55
Saamotida Ubbay Yo
1 Hinteno, saamotidaysato, ubbay taako haa yiite;
miishey baynaysato, haa yiite.
Shammidi miite;
haa yidi, miishe qanxonna
coo woyne ushshinne maathi shammite.Qon 21:6; 22:7.
2 Kathi gidonnabaas hinte miishiya ayis kesseetii?
Kalsonnaban hinte wolqaa ayis wurseetii?
Ane tana si7ite, taani odeysa hayzite;
lo77o kathaa miite;
lo77o kathan hinte asatethaa ufaysite.
3 “Hinte haytha taako zaaridi tana si7ite;
de7on daanaw ta odeysa si7ite;Hawa 13:34.
taani Dawitas gelida ufaysa qaalan hintena anjana.
4 Heko, taani iya kawotethatas marka,
kaaletheysanne halaqa oothas.
5 Goday, ne Xoossay, Isra7eele Geeshshay
nena bonchida gisho,
neeni eronna kawotethata xeegana;
nena eronna kawotethati ellesidi neeko yaana.”
6 “Goday bentiya wode iya koyite;
matan de7iya wode iya xeegite.
7 Iita asi ba ogiyape simmo;
nagaranchoy ba qofaa aggo.
Godaako simmo, ika iya maarana;
I nu Xoossaako simmo, iyaw atto gaana.
8 Ta qofay hinte qofaa mela,
ta ogey hinte ogiya mela gidenna”
yaagees Goday.
9 Saloti sa7aape dhoqeysada,
ta ogey hinte ogiyape,
ta qofay hinte qofaape dhoqees.
10 Irinne shachi salope wodhidi,2 Qoro 9:10.
biitta laakisidi, kathi dolana melanne
ayfana mela ootheysada, zereysas zerethi,
meysas kathi immonna guye salo simmenna.
11 Ta doonape keyiya qaalay hessa mala;
I taani halchidaysa polonnanne
ta kiittidaysa oothonna taako coo simmenna.
12 “Hinte ufaysan keyana; saron moyzetana;
deretinne zumati hinte sinthan ufaytidi yexana;
bazzo mithati ubbay banta kushiya baqana.
13 Aguntha gisho xiidda,
gom7ore gisho xaythi dolana.
Hessi Godaa qofisiyabaanne
merinaw dhayonna malla gidana”
yaagees Goday.