1 Kawa naageysata halaqay Nabuzardaani Ermiyaasa Raman birshidi simmin, Godaa qaalay Ermiyaasako yis. Nabuzardaani Yerusalaamepenne Yihudape di77idi, Babiloone efanaw qachida asaa giddon Ermiyaasi santhalaatan qashetidi de7ees.

2 Kawa naageysata halaqay Ermiyaasa dumma kessidi, haysada yaagis: “Goday ne Xoossay, dhayo ha biitta bolla ehanaysa odis. 3 I ehana gidaysada ha77i oothis; Godaa bolla hinte nagara oothida gishonne iyaw kiitetonna ixida gisho haysi ubbay hanis. 4 Heko, ha77i ta ne kushen de7iya santhalaata birshada nena yeddas. Taara Babiloone baana giiko yedha; ta new koshshiyaba ubbaa kunthana. Babiloone baanaw koyonna ixiko attanaw danda7aasa. Biitta ubbay ne sinthan de7ees; nena lo77ida bessi awuka ba” yaagis.

5 Ermiyaasi iya matape boonna de7ishin, Nabuzardaani gujidi yaagis; “Safaana na7aa, Akqaama na7aa Godoliyako ba. Babiloone kawoy Nabukadanaxoori iya Yihuda katamata haariya asi oothidi shuumis. Hessa gisho, iyara issife yan asaara de7a; woyko nena lo77ida bessi awuka ba” yaagis. Kawa naageysata halaqay iyaw shinqenne hara imota immidi yeddis. 6 Ermiyaasi Mixiphan de7iya Akqaama na7aa Godoliyako bis. I yan attida asaara issife de7is.

7 Yihuda toora moconatapene olanchotape guuthati Babiloone kawas kushe immibookona. Enti Babiloone kawoy, Akqaama na7a Godoliya biitta haareysa oothidi shuumidaysanne Babiloone di7etidi boonna Yihudan attida manqotas halaqa oothidaysa si7idosona. 8 Naatana na7ay Isma7eeli, Qareya nayti Yohaaninne Yoonataani, Tanhumeta na7ay Sarayi, Naxoofa addiya Yoofa naytinne Ma7ika addiya na7ay Yazaani banta olanchota ubbaara Godoliyako Mixipha yidosona. 9 Safaana na7ay, Akqaama na7ay Godoliya entaw haysada yaagidi caaqis: “Babiloonetas kushe immanaw yayyofite; he biittan de7ite. Babiloone kawas haaretite; ubbabay hintew inje gidana. 10 Ta Mixiphan uttada, Babiloone biittafe hintera gahetanaw yaa ubbaara hinte doona gidada odetana. Shin hinte de7iya bessan woyne, shamaho zaytenne hara katha ayfe ubbaa shiishidi dagayite” yaagis.

11 Moo7aben, Amoonen, Edoomeninne hara biittatan de7iya Ayhude ubbay Babiloone kawoy, guutha Yihuda asati Yihudan attana mela oothidaysanne Safaana na7a Akqaama na7a Godoliya enta bolla shuumidaysa si7idosona. 12 Enti laaletidi de7iya banta biittafe Yihuda simmidi, Godoliya de7iya bessaa Mixipha yidosona. Yan enti daro woynenne hara katha ayfe shiishidi dagaayidosona.

13 Hessafe guye, Qaraya na7ay Yohaaninne kushe immiboona toora moconati ubbay Godoliyako Mixipha yidi, 14 “Amoone kawoy Ba7alisi nena wodhana mela Naatana na7aa Isma7eela yeddidaysa eray?” yaagidosona. Shin Akqaama na7ay Godoliya enti odaa ammanonna ixis.

15 Qaraya na7ay Yohaani Mixiphan de7iya Godoliyako yidi, “Oonika eronna de7ishin bada, Nataniyaa na7aa Isma7eela ta wodhana. I nena wodhiko, ne matan shiiqida Ayhude ubbay laaletana; qassi Yihudan attida asa ubbay wurana” yaagis.

16 Shin Akqaama na7ay Godoliya zaaridi, “Isma7eelaba ne odiya ubbay wordo gidiya gisho hessa melaba oothofa” yaagis.