona. Galada katamay suuthi gukiya iita ooso oothiya asay kumida katama. Pangati ase wodhanaw qosetidi naageysada kahineta cugay hessada naagoosona. Seekema katamaa efiya ogiyan naagidi ase wodhoosona; enti yeellaya worandzo ooso oothosona. 10 Taani Isra7eele asaa giddon daganthiyaba be7as. Efreema giddon laymatethi de7ees; Isra7eeley tunis.
11 “Yihuda, taani ta asaa di7uwa zaariya wode new qassi caka wode giigisas.