1 Gidoshin, waayetidaysatas hizape guye dhumenna. Beni wode Goday Zabloona biittanne Niftaaleme biitta kawushis. Shin sinthafe Medetiraane Abbaa ogiyan de7iya biittanne Yordaanose shaafape hefinthan de7iya Ayhude gidonna asay de7iya Galila biitta I bonchana.

2 Dhuman hemetiya asay wolqaama poo7o be7is; qassi hayqo dhuman de7eysatas poo7oy poo7is.

3 Neeni kawotethaa darsadasa; enta ufaysaa gujadasa. Asi kathi shiishiya wode ufayteysada woyko di7uwa shaakidi ekiya wode ufayteysada ne sinthan ufaytana. 4 Neeni Midiyaame biitta xoonidaysada enta deexo qambara, enta gannas giigida xam7anne enta un7etheyisata gumba menthadasa. 5 Olanchota caammaynne suuthan munuqetida ma7o ubbay taman xuugetana; tamas oysetho gidana. 6 Nuus na7i yeletis! Adde na7i nuus imetis! Kawotetha maati iya hashiyan gidana; iya sunthay, “Malaalisiya Zorancho, Wolqaama Xoossa, Merinaa Aawa, Sarotethaa Halaqaa” geetetana. 7 Iya kawotethaa dalgatethaasinne iya sarotethaas zawi baawa. Hachife doomidi, merinaa gakanaw suure pirdaaninne xillotethan minthanawunne essanaw Dawita araataninne iya kawotethan I kawotana. Ubbaafe Wolqaama Godaa qanaatey haysa oothana.Luqa 1:32-33.

8 Goday Yayqooba zeretha bolla pirda qaala kiittin, Isra7eele kawotethaa bolla wodhis. 9 Efreema asayinne Samaare katamaa asay haysa oothiday Godaa gideysa erishe, otoroninne ceeqon, 10 “Xuubepe keexetida keethati laaletidosona; shin nu zaaridi masetida shuchan keexana; boobba mithati qanxetidosona; shin nu enta bessan zigata laammana” yaagidosona.

11 Shin, Xoossay Rasoona morketa minthana; enta bolla ehana; entara eqetiya morketa enta bolla denthethis. 12 Dolohape Araameta, wulohape Filisxeemeta denthin, enti banta doona dooyidi, Isra7eele mittidosona. He ubban Godaa hanqoy simmibeenna; iya kushey dendida bessan de7ees.

13 Gidoshin, asay bantana shocidaysako simmibokona; Ubbaafe Wolqaama Godaa koybookona. 14 Hessa gisho, issi gallas Goday Isra7eelepe huuphenne goynaa, zamba daashshanne maqa qanxana. 15 Cimatinne bonchetidaysati huuphe; wordo tamaarsiya nabeti goyna. 16 Ha asaa kaaletheysati balethoosona; enta kaalleysatika baloosona. 17 Hessa gisho, Goday enta na7atethatan ufaytenna; yi7o naytasinne am7etas qadhetenna. Asi ubbay iitanne Xoosse eronnaysa gidana; ubbay ba doonan iitabaa odetees. He ubban Godaa hanqoy simmibeenna; iya kushey dendida bessan de7ees.

18 Tami kinchotenne agunthi meysada iitatethi xuuggees; siketida wori xuugetin, cuyay tuussada keyeysada keyees. 19 Ubbaafe Wolqaama Godaa hanquwan biittay xuugetana; asika tama oysethiyaba gidana; oonika ba ishaa ashshanaw qopenna. 20 Enti ushacha baggara bonqana, shin koshatana; enti haddirsa baggara maana, shin kallokona; enti banta yelida nayta maana. 21 Minaasey Efreema, Efreemika Minaase maana; enti issife gididi Yihuda biitta morkana. He ubban Godaa hanqoy simmibeenna; iya kushey dendida bessan de7ees.