1 Efreema asay Gediyoonako, “Midiyaameta olanaw bashe nuna ayis xeegabikii? Nu bolla hessa melaba ayis oothadii?” yaagidi yilotidosona.

2 Shin Gediyooni, “Hinte oothidaysi ta oothidaysafe aadhenee? Ta kochay Abi7ezeri shiishida kathaafe hinte Efreema kochati qorida budhey aadhenee? 3 Midiyaame halaqata, Oreebanne Zeba Xoossay hinte kushen aathidi immis. Hinte oothidaysa mela taani ay oothanaw danda7iyana?” yaagis. I yaagin enti zarbidosona.

4 Gediyooninne iyara de7iya heedzu xeetu asay Yordaanose shaafa pinnidosona. Enti ay daaburikoka banta morketa yedetho aggibokona. 5 Enti Sukota gakida wode Gediyooni he katamaa asaako, “Ta asay daaburida gisho, hayyana guutha kathi immerketi. Taani Midiyaame kawota Zebanne Salmoona yedethashe de7ayis” yaagis.

6 Sukota katamaa halaqati, “Zebanne Salmoona neeni di77abakashin ne olanchotas ayis kathi immanee?” yaagidosona.

7 Gediyooni, “Lo77o aykoy baawa; Goday Zebanne Salmoona ta kushen aathidi immiya wode taani bazzo agunthaninne xunduqen hintena wadhana” yaagis. 8 Yaape dendidi Panu7eela bidi, yan de7iya asaaka he oysha oychin, Panu7eela asay Sukota asay zaaridaysada zaaridosona. 9 I Panu7eela asaako, “Taani xoonada saro simmiya wode hinte katamaa naagiya ha adussa gimbiya laallana” yaagis.

10 He wode Zebinne Salmooni doloha baggafe yida olanchotape attida 15,000 olanchotara Qarqoran de7oosona. Entafe 120,000 olanchoti olan hayqidosona. 11 Gediyooni Noobapenne Yogibape doloha baggan de7iya bazzo ogiyara bidi, yan de7iya olanchoti qoponna de7ishin ola denthis. 12 Nam7u Midiyaame kawoti Zebinne Salmooni baqatidosona; shin Gediyooni enta yedethi gakidi di77is. Enta olanchoti ubbay wolqaama dagaman kundidosona. 13 Iyo7aasa na7ay Gediyooni Hereesa baggara olape simmis. 14 Sukotape issi na7atetha na7aa oykidi oychis. He na7ay laapun tammanne laapun Sukota halaqatanne cimata sunthaa xaafidi iyaw immis. 15 Hessafe guye, Gediyooni Sukota yidi, “ ‘Zebanne Salmoona neeni di77abakashin, daaburida ne asaas ayis kathi immanee?’ gidi ta bolla qelqisideta; shin Zebanne Salmoona haysa be7ite” yaagis. 16 Gediyooni bazzo agunthinne xunduqe ekidi Sukota halaqata wadhis. 17 Qassi Panu7eelan katamaa adussa gimbe shakuwa laallidi kataman de7iya addeta wodhis.

18 Yaatidi Gediyooni Zebanne Salmoona, “Hinte Taaboren ay mela asi wodhidetii?” yaagidi oychis.

Enti, “Ne mela asi; enti kawo na7a daanosona” yaagidi zaaridosona.

19 Gediyooni, “Enti ta ishata; enti ta aaye nayta. De7o Xoossi eriya mela enta hinte wodhonnaba gidiyako ta hintena wodhikeshin” yaagis. 20 Ba bayra na7aa Yeterako, “Dendada, haysata wodha” yaagis. Yeteri buroo yooga gidiya gisho yayyidi ba mashshaa shoddibeenna.

21 Zebinne Salmooni Gediyoonako, “Hiza ne nuna wodha; adde ooso oothanaw adde koshshees” yaagidosona. Yaatin, Gediyooni enta wodhis; enta gimaleta qoodhen de7iya alleeqo ubbaa ekis.

22 Isra7eele asay Gediyoonako, “Neeni nuna Midiyaametape ashshida gisho neeni, ne na7aynne ne na7aa na7ay nuna haarite” yaagis.

23 Shin Gediyooni, “Taani hintena haarike; ta na7ayka hintena haarenna; Goday hintena haarana” yaagis. 24 I entako, “Ta hintena issiba oychayis; hinte ubbay di77idi ehida haytha worqiyafe taw immite” yaagis. (Isma7eela asaas haythan worqa aasoy woga.)

25 Isra7eele asay zaaridi, “Ero, ufaytidi immana” yaagidosona. Afila hiixidi, asa ubbay di77idi ehida haytha worqiya yeggidosona. 26 Gediyooni ekida haytha worqey laatamu kilo giraame deexees. Hessika, hara alleeqota, qoodhen aathiya gozddata, Midiyaame kawoti ma7iya ocha teera daaniya ma7otanne enta gimaleta qoodhiyape eketida alleeqota gujonnashina. 27 Gediyooni worqa eeqa misiliya giigisidi, ba de7iya Ofira kataman wothis. Isra7eele asa ubbay Godaa aggidi he eeqa misiliya goyinnidosona; hessi Gediyoonasinne iya soo asaas xihe gidis.

28 Hessada hanidi, Midiyaame asay Isra7eele asaas haaretis; enti Isra7eele asaa bolla nam7antho dendibookona. Gediyooni hayqana gakanaw oytamu laythi biittay wopu gidi de7is.

29 Yeruba7aala geetetiya Gediyooni, Iyo7aasa na7ay ba soo simmidi de7is. 30 Gediyooni daro macho ekida gisho, iyaw laapun tammu adde nayti yeletidosona. 31 Seekeman de7iya laggethiya iyaw adde na7aa yelin, iya sunthaa Abimeleke*Abimeleke: Ha sunthaa birshethay ta aaway kawo guussu. yaagidi sunthis. 32 Iyo7aasa na7ay Gediyooni lo77o cimidi hayqis; ba aawa Iyo7aasa duufon moogetis. He duufoy Abezeera kochati de7iya Ofiran de7ees.

33 Gediyooni hayqidaape guye, Isra7eele asay Godaa aggidi Ba7aale xoossata goyinnidosona. Ba7aal-Biriita†Ba7aal-Biriita: Ha sunthaa birshethay Ba7aale caaqo guussu. geetetiya eeqa bantaw xoosse oothidosona. 34 Isra7eele asay banta yuushuwan de7iya morketa ubbaafe enta ashshida Godaa banta Xoossaa hassaybookona. 35 Isra7eele asaas oothida lo77o oosuwa gisho Yeruba7aala geetetiya Gediyoona soo asaas lo77o kushe zaaribookona.