1 Heko, Goday, Ubbaafe Wolqaama Xoossay, minjanne maado ubbaa, katha minjanne haatha minja ubbaa Yerusalaamepenne Yihudape diggana. 2 Minotanne olanchota, daynnanne nabiya, biteysanne cima, 3 toora moconanne deriya ayseysa, zoreysa, hiillanchuwanne qara marota ubbaa diggana.

4 Taani yooga nayta enta halaqa oothana; guutha nayti enta haarana. 5 Asay asa bolla, shooroy shooruwa bolla dendidi, issoy issuwa sugana. Na7atethay cima bolla, kadhetidaysi bonchetidaysa bolla dendana.

6 Issi asi ba aawa keethan de7iya ba ishatape issuwa oykidi, “New ma7oy de7ees; neeni nuus halaqa gida; ha laaletida bessaa aawatethan eka” yaagana.

7 He gallas, I ba qaala dhoqu oothidi, “Taani maaddike; ta son kathi woyko ma7oy baawa; hinte bolla tana shuumopite” yaagana.

8 Yerusalaamey gandigarasu; Yihudi kundanaw matasu; enti banta odaaninne banta oosuwan Godaa bolla dendidi, iya bonchuwa toochidosona. 9 Enta som7oy enta bolla markatees; enti banta nagaraa Soodome asaa mela awaajosona; banta nagaraa qottokona. Enti banta bolla dhayo ehida gisho enta ayye!

10 Enti banta oosuwa ayfiya maana gisho, xillotas lo77o gidana gada oda. 11 Enti banta kushe oosuwa gatiya ekana gishonne dhayoy enta bolla yida gisho iitata ayye! 12 Na7atethati ta asaa un7ethoosona; maccasati enta haaroosona. Ta asaw, hintena kaaletheysati balethoosona; hinte biya ogiyape kare kessoosona.

13 Goday ba araatan uttis; asaa bolla pirdanaw giigetis. 14 Goday deriya cimatanne kaaletheyisata pirdanaw shiishidi, “Ta woyne gadiya dhaysiday hintena; manqotape bonqidaysi hinte son de7ees. 15 Hinte ta asaa ayis tincherethetii? Manqota som7uwa ayis kareethetii?” yaagees Ubbaafe Wolqaama Goday.

16 Goday, “Xiyoone maccasati otortidosona; banta qoodhiya adussidi, banta ayfiyan qam7otoosona; banta hemethaa laammidi, banta toho albuwa giirsishe hemetoosona. 17 Hessa gisho, Goday Xiyoone maccasa huuphiya dhuusan kunthana; Goday enta huuphiya bo77ayana” yaagees.

18 He gallas Goday Xiyoone maccasa alleeqota, hessika, toho albuwa, shaashiya, qoodhe worqaa, 19 haytha worqa, kushe ambaare, som7o kama, 20 huuphe kama, qese santhalaata, dancuwa, shittuwa, gozdda, 21 siidhe worqa, biradhe migiduwa, 22 koyse ma7uwa, adussa ma7uwa, kaaba, borsa, 23 mastootiya, liinuwa, huuphe alleeqota, sharbiya ubbaa entafe ekana.

24 Shitto gisho xinqo, danco gisho wodoro, goofare gisho bo77a, koyse ma7o gisho kayo ma7o, lo77otetha gisho beeta gidana.

25 Ne asati mashshan, ne olanchoti olan hayqana. 26 Xiyoone pengeti yeekananne zeleelana; kayotada sa7an uttida maccasada hanana.