43
Isra7eele Ashshiya Issuwa
1 Shin neno Yayqoobaa nena medhiday,
neno Isra7eele, nena giigisiday,
Goday haysada yaagees:
“Taani nena wozida gisho yayyofa;
taani nena ne sunthan xeegas; neeni tabaa.
2 Neeni haatha giddora pinniya wode
taani neera gidana.
Neeni shaafata giddora pinniya wode
enti nena mittokona.
Neeni tama giddora aadhiya wode
xuugetaka; lacoyka nena meenna.
3 Taani nena Ashshiysa, Isra7eele Geeshshaa,
Godaa ne Xoossaa.
Gibxe new wozo oothada,
Tophenne Saaba
new laame oothada immana.
4 Neeni ta sinthan al7onne boncho gidiya gisho,
taani nena dosiya gisho,
asaa ne gisho, kawotethata ne shempuwa gisho
laame oothada immana.
5 Taani neera de7iya gisho yayyofa;
taani ne nayta dolohape
nena wulohape shiishana.
6 Taani pudeha baggaa, ‘Enta zaarada eha!’
dugeha baggaa, ‘Enta teqofa’ yaagana.
Ta adde nayta haahosoope,
ta macca nayta sa7aa gaxape ehana.
7 Enti ta sunthan xeegetidaysata,
taani ta bonchuwas medhidaysata,
taani giigisidaysatanne oothidaysata hammite.”
8 Ayfey de7ishin qooqida asata,
haythi de7ishin tullida asata kessa.
9 Kawotethati ubbay issife shiiqo;
asay duulata utto.
Enta eeqata giddofe haysa odanaw,
kase aadhidabata nuus qoncisanaw
danda7ey oonee?
Hara asay si7idi, “Haysi tuma” gaana mela,
enti like gideysa bessanaw banta markata eho.
10 Goday haysada yaagees: “Hinte ta markata;
hinte tana erana melanne ammanana mela
taani Xoosse gideysa akeekana mela
taani doorida ta aylleti hintena.
Taape kase hara xoossi medhetibeenna;
taape guye hara xoossi deenna.
11 Taani Godaa;
taape attishin, hari ashshey baawa.
12 Ta kasetada odas,
ta oothanaba awaajas, ta ashshas.
Hinte giddon de7iya allaga xoossatape
hessa oothiday baawa.
Taani Xoosse gideysas hinte taw markata.
13 Merinaape merinaw taani Xoosse;
ta kushepe oonika ashshena;
ta oothidaba laammanaw danda7ey baawa”
yaagees Goday.
Xoossa maarotanne Ammanetona Isra7eele
14 Goday, hintena Woziya,
Isra7eele Geeshshay, haysada yaagees:
“Hinte gisho, taani Babiloone bolla
olanchota kiittana.
Babilooneta ubbaa enti ceeqetiya
markabetara betana mela oothana.
15 Taani Godaa, hinte Geeshshaa,
Isra7eele medhida hinte Kawa” yaagees.
16 Abba giddon oge,
wolqaama haathata giddora horoga
kessida Goday haysada yaagees.
17 Para gaaretanne parata,
olanchotanne mino asata abban ehidi,
enti dendonna mela yeggiday,
enta muqaada tamada toysida.
18 Goday haysada yaagees:
“Kasebata haasayopite;
benibata qopofite.
19 Heko, ha77i taani oorathaba oothayis;
ika ha77i dolana.
Hessi hintew bentennee?
Taani mela biittan oge,
mela biittan shaafata kessana.
20 Taani doorida, ta asaas mela biittan haathe,
mela biittan haatha shaafata immas.
Wora do7ati, workanatinne yanchoti
tana bonchana.
21 Taani taw medhida dere gidiya gisho,
ta galataa awaajana mala ta haysa oothas.
22 Shin neno Yayqoobaa,
neeni ta sunthaa xeegabaka;
neno Isra7eele, neeni tana saletadasa.
23 Neeni taw xuussa yarshos dorse ehabaaka;
hara yarshonka tana bonchabaaka.
Taani nena katha yarsho eha gada waaysabike;
ixaane taw cuyiso gada daabursabike.
24 Neeni taw sawiya ixaane shammabaaka;
ne modho yarshon tana ufaysabaka.
Shin neeni ne nagaran tana waaysadasa;
ne naaquwan tana daabursadasa.
25 “Ta gisho gada ne nagaraa quchey tana;
ne nagaraa zaarada qopike.
26 Ane tana hassayisa;
neeni xillo gideysa erisanaw
issife shiiqidi mootetoos.
27 Ne koyro aaway nagara oothis;
ne astamaareti tana qohidosona.
28 Hessa gisho, taani ta keetha halaqata kawushas;
Yayqooba gados, Isra7eele cashshas
aathada immas.”