1 Iyosyaasa na7ay, Yihuda kawoy Iyo7aqeemi kawotida oyddantho laythan, Babiloone kawoy Nabukadanaxoori kawotida koyro laythan, Yihuda asaabay Ermiyaasako yida qaalay haysa. 2 Nabey Ermiyaasi Yihuda ubbaasinne Yerusalaamen de7iya ubbaas haysada yaagis: 3 Amoxe na7ay, Yihuda kawoy, Iyosyaasi kawotida tammanne heedzantho laythafe doomidi, hachi gakanaw, laatamanne heedzu laythi Godaa qaalay taako yis. Ta hintew zaara zaara odas; shin hinte si7onna ixideta.

4 Goday ba aylleta, nabeta ubbaa zaari zaari hinteko kiittis; shin hinte si7onna ixideta. 5 Enti, “Hinte ubbay hinte iita ogiyapenne hinte iita oosuwape simmite. Goday hintewunne hinte mayzatas merinaw immida biittan hinte daana. 6 Hara xoossata goyinnanawunne entaw oothanaw kaallopite. Qassi hinte, hinte kushen oothida eeqatan Godaa hanquwa denthethofite. Hessi haniko Goday hintena qohenna” yaagidosona.

7 “Hinte ta odidaysa si7onna ixidi, hinte kushey oothidaban tana yiloyideta. Hinte, hintena qohiyaba oothideta” yaagees Goday.

8 “Hessa gisho, Ubbaafe Wolqaama Goday haysada yaagees: hinte ta qaalas kiitetonna ixida gisho, 9 pudeha bagga asa ubbaanne ta aylliya Babiloone kawa Nabukadanaxoora xeegana. Enta ha biitta bolla, ha biittan de7iya asa bollanne heeran de7iya kawotethata ubbaa bolla ehana. Ta ha biitta kumethi dhaysana; qassi be7ida ubbay shaatiyabanne qelqisiyaba oothana” yaagees Goday. 10 Enta giddofe ililsinne ufaysa qaala, yaagano girsi, woxa girsinne xompe poo7o dhaysana. 11 Ha biittay kumethi laaletidanne baysa biitta gidana; kawotethati Babiloone kawas laapun tammu laythi haaretana.

12 “Laapun tammu laythay poletidaape guye, taani Babiloone kawanne iya asaa enta nagara gisho seerana; enta biitta merinaw baysa oothana. 13 Ta ha biitta bolla odida ubbaa, Ermiyaasi kawotethata ubba bolla odida tinbitiyanne ha maxaafan xaafetida ubbaa ha biitta bolla ehana. 14 Daro kawotethatinne gita kawoti Babiloone asaa haarana. Ta entaw, enta hanuwadanne enta kushe oosuwada zaarana” yaagees Goday.

15 “Ta hanquwan kumida woyne wanca ta kushepe eka. Efada ta nena kiittiya kawotethata ubbaa ushsha. 16 Enti uyidi, taani enta giddo yeddiya mashshaa gaason gandigarananne gooyana” yaagees Goday Isra7eele Xoossay.

17 Taani Godaa kushepe wanca ekada, I tana kiitida kawotethata ubbaa ushshas. 18 Hachi hanidaysada enta ubbaa dhayonne dagama, cashshenne baadethi oothana mela Yerusalaamenne Yihuda katamata, iya kawotanne iya moorinnata ubbaa ushshas. 19 Gibxe kawa, iya aylleta, iya moorinnata, iya biitta asa ubbaanne 20 yan de7iya allaga asa ubbaa ushshas. Oxa kawota ubbaa ushshas. Filisxeemen de7iya Asqaloona, Gaaza, Eqroonanne Ashdoodape attida kawota ubbaa ushshas. 21 Edoome, Moo7abenne Amoone ushshas. 22 Xiroosa kawota ubbaa, Sidoona kawota ubbaanne Medetiraane Abbaafe hefinthan, haahon de7iya kawota ushshas. 23 Dedaana, Temaana, Buzanne banta huuphiya gaxa meediya asa ubbaa ushshas. 24 Arabe kawota ubbaanne mela biittan de7iya walaka asaa kawota ubbaa ushshas. 25 Zimira, Elaamanne Meedona kawota ubbaa ushshas. 26 Pudeha biitta kawota ubbaa, haahoninne matan de7iya kawota ubbaa kaallada kaallada sa7aa bolla de7iya kawotethata ubbaa ushshas. Entafe guye Babiloone kawoy uyana.

27 Goday taako, “Hessa gisho, ‘Ubbaafe Wolqaama Goday, Isra7eele Xoossay hinteko haysada yaagees’ yaaga. ‘Uyitenne mathotite; cooyitenne kundite. Taani hinte giddo yeddiya mashshaa gaason zaaridi dendofite’ yaagis. 28 Shin enti ne kushepe wanca ekonnanne uyonna ixiko, entako haysada yaaga. ‘Ubbaafe Wolqaama Goday hinteko haysada yaagees: hinte uyanaw bessees. 29 Ta sunthan xeegetida katamaa bolla iitabaa oothanaw doomayis. Yaatin hinte seerettona attanaw danda7eetii? Ta sa7an de7iya ubbaa bolla mashsha xeegida gisho hinte seerettonna atteketa’ ” yaagees Ubbaafe Wolqaama Goday.

30 “Hessa gisho, Ermiyaasa, ha qaala ubbay enta bolla poletanaysa entaw oda. Goday dhoqan guummana; Goday ba geeshsha bessaafe ba guntha sissana. I ba biitta bolla xaaggana; woyne gum7eysati waasseysada sa7an de7iya ubbaa bolla waassana. 31 Godaas kawotethatara mootoy de7iya gisho iya waasoy sa7a gaxaa gakidi si7etees. Goday asa ubbaara pirdetana; I iitata mashshas aathidi immana” yaagees Goday.

32 “Iitabay kawotethaafe kawotethaa laaletis; sa7aa gaxape gotey dendis” yaagees Ubbaafe Wolqaama Goday.

33 He wode Goday wodhidaysata ahay, biitta bolla ha gaxape ya gaxa gakanaw laaletana. Entaw yeeketenna, enta ahay shiiqenna woyko moogetenna; enti biittan pito mela gidana.

34 Hinteno, henthanchoto, yeekitenne waassite. Hinteno, wudiya kaaletheysato, bidon gondoretite. Hinte shuketiya wodey gakis; hinte kundananne lo77o urqa miishada meqeretana. 35 Henthanchoti baqatidi attiya bessi baawa; wudiya kaaletheysati kessi ekiya bessi baawa. 36 Goday enta hentha gadiya dhaysiya gisho, henthanchoti waassiya waasuwanne wudiya kaaletheysati yeekiya yeehuwa si7ite. 37 Godaa suulliya sheniya gaason saro biittay baysatana. 38 Gaammoy ba de7iya worape keyeysada Goday ba de7iya bessaafe keyana. Enta biittay un7etheyisata mashshaninne Godaa suulliya hanquwan baysa gidana.