1 Hizqiyaasi kawotida tammanne oyddantho laythan, Asoore kawoy Sanakreemi yuushoy gimbetida Yihuda katamata olidi oykis. 2 Hessafe guye, Asoore kawoy Laakiso katamaape issi toora mocona daro olanchotara kawa Hizqiyaasako Yerusalaame yeddis. I, bidi Ma7o Meecciya gadiyako efiya ogiyape qommo baggara de7iya eelida haathay goggiya dhawa matan eqis. 3 Kawo gadho aysiya Alqa na7ay Eliyaqeemi, xaafey Sheebinne, taarike xaafey, Asaafa na7ay, Yo7aasi iyako kare keyidosona.

4 Asoore toora moconay entako, “Hizqiyaasas haysada yaagidi odite: ‘Wolqaama Asoore kawoy, neeko haysada’ yaagees: neeni haysa mela minnanaw aybin ammanetadii? 5 Neeni coo qaalan, olaa oletanaw taw cincatethinne wolqi de7ees yaagasa. Shin neeni oonan ammanetada ta bolla haysada makallay? 6 Neeni ‘Gibxe kawoy tana maaddana’ gada qopidaba gidiko meqida mayre xam7a guufetiya asa mela. Xam7ay meqin pincoy kushiya caddesinne madunxisees. Gibxe kawoy banan ammanetiya asa ubbaas hessa mela.Hiz 29:6-7. 7 Shin neeni, ‘Nuuni Godan, nu Xoossan, ammanetoos’ yaagiko, Hizqiyaasi Yihudanne Yerusalaame asaa, ‘Hinte Yerusalaamen de7iya yarsho bessan goyinnanaw koshshees’ gidi, Xoossaa goyinniya dhoqa bessatanne yarsho bessata diggiday iya gidennee?

8 “Ane ha77i haaya! Ta godaa Asoore kawuwara geedareta. Togganaw danda7iya asi ne demmiko, nam7u mukulu parata ta new immana. 9 Neeni, ‘Gibxeti para asatanne para gaareta taw yeddana’ gada ammaniko, ta godaa toora moconatape issi laafaka zaaranaw danda7aka. 10 Hessa bollaka, taani ha biitta dhaysanaw tuma Godaa sheney bayna keyadina? Goday ba huuphen tana ‘Bada ha biitta olada dhaysa’ yaagidi kiittis” yaagis.

11 Hessafe guye Eliyaqeemi, Sheebinne Yo7aasi Asoore halaqaako, “Nuuni eriya Aramike doonara nuus ne aylletas odape attishin, gimbe dirsa bolla de7iya asay si7ana mela Ibraawetho doonan odopa” yaagidosona.

12 Shin halaqay zaaridi, “Ha kiitaa taani hintewunne hinte godaa xalaalas odana mela tana ta goday kiittibeenna. Hintera issife banta shi7a maanawunne banta sheesha uyanaw de7iya, ha gimbe dirsaa bolla de7iya asa ubbaas odana mela kiittis” yaagis.

13 Asoore halaqay dendi eqidi, ba qaala dhoqu oothidi, Ibraawetho doonan haysada yaagis: “Wolqaama gidida Asoore kawoy giyaba si7ite! 14 Kawoy hinteko haysada yaagees; ‘Hizqiyaasi hintena cimmofo’ I hintena ta kushepe ashshanaw danda7enna. 15 Hizqiyaasi hintena, ‘Tuma Goday nuna ashshana; ha katamayka Asoore kawa kushen gelenna’ yaagidi, hinte Godan ammanetana mela oothofo.

16 “Hinte Hizqiyaasi odiyaba si7opite. Asoore kawoy hintena, ‘Taara sigetite; haa taako yiite. Hessa hinte oothiko, hinte ubbay hinte woynepenne hinte balasepe maana; hinte bookida ollaafeka haathe uyana. 17 Taani yada, hintena hinte biitta daaniya biitta ekada efana. He biittay kathinne woyney kumida biitta’ ” yaagis.

18 “Hizqiyaasi, ‘Goday hintena ashshana’ yaagidi cimmonnaada naagetite. Hara kawotethata xoossatape ba biitta Asoore kawa kushepe ashshida xoossi de7iyee? 19 Hamaata xoossatinne Arfada xoossati awun de7oona? Safarwayma xoossati awu bidonaa? Enti Samaariya ta kushepe wothi ekidona? 20 Ha biittata xoossatape ba biitta ta kushepe ashshidi ekiday de7ii? Yaatin hinte, ‘Goday Yerusalaame ta kushepe ashshana’ yaagidi qopeetii?” yaagis.

21 Shin kawoy entako, “Iyaw ay zaaroka immopite” yaagidi zorida gisho, asay issi qaalaka iyaw zaaronna si77i gidoosona. 22 Hessafe guye kawo gadho aysiya Kalqe na7ay Eliyaqeemi, xaafey Sheebinne taarike xaafey Asaafa na7ay Yo7aasi banta ma7uwa peedhidosona. Hizqiyaasako bidi Asoore halaqay gidaba ubbaa iyaw odidosona.