58
Tuma Xooma
1 Goday haysada yaagees:
“Ne qaala dhoqu oothada waassa; guye goopa;
ne qaala moyzeda dhoqu ootha.
Ta asaas enta geellatetha,
Yayqooba keethaas enta nagaraa oda.
2 Shin enti tana gallas gallas koyoosona;
ta ogiya kaallanaw dosiya daanosona.
Xillo oothidanne Xoossaa kiitaa aggiboonna asada
enti tana suure pirda oychoosona;
taako Xoossaako shiiqanaw dosiya daanosona.
3 Enti Godaako,
‘Nuuni xoomos, shin neeni ayis nuna xeellikii?
Nuuni nunatethaa kawushida,
shin neeni ayis eronnaada hanadi’ yaagosona.
Goday zaaridi, ‘Heko, hinte xoomiya wode
hintena ufaysiyabaa ootheeta;
hinte oosanchota un7etheeta.’
4 Hinte ooshshaninne palaman xoomeeta;
qadhey bayna iita deshethi dechanaw xoomeeta.
Hessa mela xoomiya hinte woosay bolla saluwan
si7etonna mela oothees.
5 Taani doorida xoomay haysa mela xoomee?
Issi asi banatetha kawushey haysa mela gallasa xalaalanee?
Taani koyiya xoomay asi ba huuphiya
kaxida gasheda hoksana melanne
bido tiyetidi kayo ma7o ma7idi utetheyee?
Hinte hessa xooma gidi xeegetiyee?
He xooma gallasay Godaa sinthan eketiyee?
6 “Taani dooriya xoomay haysa;
suure pirda dhayo santhalaata billana melanne
qambara menthidi un7etidaysata
la77a kessana mela gidenneyee?
7 Taani dooriya xoomay koshatidaysa muzana mela,
keethi bayna manqota soo ekana mela,
kallotidaysa be7ada mayzana melanne
maado koyiya hinte dabbuwafe
hintena genthonna melasa gidennee?
8 Yaatiko, hinte poo7oy wonta xalqeda poo7ana;
hinte paxotethay eeson yaana.
Hinte xillotethay hintefe sinthara baana;
Godaa bonchoy hintefe guyera gididi,
hintena naagana.
9 He wode hinte xeegana;
Goday hintew koyana.
Hinte maado koyidi waassana;
I, ‘Heko, taani haysan de7ayis!’ yaagana.
“Hinte giddofe un7ethiya qambara diggiko,
biradhen malleysanne iitaba odeteysa aggiko,
10 Koshatidaysa muziko,
metootidaysata koshshiyaban maaddiko,
he wode hinte poo7oy dhuman poo7ana;
hinte qammay seeta gallas gidana.
11 Goday hintena ubba wode kaalethana;
hintena mela biittan koshshiyaban kalsana;
hinte xaphuwa xaalisana.
Hinte haathe uyaa gannate melanne
meli eronna haatha pulto mela gidana.
12 Ne asay beni laaletida bessata zaaridi keexana;
daro wodepe kase baasetida baasota keexidi dhoqu oothana.
Hinte ‘Laaletida gimbeta gimbeysatanne
asay de7iya bessaanne wogga ogey
de7iya katamata esseyisata geetetana.’
13 “Sambaata gallasaa boncho aggonna ixiko,
ta geeshsha gallas hinte go77a yedetheysa aggiko,
Sambaata ufaysinne bonchetida,
Godaa gallasaa boncho gada xeegiko,
hinte hinte ogiya boonna aggidi he gallasaa bonchiko,
hintena ufaysiyabaa oothonnanne hadaba odetonna aggiko,
14 he wode hinte Godan ufaytana;
taani hintena daro bonchetidaysata oothana;
hinte aawa Yayqooba laata hinte maana mela oothana.
Taani Goday haysa odas” yaagees.