11
1 Galada biittan de7iya Yoftaahey mino olancho. Iya aawa sunthay Galada; shin iya aayiya layma maccas. 2 Galada machiya iyaw adde nayta yelasu. Enti diccidi gakida wode banta ishaa Yoftaahe, “Neeni hara maccasape yeletida na7a gidiya gisho nu aawa aquwape aykoka laattaka” yaagidi soope yedethidosona. 3 Yaatin, Yoftaahey ba ishatape baqatidi, Tooba biittan de7is. Yan I de7ishin guutha worandzoti iyako shiiqidi iya kaallidosona.
4 Guutha wodepe guye Amooneti Isra7eeletara oletidosona. 5 Amooneti Isra7eeletara oletida wode Galada biitta cimati Toobape Yoftaahe zaaridi ehanaw bidosona. 6 Enti iyako, “Amooneta nuuni olana mela yada nuus halaqa gida” yaagidosona.
7 Shin Yoftaahey, “Tana ixidi, ta aawa keethaafe yedethibeeketii? Ha77i hintena metoy gakin taako ayis yidetii?” yaagis.
8 Galada cimati, “Gidoshin ha77i nuuni neeko simmida; neeni ola kaalethada Amooneta nuus olana melanne Galada biittas halaqa gidana mela koyoos” yaagidosona.
9 Yoftaahey, “Amoonetara oletana mela hinte tana guye zaarin, Goday enta ta kushen aathidi immiko, hinte tuma tana halaqa oothanee?” yaagis.
10 Galada cimati, “Goday nu giddon marka; neeni giyaba nu oothana” yaagidosona. 11 Yoftaahey Galada cimatara bis; enti iya banta halaqanne kaaletheysa oothidosona. Yoftaahey Mixiphan Godaa sinthan zaaridi qaala gelis.
12 Yoftaahey Amoone kawako ase kiittidi, “Neeni nu biitta olana mela nuuni new ay oothido?” yaagidi oychis.
13 Amoone kawoy Yoftaahey kiitida asaako, “Isra7eele asay Gibxefe keyida wode Arnoona shaafapenne Yaaboqa shaafape giddon, Yordaanose shaafa gakanaw de7iya ta biitta ekidosona. Ha77i ta biitta taw saron zaarite” yaagidi zaaris.
14 Yoftaahey nam7antho Amoone kawako ase kiittis. 15 Kiitetida asay, “Isra7eele asay Moo7abe biitta woyko Amoone biitta ekibeenna. 16 Isra7eele asay Gibxefe keyida wode bazzo kanthi bidi, Zo7o Abbaa gakis; yaape Qaadesa bis. 17 Isra7eele asay Edoome kawako, ‘Ne biittara nuna aatharkii?’ yaagidi ase kiittis; shin Edoome kawoy aathona ixis. Hessadaka, Moo7abe kawako kiittin, ika aathona ixis; yaatin, Isra7eele asay Qaadesan gam7is.
18 “Wursethan enti bazzuwa kanthidi, Edoomenne Moo7abe biitta gaxaa oykidi, Moo7abe biittafe doloha baggara yidi Arnoona shaafape hefintha baggan dunkaanidosona. Shin Arnoona shaafay Moo7abe zawa gidida gisho Moo7abe bagga pinnibookona.
19 “Hessafe guye, Isra7eele asay Haseboona kataman de7iya Amooreta kawa Sihoonako ase kiittidi, ‘Hayyana, ne biittara nuna aatharki’ yaagidi oychis. 20 Shin Sihooney Isra7eele asaa ammanetona gisho aathanaw koybeenna. I ba olanchota ekidi Yahaaxan dunkaanidi Isra7eele asaa olis. 21 Goday Isra7eele Xoossay Sihoonanne iya olanchota Isra7eele asaa kushen aathidi immin, enta xoonidosona. Yan de7iya Amooreta biitta ubbaa laattidosona. 22 Arnoona shaafape bidi Yaaboqa shaafa gakanaw, bazzuwafe bidi Yordaanose shaafa gakanaw de7iya Amooreta biitta ubbaa ekidosona.
23 “Hessada oothidi Goday, Isra7eele Xoossay ba asaa Isra7eele sinthafe Amooreta yedethidi dhaysis. Yaatin, neeni zaarada new ekanaw waata qopay? 24 Neeni ne xoossay kamooshi new immeysa ekikii? Shin nuuni, Goday nu Xoossay nuus immidaba ubbaa laattidi daana. 25 Gidoshin neeni Sifoora na7aa, Moo7abe kawa Balaaqape minnay? I Isra7eele asaara ooyetide woyko oletidee? 26 Isra7eele asay Haseboona, Aro7eeranne enta yuushuwan de7iya gutata ubbaa, qassi Arnoona shaafa matan de7iya katamata ubbaa laattidi heedzu xeetu laythi de7is. Yaatin, he wode ayis wotha ekabikii? 27 Taani hintena aykoka qohabike; shin tana olanaw dendada naaqey nena. Pirdiya Goday hachi Isra7eelepenne Amoonepe giddon pirdo” yaagis.
28 Shin Yoftaahey kiitida kiitaa Amooneta kawoy si7onna ixis.
29 He wode Godaa Ayyaanay Yoftaahe bolla wodhin, Galadanne Minaase biitta kanthi bidi, Galada biittan de7iya Mixipha simmis. Yaape olanchota kaalethidi Amoone biitta bis. 30 Yoftaahey Godaas qangetidi, “Neeni Amooneta ta kushen aathada immiko, 31 taani olaa xoonada soo simmiya wode tana mokanaw ta soope keyiya aybika neesa; taani iya xuuggiya yarsho oothada new shiishana” yaagis.
32 Hessafe guye, Yoftaahey Amooneta olanaw zawa bin, Goday enta iya kushen aathidi immis. 33 Aro7eerape bidi Minitanne Abeel-Kiramima gakanaw de7iya laatamu katamata olidi dhaysis; daro asaa wodhis. Hessafe guye, Amooneti Isra7eeletas haaretidosona.
34 Yoftaahey ba soo Mixipha simmiya wode iya na7iya karaabo oykada yexashenne durashe iya mokanaw keyasu. Iyaw iipe attishin, hara na7i baawa. 35 I iyo be7ida wode azzanidi ba ma7uwa daakidi, “Hay ta naate! Tana kawushadasa; tana meton yeggadasa. Taani Godaas qangas; gathonna agganaw danda7ike” yaagis.
36 Na7iya, “Ta aawaw, neeni Godaas qangidaba gidiko, Goday ne morketa, Amooneta bolla neeni halo keyida gisho ne qangidaba ta bolla pola” yaagasu. 37 Shin iya ba aawako, “Taw issiba ootharki. Taani azina gelonna attiya gisho, ta laggetara bada zumaa bolla ta geela7otethaas yeekana mela nam7u ageenas tana yeddarki” yaagada oychasu.
38 I, “Ba” yaagidi, nam7u ageenas iyo yeddis. Iya ba laggetara zumaa bolla keyada ba geela7otethaas entara yeekasu. 39 Nam7u ageenape guye, ba aawako simmada yasu. I aaway Godaas qangida ba qangetha gathis; iya geela7oshin hayqasu.
He wodepe doomidi, 40 Isra7eele macca nayti laythan laythan oyddu gallas banta soope haaki bidi, Galada addiya Yoftaahe na7ees yeekeysinne kayoteysi meeze gidis.