1 Efreeman mathoteysatas qofiso kallacha gididaysa, aradda zangaara huuphiyan uttidaysa, iya bonchuwas alleeqo gidida shullida ciishshanne mathoyiya ushshay entaw nashetethas gidida katamaa ayye! 2 Heko, Godaas wolqaamanne mino gidida issoy de7ees. Goday iya shacha uushoda, dhaysiya gotedanne kixida wolqaama haathada mino kushiyan duge sa7an holana. 3 He mathotiya Efreema asaa otoruwa kallachay tohon yedhethana. 4 Aradda zangaara huuphen de7iya shullida ciishshay, iya boncho alleeqoy wodey gakanaape sinthe teerida balase ayfe mela gidana. Issi asi he balasiya be7iya wode ba kushen oykida mela mi aggees.

5 He gallas Ubbaafe Wolqaama Goday attida ba asaas boncho kallachanne alleeqo gidana. 6 I daynnatas suure pirdiya ayyaana, katamaa pengiyafe ola zaareysatas wolqa gidana.

7 Enti woyne ushshan biicotoosona; mathoyiya ushshan gandigaroosona. Kahineynne nabey mathoyiya ushshan biicotees; enti woyne ushshan yarkoosona; mathoyiya ushshan gandigaroosona. Qoncethi be7ishe baletoosona; pirdishe dhubetoosona. 8 Enti miya gayta ubbay cooshsha xalaala gidiya gisho, iitiboonna bessi baawa.

9 Enti haysada gaana: “I eratethaa oona tamaarsanee? Kiita ooddes qoncisanee? Buroo maathi paahetiya woyko dhanthi duuxida naytaseyee? 10 I, kiitta bolla kiitta, kiitta bolla kiitta; woga bolla woga, woga bolla woga; yan guutha han guutha” yaagana.

11 Shin Goday allaga qaalaninne imatha doonan ha asaas odana.1 Qoro 14:21. 12 I entako, “Haysi shempo bessi; daaburidaysa shempisite. Haysi shempi ekiya bessi” yaagis. Shin enti si7onna ixidosona. 13 Hessa gisho, enti bidi kundana mela, me77ana melanne xihen oyketidi baana mela Godaa qaalay entaw kiita bolla kiita, kiita bolla kiita; woga bolla woga, woga bolla woga; yan guutha han guutha gidana.

14 Hinteno, Yerusalaamen de7iya asaa haariya qelqiseysato Godaa qaala si7ite. 15 Hinte, “Nuuni hayqora caaqida; Si7oolera giigida; nuuni wordo nuus qota oothida gishonne malte kate oothida gisho, gadoy nuna bochonna aadhana” yaagidi ceeqeteta.

16 Hessa gisho, Ubbaa Haariya Goday, “Heko, taani al7onne dooretida baaso shuchaa Xiyoonen wothas; iyan ammaniya oonika yeellatenna.”Maz 118:22-23; Roome 9:33; 10:11; 1 Phex 2:6. 17 Taani suure pirdaa wadha wodoro, xillotethaa tumbe oothana. Hinte, “Nuus qota gida wordo shachay shocana; hinte nuus kate gida bessaa di7oy dhaysana” yaagees. 18 Hinte hayqora caaqida caaqoy laaletana; Si7oolera giigida giigoy minnenna. Gadoy yaa wode hinte iyan shocetana. 19 He gadoy yaa wode hintena ekidi baana; wonta wonta, qamminne gallas yaara aadhana; he aadhiya wode ubban hintena aggenna.

Ha kiita akeekoy hintew dagama xalaala immana. 20 Hinte qosetiya bessi hintew baawa; hinte zin7iya arsay hintew gidenna; hinte ma7iya afilay hintena gakenna. 21 Paraziima zuma bolla Goday oothidaysada ba oosuwa, ba imatha oosuwa, hessika ba ooratha oosuwa oothanaw dendana. Gaba7oona zangaaran oothidaysada hanqana.Iyya 10:10-12; 2 Same 5:20; 1 Taari 14:11. 22 Goday, Ubbaafe Wolqaama Xoossay, biitta ubbaa bolla dhayo ehanaw awaajidaysa ta si7ida gisho hinte qashoy minnonna mela qelqiseysa aggite.

23 Hinte haytha haa yeggidi, ta odeysa si7ite; ta odaa akeekite. 24 Kathi zeranaw goyiya goshshanchoy ubba wode goyishe de7iyee? Qassi ubba wode gaggahiya wodhishenne liiqisishe de7ii? 25 Gadiya liiqisidi, kareetha sawanne okashe, banganne giste, banga iya do7uwan, iya bessan bessan zerees gidennee? 26 Ha hiilla iya Xoossay iya erisesinne tamaarsees. 27 Kareetha sawonne okashe shocu wodhan qoxenna; shin guutha xam7an shocetees. 28 Katha ayfey buketeesipe attishin, liiqenna; qassi kathaa bukiya para gaareti iya bollara laagetikoka kathay gaacetenna. 29 Ha cincatethaa ubbay ba zoriyaninne ba cincatethan malaalsiya Ubbaafe Wolqaama Godaape yees.