1 Tora moconati ubbay, Qaraya na7ay Yohaani, Hoshaya na7ay azariyaas asa ubbay, guuthafe gita gakanaw, 2 nabiya Ermiyaasako yidi, “Nu nena oychiyaba nuus ootharki. Attida nu gisho Godaa ne Xoossaa woossarki. Nu kase daro; shin ha77i ne be7eysada guutha asa xalaali attida. 3 Nu biya ogiyanne nu oothanaba I nuna bessaana mela Godaa ne Xoossaa nu gisho woossa” yaagidosona.

4 Nabey Ermiyaasi zaaridi, “Lo77o; hinte oyshaada, Godaa hinte Xoossaa ta woossana; hintefe aykoka qosonna I odiyaba ubbaa hintew odana” yaagis.

5 Enti zaaridi, Ermiyaasako, “Goday ne Xoossay ne baggara nuna kiittiyaba ubbaa nu polonna ixiko, Goday ba huuphen nu bolla tumanne ammanetida marka gido. 6 Nu dosiyaba gidin, ixiyaba gidin, nu nena iyako kiittiya Goday, nu Xoossay kiittiyaba nu oothana. Nu iyaw kiitetiko, nuus ubbabay inje gidana” yaagidosona.

7 Tammu gallasape guye, Godaa qaalay Ermiyaasako yis. 8 Qaraya na7aa Yohaana, iyara de7iya toora moconatanne asa ubbaa, guuthafe gita gakanaw xeegidi, 9 Hinte woosa ta iyako shiishana mela hinte tana kiitida Goday Isra7eele Xoossay haysada yaagees. 10 “ ‘Ta kase hinte bolla ehida iitabay tana azzanthida gisho, hinte ha biittan uttiko, ta hintena keexanape attishin, laallike; tokanape attishin, shoddike. 11 Hinte ha77i yayiya Babiloone kawas aykoka yayyofite. Hintena iya kushepe ashshanaw ta hintera de7iya gisho yayyofite. 12 Ta hintew qadhetana; yaatada I hintew qadhetidi, hintena hinte biitta zaarana mela oothana’ yaagees Goday.

13 “Gidoshin, hinte Godaas, hinte Xoossaas kiitetonna ixidi, ha biittan uttoko giiko, 14 qassi hinte, ‘Ola worenne olas punniya moyze si7onnanne koshi bayna Gibxe bidi, yan daana’ giiko, 15 hinteno, Yihudan attida asaw, Goday giyaba si7ite. Ubbaafe Wolqaama Goday, Isra7eele Xoossay haysada yaagees: ‘Hinte Gibxe bidi, yan daanaw qofa qachiko, 16 hinte yayyida olay Gibxen hintena oykana; hinte hirgida koshay hintena kaallidi baana; hinte yan Gibxen hayqana. 17 Gibxe bidi daanaw qofa qachida asa ubbay olan woyko koshan woyko boshan hayqana. Ta enta bolla ehiya iitaape issoyka kessi ekenna woyko attenna’ yaagees.

18 “Ubbaafe Wolqaama Goday, Isra7eele Xoossay, ‘Yerusalaamen de7eyisata bolla ta hanqoynne ta yiloy gukidaysada, hinte Gibxe geliya wode hinte bolla ta hanqoy hessada gukana. Hinte dagamas, cashshas, baadethasinne miicha attana; ha bessaa zaaridi be7eketa’ yaagees.

19 “Yihudan attidaysato, Goday hinteko, ‘Gibxe boopite!’ yaagis. Ta hachi hinteko, ‘Naagetite’ geysa si7ite. 20 Hinte taako, ‘Nu gisho Godaa nu Xoossaa woossa; I new odiyaba ubbaa nuus oda; nu oothana’ yaagidi, tana Godaako, hinte Xoossaako, kiittideta; hessan gita bala balideta. 21 Ta I gidaba ubbaa hachi hintew odas. Shin Goday hinte Xoossay ta baggara hintew kiitida qaalas kiitetonna ixideta. 22 Hiza, haysa si7ite; hinte bidi daanaw koyiya biittan hinte olan, koshaninne boshan hayqidi wurana” yaagis.