1 Goday Yayqoobas qadhetana; Isra7eele zaaridi doorana; enta, enta buzo biittan wothana. Betanchoti entara issifana, Yayqooba soo asaara oyketana. 2 Kawotethati enta, enta biitta ehana. Isra7eele asay entana maccanne adde aylle oothidi Godaa biittan haarana. Enti bantana di7idaysata di7ana; bantana haaridaysata haarana.

3 Goday hintena, hinte un7aafe, metuwapenne hinte haaretida iita aylletethaafe shempisiya wode, 4 hinte Babiloone kawa bolla haysada yaagidi qelqisana. Un7etheysi waanidi aggidee? Iya hanquwa suulay waanidi attidee? 5 Goday kawotethata xam7aanne haareyisata gumba menthis. 6 Enti asaa zawi bayna hanquwan shocidosona; bantana xoonidaysata qanxonna un7ethishe de7idosona. 7 Shin biitta ubbay shempidi de7is; ufaysan yexis. 8 Hari attoshin, Libaanose zigatinne xiiddati kawa kundethan ufaytidi, “Neeni kawuyada kundidaape guye, nuna qanxanaw yey baawa” yaagosona. 9 Neeni yaa wode, Si7ooley nena mokanaw giigis; I kase biitta kaalethida asaa moytilleta, nena sarothana mela denthethees; qassi kase kawo gidida ubbaa enta araatape denthidi essees. 10 Enti ubbay haysada yaagana. “Heko neka nuuda wolqa dhayadasa; nu mela gidadasa.” 11 Kase diithi diixin sabetiya ne bonchoy ha77i Si7oole gelis. Ollathi neeni zin7iya hiixa; guxuney neeni ma7iya afila gidana yaagana.

12 Neno wonta na7aw, guura bakalaw, salope waana kundadii? Neno kawotethata kawushidayso waana qanxetada sa7an wodhadii?Qon 8:10; 9:1. 13 Neeni ne wozanan, “Taani salo keyana; ta kawotethaa araata Xoossaa xoolintotape bollara wothana; taani pudeha bagga gaxan shiiqo deriya huuphen uttanaMaato 11:23; Luqa 10:15.. 14 Taani shaarati de7iya dhoqa bessaafe bolla aadhana; taani, tana Ubbaafe Dhoqa Xoossaa daanisana” yaagadasa. 15 Shin neeni Si7oolen, hirki ciimmo ollan duge yegetadasa.

16 Nena be7idaysati, “Biitta qaathidaysi, kawotethata kokorsidaysi, 17 sa7aa biitta bazzo kessidaysi, sa7an de7iya katamata shiri yeggidaysi, ba qasho asata yeddonna ixidaysi haysee?” yaagidi tishshi oothidi xeellana.

18 Kawotethata kawoti ubbay ba duufon duufon bonchon zin7ana. 19 Shin neeni ixetida tasheda ne duufuwape gaxa holettadasa. Ne ahay mashshan hayqida ahaninne ollan de7iya shuchatako duge wodhidaysata ahan kametis. Neeni tohon yedhetida aha mela gidadasa. 20 Neeni ne biitta dhaysida gishonne ne asaa wodhida gisho entara moogetaka. Iitaa sunthay kochay merinaw xeegetofo. 21 Enti dendidi biitta laattonna; sa7a ubbaa katama xalaala oothonna mela enta aawata nagaraa gisho, iya nayta wodhanaw giigisite. 22 Taani “Enta bolla dendana; enta sunthaa, enta kochaanne enta yeletaa Babiloonepe dhaysana. 23 Taani Babiloone quxarey de7iya bessinne haathi eelliya bessi oothana; taani gado piton iya pittana” yaagees Ubbaafe Wolqaama Goday.

24 Ubbaafe Wolqaama Goday haysada yaagidi caaqis: “Taani halchidaysada hanana; taani qopidaysada poletana. 25 Taani Asoore asaa ta biittan mentherethana; ta deriya bolla iya yedhana. Iya qambaray enta bollafe, iya toohoy enta hashiyape kichana” yaagis. 26 Sa7a ubbaas qofetida qofay haysa; kawotethata ubbaa bolla micetida kusheyka haysa. 27 Ubbaafe Wolqaama Goday haysa qopida gisho iya digganaw danda7ey oonee? Iya kushey micetis; hessa guye zaaranaw danda7ey oonee?Isa 10:5-34; Nahi 1:1-3; Sofo 2:13-15.

28 Kawoy Akaazi hayqida laythi odetida qaalay haysa:2 Kawo 16:20; 2 Taari 28:27. 29 Hinteno Filisxeeme asaw, hintena shocida xam7ay me77ida gisho ufaytofite. He shoosha kochaafe hasoy keyana; iya kochay qassi xongetiya shooshi gidana.Ermi 47:1-7; Hiz 25:15-17; Iyyu 3:4-8; Amo 1:6-8; Sofo 2:4-7; Zaka 9:5-7. 30 Manqofe manqoti ta qooruwan heemetana; metootanchoti wopu gidi zin7ana. Shin taani ne kochaa koshan wursana; neepe attida guuthata wodhana.

31 Neno pengiyaw, yeeka! Neno katamaw, waassa! Hinteno Filisxeeme asaw, hinte ubbay hirgan til7ite! Pudeha baggafe cuyi keyidi yees; he cugaape duuxidi guye attey baawa. 32 He kawotethay kiitida asatas woygidi zaaranee? Goday Xiyoone keexin, qohetida asay I giddon qosetidi attiya bessi demmis.