Isayaasa Maxaafa
Gaatha Qofa
Ha maxaafay, K.Y.S. 800 laytha heeran Yerusalaamen de7ida, bayra nabe gidida Isayaasa sunthan xeegetees. Ha maxaafa, heedzu gita bessan shaakidi be7anaw danda7etees.
1. Shempo 1—39 gakanaw de7iya kifiley, wolqaama gidida Asoorey, Yihuda kawotetha waatidi qohidako odees. Yihuda hessa mela meton yeggiday, Asoore kawotetha minotethi gidonashin, asa nagaranne Xoosse kiitetonna ixuwa. Asaynne enta ayseysati, xillotethinne suure pirdi kumida de7oko simmana mela nabey qoncen qofisees. Xoosse kiitetetha ixoy gamma dhaysidi, dhayoko kaaletheysa erana mela akeekisees. Isayaasi yaana laythan, alamiya polo sarotethan aysiya Dawita koche gidida kawoy yaanaysa sinthatidi odis.
2. Shempo 40-55 gakanaw de7iya kifiley, Yihuda asay di7etidi Babiloone bida wode, enta duussay kundidaysanne enti ufaysi qanxida wodetaba odees. Nabey, Xoossay ba asaa la77a kessanaysanne enti ooratha duussi doomana mela enta Yerusalaame zaariya wodey matidaysa odis. Ha shempota giddon daro keydi bentiya kaara qofay, Xoossay taarike Goda gideysanne kawotethata ubbaas halchida halchuwa, Isra7eele baggara polanaw de7eysa akeekisees. Ha kifiliyan, nabey odida harabay, oyddu Xoossa aylliya mazmureta (Isa 42:1-4; 49:1-6; 50:4-9; 52:13—53:12).
3. Shempo 56-66 gakanaw de7iya kifiley, di7ope Yerusalaame simmida asaynne Xoossay Isra7eele asaas gelida qaalay poletaneko geeshshidi eranaw malla koya deriyaba oykis. Enti bayrayidi oothana mela koyetida oosoti xillotethi, suure pirda, Sambaata boncho, yarsho shiishonne qanxonna woosa.
Ha kifiliyan eretida nibaabey shempoy 61:1-2 bolla de7iya qaala. Ika, “Ubba Haariya Godaa Ayyaanay ta bolla de7ees; manqotas lo77oba odana mela Goday tana tiyis. Wozani meqidaysata koolana mela, di7etidaysata la77a kessana melanne qashetidaysata billana mela Goday tana kiittis” yaagees.
Maxaafa Ayfe Qofata
Pirdanne hanqo tinbiteta (1:1—35:10)
Yihudasinne Isra7eeles odetida kiitata (1:1—5:30)
Isayaasa kiitetetha (6:1-13)
Yaana Kiristoosaba odetida tinbiteta (7:1—12:6)
Allaga kawotethata bolla odetida tinbiteta (13:1—23:18)
Meto giddon de7iya asaas ufaysi de7ees (24:1—27:13)
Makallanchoti pirdetana (28:1—35:10)
Hizqiyaasara gahetida taarike (36:1—39:8)
Xoossay ba asaa ashshananne zaarana (40:1—48:22)
Waaye ekanaw de7iya aylliya (49:1—53:12)
Xoossay ba caaquwa naagees (54:1—59:21)
Sinthafe yaana Yerusalaame bonchuwa (60:1—66:24)
1
1 Ooziyani, Iyo7atami, Akaazinne Hizqiyaasi Yihudan kaalli kaallidi kawotida wode Amoxe na7ay Isayaasi Yihudabaanne Yerusalaameba be7ida qoncethay haysa.2 Kawo 15:1-7; 15:32—16:20; 18:1-20; 2 Taari 26:1—32:33.
Si7onna Dere
2 Saloto si7ite; sa7aw hayza si7a;
Goday haysada yaagees;
“Ta nayta yelada dichas;
shin enti taw makallidosona.
3 Boori ba godaa erees;
hareyka bana haaridaysa zadaluwa erees.
Shin Isra7eeley erenna;
ta asay akeekenna.
4 Hinteno, nagarancho kawotethato,
bala ooson deexidaysato,
iitaa oothiya yeletethato,
tuna oosos imetida nayto,
Godaa aggidaysato,
hintena ayye!
Isra7eele Geeshshaa kadhideta;
iyaw zoko zaarideta.
5 Makalla bolla makalla ayis gujeetii?
Ayis zaari zaari shoceteetii?
Hinte huuphey hargetis;
hinte wozanay daaburis.
6 Huuphe binaanape toho xugunthi gakanaw payyatethi baawa;
madunthi, kixinne dhuusi ma7is.
Enti giiybookona, woyko meecetidi qashetibookona
woyko zayten tiyetidi looxikbookona.
7 “Hinte biittay oxis;
hinte katamati taman xuugetidosona.
Hinte be7ishin hinte goshsha allagati ekana;
imatha asati hinte biitta quu7e kessana.
8 Yerusalaamey woyne gaden de7iya shaqarada,
leehe giddon de7iya gaabbadanne
morken teqetida katamada hanada attana.
9 Ubbaafe Wolqaama Goday nuus guutha koche ashshonaako
nuuni Soodomenne Gamoora katamaada hananashin”Medhe 19:24; Roome 9:29. yaagis.
10 Hinteno, Soodome halaqato, Godaa qaala si7ite!
Hinteno, Gamoora asaw, nu Xoossa higgiya si7ite!
11 “Hinte yarsho daroy taw ay oothii?
Hanno gakanaw hinte taw shiishida urge dorsaanne
modho mehe xuussa yarshoy taw gidana.
Taani kormata, dorsa urgetanne
deeshata suuthan ufaytike.
12 Hinte ta sinthan bentanaw yaa wode
ta keethaa dabaaba hinte yedhana mela oone oychiday?
13 Hada yarshuwa eheysa aggite!
Hinte cuyisiya ixaaney tana shaattees.
Ageena xeeron hinte bonchiya gallasa,
Sambaatanne iitatethan hinte shiiqiya shiiquwa taani ixayis.
14 Ageena xeeron hinte bonchiya gallasaanne
hinte ba7aale gallasata taani ixas;
enti taw tooho gididosona;
taani enta tookanaw danda7ike.
15 Hinte kushe miccidi tana woossiya wode
taani ta ayfiya hintefe genthana.
Hinte kushey suuthan kumida gisho
hinte darsi woossikoka taani si7ike.
16 Meecetite; hintena geeshshite;
hinte iita oosuwa ta sinthafe diggite;
gene hanuwa aggite.
17 Lo77oba ooso tamaarite;
xillo pirdaa koyite.
Un7etidaysata ashshite; yi7otas eqite;
am7etas mootetite”
yaagees Goday.
18 “Haayite; ane woli ammanthoos. Hinte nagaray baara biittada zo7ikoka, shachada booxana; suuthada zo7ikoka puutoda booxana. 19 Hinte ero gidi taw kiitetiko biitta anjuwa maana. 20 Shin hinte ixas gidi makalliko, mashshan meetetana” yaagees Goday ba doonan.
21 Ammanetida katamiya waanada layma gidadee? Kase suuretethinne xillotethi I giddon kumis, shin ha77i shempo wodheysati I giddon de7ees. 22 Ne biray baltis; ne mal7o woyney haathan yeletis. 23 Hinte halaqati makallanchotanne kayso lagge gididosona; enti ubbay wodhaafe doseysatanne kushe xeelleyisata. Yi7otas suure pirdokona; am7eta waasuwa si7okona.
24 Hessa gisho, Goday, Ubbaafe Wolqaama Xoossay, Isra7eele Wolqaamay, haysada yaagees; “Ha77i taani ta morketa bolla ta hanquwa gussana; taara eqeteyisata halo keyana. 25 Taani ta kushiya ne bolla zaarana; ne baltetha geeshshana; ne tunatetha ubbaa neepe diggana. 26 Taani beniysada ne halaqata, koyroysada ne zoranchota denthana. Hessafe guye, neeni ammanetida biitta; xillotetha Katama geetetana” yaagees.
27 Xiyooney suure pirdan, banta nagara paaxeysatika xillotethan wozetana. 28 Shin makallanchotinne nagaranchoti issife meqana; Godaa aggeysati dhayana. 29 Hinte ufaytida yarsho wolan yeellatana; hinte doorida kooran kawuyana. 30 Hinte haythi qoqofetidi wurida woladanne haathi dhayida atakilte bessada gidana. 31 Bana mino gey buuxa gidana; iya oosoyka pol7u gidi to7iya tama gidana; enti issife xuugetana; he tama toysana asi baawa.