1 He wode Isra7eele biittan kawoy baawa. He wodey gakanaw Daane kochati Isra7eele kochata giddon laattida biitti baawa. Enti bantaw de7iya biitta koyishe de7oosona. 2 Hessa gisho, Daane kochati banta giddofe ichashu mino olanchota dooridi biitta wochana mela Xor7afenne Eshta7oolape enta kiittidosona.

Enti derey dariya Efreema biitta gakidi Mika son aqidosona. 3 Enti Mika son de7iya wode Leewe koche gidida na7atetha iya odan eridosona. Enti iyako shiiqidi, “Nena haysa ehiday oonee? Haysa ayis yadii?” yaagidi oychidosona.

4 I zaaridi, “Miiki taw damooze qanxin, taani iyaw kahine gidada oothayis” yaagis.

5 Enti, “Nuuni biya ogey nuus suurane, suurenne hayyana nuus Xoosse oycha” yaagidosona.

6 Kahiney, “Saro biite; hinte biya ogiyan Goday hintera gidana” yaagis.

7 Hessape guye, ichashu asati yaape dendidi, Laysha katamaa gakidosona. Yan de7iya asay Sidoona biitta asaada saron de7eysa be7idosona; asati oonika sidhonna wopu gida asi; entaw aykoyka paconna ubbabay kumida asi. Ay asaraka gahetonna Sidoona asaape haakidi bantaw dumma de7oosona.

8 Ichashu asati Xor7aninne Eshta7oolan de7iya banta ishatako simmidosona; enta ishati, “Ay wore ekidi yidetii?” yaagidosona.

9 Enti zaaridi, “Biittay daro aradda gideysa nu be7ida. Ane dendidi Laysha oloos. Haysan ooso dhayidi coo uttofite; elle bidi oykite. 10 Hinte yaa bidi, oonanne sidhonna uttida asaako gakana. Biittay dalga; asas koshshiya ubbabay he biittan de7ees. Xoossay he biitta hintew immis” yaagidosona.

11 Yaatin, Daane kochaafe toora dancida usupun xeetu asati Xor7apenne Eshta7oolape dendidi bidosona. 12 Yihuda biittan Qiriyat-Yi7aarimape wuloha baggara uttidosona. Hessa gisho, he bessay hachi gakanaw Daane Gutaa geetetidi xeegetees. 13 Yaape dendidi derey dariya Efreema biittan de7iya Mika soo yidosona.

14 Laysha biitta wochanaw bida ichashu asati banta ishatako, “Ha bessan, ha keethatape issuwan efuudey, soo giddo eeqa misiletinne mithafe oothidi bira sheeshidi tiyida misiley de7eysa ereetii? Ane ay oothanaw koshshiyako qopite” yaagidosona. 15 Enti ogiyape simmidi, Leewe koche gidida na7atetha kahiney de7iya Mika soo bidi iya sarothidosona. 16 He wode usupun xeetu Daane olanchoti ola miishe oykidi penge bolla eqidosona. 17 Enti he kahiniyara yan eqidashin, biitta wochiya ichashu asati Mika soo gelidi, mithafe oothidi, bira sheeshidi, tiyida eeqa misiliya, efuudiyanne soo giddo eeqa misileta ekidosona.

18 He wode kahiney enta, “Waatetii?” yaagidi oychis.

19 Enti iya, “Hayza, issi qaalaka pogopa. Nuura bada nuus aawanne kahine gida. Issi keetha asas kahine gideysafe Isra7eele gidiya issi kochas kahine gideysi new lo77enee?” yaagidosona. 20 Kahiney hessa si7idi ufaytidi efuudiya, soo giddo eeqa misiletanne mithafe oothidi bira sheeshidi tiyida misiliya ekidi entara bis.

21 Yaape dendidi, banta nayta, banta mehiyanne bantaw de7iyaba ubbaa sinthe aathidi bidosona. 22 Enti Mika soope haakidi bidaape guye, Miiki ba shoorota xeegin, Daane asata kaallidi gakidosona. 23 Enta gakidi waassin, Daane asati guye simmidi, “Waanadii? Ha asa ubbaa ayis shiishadii?” yaagidi Mika oychidosona.

24 Miiki zaaridi, “Taani medhida ta xoossatanne taw oothiya kahiniya bonqideta. Yaatin taw attidabay aybee? Tana, ‘Woygidi waanadi, geetii?’ ” yaagis.

25 Daane asati, “Ane doona pogada nena era! Ha shenera de7iya asaa neeni denthethiko, enti ne bolla dendana; nenanne soo asa ubbaa dhaysana” yaagidosona. 26 Daane asati banta ogiya bidosona. Mikika enti baape daro mino gideysa be7idi ba soo simmis.

27 Daane asati Miiki medhida xoossatanne iya kahiniya ekidi, Leesan oonaka sidhonna saro de7iya asatako bidi, asa ubbaa mashshan wodhidi katamaa taman xuuggidosona. 28 Laysha katamay Sidoonape haakidi de7iya gishonne enti hara asara gahetidi eronna gisho enta ashshanaw oonika danda7ibeenna. Laysha katamay Beet-Rehooba geetetiya bessaa matan de7iya zangaaran de7ees.

Daane asati katamaa zaari keexidi yan de7idosona. 29 Katamaa sunthaa beni banta mayza Yayqooba na7aa Daane sunthan laammidi, Daane yaagidi sunthidosona; shin koyro he katamay Laysha geetetees. 30 Daane asati bantaw eeqa misiliya yan wothidi, Muse na7aa Gedisoonape yeletida Yoonataana banta kahine oothidosona. Iya kochati asay di77etidi bida wode gakanaw yan kahine gididosona. 31 Hessada hanidi, Geeshsha Dunkaaney Seelon de7ida laytha ubban Miiki oothida misileti yan gam7idosona.