45
Qiroosa Dooretetha
1 Goday tiyidaysas,
kawota danco bilisaana mela,
deriya iyaw haarisana mela,
pengeti iya sinthan dooyetana mela
iya ushacha kushiya oykida Qiroosa
Goday haysada yaagees:
2 Taani ne sinthara baana; dereta dembayana;
naase birata sanqata menthana;
birata kobeta qanxana.
3 Nena ne sunthan xeegey tana Godaa,
Isra7eele Xoossaa gideysa neeni erana mela
taani new dhuman de7iya shaluwa,
geeman qosetida duretetha immana.
4 Ta aylliya Yayqooba gisho,
taani doorida Isra7eele gisho,
taani nena ne sunthan xeegas.
Neeni tana eronna ixikoka,
taani nena boncho sunthan xeegas.
5 Taani Godaa; taape hara xoosse baawa;
neeni tana eronna ixikoka
taani new wolqa immana.
6 Hessika awi doliyasope wulliyaso gakanaw
taape hari baynaysa asay erana melasa;
taani Godaa; taape hara xoossi baawa.
7 Taani poo7onne dhuma medhas;
Sarotethinne dhayo ehayis;
ha ubba taani Goday oothayis.
8 Hinteno saloto, bollafe xillotethi tigite;
shaarati bukiso.
Biittay dooyeto, atotethi xillotethay issife dolo;
taani Goday haysa medhas.
9 Bana Medhidaysara palamiya uraa ayye!
I sa7an meqidi wodhida
otope issuwa mela.
Otoy bana medheysako,
Neeni, “Ay oothay?”
“New kushey baawa” yaagiyee?Roome 9:20.
10 Ba aawa, “Tana ayis yeladii?” giya,
ba aayiw, “Tana haysada ayis bannakadii?”
giya uraa ayye!
11 Goday, Isra7eele Geeshshay,
iya Medhidaysi haysada yaagees:
“Sinthafe hananaba,
hinte tana ta naytabaa oychanaw,
ta kushe oosotaba tana kiittanaw bessetii?
12 Taani sa7aa oothas;
aseka iya bolla medhas.
Salota taani ta kushen miccas;
enta bolla xoolintota ubbaa wothas.
13 Taani Qiroosa xillotethan denthas;
iya ogiya ubbaa suure oothana.
Miishe qanxonna woyko woyto immonna
I ta katamaa keexana; ta asaa di7ope zaarana”
yaagees ubbaafe Wolqaama Goday.
14 “Goday haysada yaagees:
Gibxe duretethaynne Tophe zal7ey,
geesay adussa gidida Saaba asati
neeko yidi, nebaa gidana;
enti santhalaatan qashetidi, nena kaallana.
Enti new goyinnishe, ‘Xoossi neera de7ees;
iyape attishin, hara xoossi baawa’ ” yaagana.
15 “Isra7eele Ashshiya Godaa Xoossaw,
tuma neeni nena genthiya Xoosse.
16 Eeqa medheysati ubbay yeellatananne kawuyana;
enti issife yeella ma7ana.
17 Shin Goday Isra7eele merinaa atotethan ashshana;
hinte merinaw yeellateketa kawuyeketa.
18 Salota medhida Goday, biitta giigisidi oothiday,
asi daana melape attishin, biitta coo medhiboonna
Xoossay haysada yaagees:
taani Godaa; taape hari baawa.
19 Taani geeman,
woyko dhuma biittan uttada odabike.
Yayqooba zerethaako, ‘Tana coo bessan koyite’ gabike;
taani Goday tumaa haasayis; like gididaba qoncisayis.
20 Hinteno kawotethata giddofe attidaysato,
issife haa mata shiiqite.
Mithafe oosetida eeqa misiliya tooki yuuyeysatas,
ashshanaw danda7onna xoossata woosseysatas eri baawa.
21 Ane palamit; hinte mootuwas gaaso shiishite;
issife zoretite.
Daro wodepe kase haysa odiday oonee?
Benipe haysa awaajiday oonee?
Tana Godaa gidikinaayee?
Taape attishin, hara Xoossi baawa.
Taape attishin, hari xilloynne ashshiya Xoossi baawa.
22 Hinteno biitta gaxape gaxa gakanaw de7eysato,
taako simmidi attite; taape attishin, hara Xoossi baawa.
23 Taani tanan caaqas;
guye simmonna qaali
ta doonape xillotethan keyis.
Gulbati ubbay taw gulbatana;
inxarsi ubbay tanan caaqana.Roome 14:11; Filphi 2:10-11.
24 Enti tabaa haasayishe,
‘Xillotethinne minotethi
Godaa xalaalan de7ees’ yaagana.
Iya ixiya ubbay iyako yidi yeellatana.
25 Shin Isra7eele zeretha ubbay,
Godan, xoononne boncho demmana.