1 Damasqoba Goday haysada yaagees: “Heko, hizape guye Damasqoy katama gidonnoshin, laaletha doore gidana.Ermi 49:23-27; Amo 1:3-5; Zaka 9:1. 2 Aroora katamati asi bayna baysa biitta gidana; yan mehey heemetana; enta yashshiyabay deenna. 3 Efreemape Miixati, Damasqofe kawotethay dhayana; Soorepe attida guuthati Isra7eele asaa bonchuwa mela gidana” yaagees Ubbaafe Wolqaama Goday.

4 “He wode Isra7eele bonchoy qaaretana; iya ordetethay gilqana. 5 Isra7eeley, kathi caki ekidi keyida goshsha gade mela gidana; woyko kathi caki simmin kallotida Raafayme zangaara mela gidana. 6 Shamaho qoqofi simmin, xeeran nam7u woyko heedzu ayfeti atteysada woyko issi yangiya bolla oyddu woyko ichashu ayfeti atteysada Isra7eelepe guuthati attana” yaagees Goday Isra7eele Xoossay.

7 He gallas asay bantana medhidaysako, banta ayfiyaka Isra7eele Geeshshaako zaarana. 8 Enti banta kushen giigisida yarsho bessaako xeellokona; Asheera eeqa misiliyas gidin, ixaane cuyisanaw enti banta kushen medhida yarsho bessa bonchokona.

9 He wode Isra7eele asaa gaason Hiwenne Amoore katamati laaletidaysada enta mino katamati laaletana; baysa gidana. 10 Hinte hintena ashshiya Xoossaa dogideta; hinte qoseti attiya zaalla qopibeketa. Hessa gisho, neeni lo77o mithaanne kare biittafe yida lo77o atakiltiya tokikoka, 11 he gallas enti diccidi gakana mela oothikoka, qassi neeni zerida wontethe enti ciiyakoka neeni ayfe demmaka. Iya bessan paxonna hargenne meto cakana.

12 Heko, abba beetada guummiya daro asaa, qassi wolqaama haathada waassiya kawotethata ayye! 13 Kawotethati daro haathada guummoosona; shin Goday enta seerana. Enti zumaa huuphen de7iya buure carkoy dentheysadanne gotey baana dentheysada enta denthidi haaho bessi laallana. 14 Sa7i qammiya wode enti dagammana; sa7i wontanaape sinthe enti dhayana. Nuna wolqan ekeysatanne bonqeyisata qaaday haysa.