1 Amoonebaa Goday haysada yaagees; “Isra7eeles adde na7i baawee? Iya laattey baawee? Yaatin, Moloka geetetiya eeqa xoossaa goyinniya asati Gaade biitta ayis oykidona? Enta kataman ayis uttidona? 2 Amoone biittan Raaba katamaa bolla ola waasoy si7etana mela ta oothana wodey yaana. He katamay laaletidi baysa gidana. Iya yuushuwan de7iya gutati taman xuugetana. Isra7eeley bana ba biittafe gooddidaysata gooddana” yaagees Goday.

3 “Haseboona asaw, Gaye katamay laaletida gisho zeleelite. Raaba asaw, yeekite; kayo ma7o ma7idi kayotite; katamaa gimbiya giddon woxeretite. Hinte xoossay Moloki ba kahinetaranne ba halaqatara di7etis. 4 Ammanoy bayna asaw, ‘Nuna olanay oonee?’ yaagidi hinte duretethaaninne hinte aradda zangaaratan ayis ceeqetetii? 5 Ta ne yuushuwan de7eysati nena daganthana mela oothana” yaagees Goday, Ubbaafe Wolqaama Xoossay. Hinte ubbay keyidi baqatana gisho baqatidi bidaysata shiishiya asi dhayana.

6 “Gidoshin, wursethan ta Amoone asaa zaarada oorathana” yaagees Goday.

7 Edoomeba Ubbaafe Wolqaama Goday haysada yaagees; “Temaana asaas de7iya cincatethay aw bidee? Zoreysatape zorey dhayidee? Enta cincatethay entafe eketidee? 8 Taani Eesawe kochaa seeriya wode iya bolla dhayo ehana gisho, Dadaanen de7eysato, baqatidi aafon qosetite. 9 Woyne maxeysati poshile ashshokona? Kaysoti qamma geliko, bantaw koyaba xalaala ekokona? 10 Shin ta Eesawa kochaa qaarada kallo ashshana; enti qosetanaw danda7onna mela, enti qosetiya bessa qaarada qonce bessi oothana. Eesawe sheeshay, iya dabbotinne iya shooroti ubbay dhayana; entafe issoyka attenna. 11 Hinte giddon de7iya yi7o nayta aggaagite; enta ta dichana. Hinte am7etika tanan ammaneto” yaagees.

12 Goday haysada yaagees; “Hiza seera ekanaw bessonna asas seeretethi attonnaba gidiko, hinte waanidi seerettonna attanee? Tuma hinteka seera xuu7ape uyeetape attishin, coo atteketa. 13 Baasora katamay baysa gididi attana; iya be7ida asa ubbaas dagamas, qelqisethasinne baadethas attana. Iya yuushuwan de7iya guta ubbay merinaw laaletidi attana. Haysa taani ta sunthan caaqayis” yaagees Goday.

14 Taani Godaape yida issi kiita si7as. Kawotethata giddo kiitetidaysi, “Edoome teqanaw shiiqite; iyara oletanaw dendite” yaagis.

15 “Hiza, ta nena kawotethata giddon guuthana; asaa giddon kadhetida asi oothana. 16 Shucha qophoninne dere bolla de7eyso, ne daganthoynne ne otoroy nena cimmis. Ne keethaa arganthada dhoqan keexikoka, ta nena yaape duge wodhisana” yaagees Goday.

17 “Edoomey ase daganthiya biitta gidana. Yaara aadhiya asa ubbay iya dhayuwa be7idi, dagammana; malaaletana. 18 Soodomeynne Gamoori banta yuushuwan de7iya katamatara dhayiya wode hanidaysada oonika yan deenna; asi yan uttenna” yaagees Goday.

19 “Yordaanose shaafa lanqen de7iya woraape dorsati heemetiya lo77o qooroy de7iya bessaa, qoponna keyiya gaammoda, ta Edoome asata qoponna enta biittafe yedethana. Ta doorida asi iya bolla shuumana. Ta meli oonee? Ta oothana gidaba teqanaw danda7ey oonee? Taara eqetanaw danda7iya henthanchoy oonee?

20 “Ta Edoome bollanne Temaana katamaa bolla oothanaw halchidabanne qopidaba si7ite. Enta nayta wolqan goochidi efana; hessa gaason enta soo asay dagammana. 21 Edoome kundethaa girsay biitta qaathana; Edoometa waasoy Zo7o Abbaa gakanaw si7etana. 22 Arganthi ba qefiya miccidi duge paallidi yeysada, morkey Baasora bolla yaana. He wode Edoome olanchoti iqethi oykida maccasada hirgana” yaagees.

23 Damasqoba Goday haysada yaagees; “Iita oda si7ida gisho, Hamaatanne Arfada katamatan de7iya asay yeellatis; yayyis. Zuley shocida abbada enta wozanay shempo demmanaw danda7ibeenna. 24 Damasqoy daaburis; enti dagaman kokoridi baqatidosona; maccas iqethi oykeysada metoynne un7i enta oykis. 25 Ufaysi kumida eretida katamay waanidi baysa gididee? 26 He wode he kataman de7iya yalaga addeti katamaa giddo ogetan hayqana; olanchoti ubbay wurana. 27 Taani Damasqo katama dirsa gimbiyan tama yeddana; he tamay Wolde-Adara miixa maana” yaagees Ubbaafe Wolqaama Goday.

28 Babiloone kawoy Nabukadanaxoori olidi xoonida Qedaarenne Haxoora kawotethatabaa Goday haysada yaagees; “Dendidi, Qedaare asaa olite; doloha baggara de7iya asaa wursite. 29 Enta dunkaanetanne enta wudeta ekite. Enta gesheta, enta shaluwanne enta gimaleta ekite. Yaatidi entaw, ‘Hinte yuushuwan dagami de7ees’ yaagidi odite. 30 Haxooran de7eysato, Babiloone kawoy Nabukadanaxoori hinte bolla iitabaa oothanaw maqetidi uttida gisho, baqatite; aafon qosetite” yaagees Goday.

31 “Dendada; hirgi bayna saro de7iya kawotethata ola. Enta katama gimbiyas ibithi woyko kobey baawa; enti bantarka de7oosona.

32 “Enta gimaleti bonqetana; enta wudey di7etana. Banta huuphiya gaxaa meedeyisata carkon laallana; ta ubba bessara enta bolla dhayo ehana. 33 Haxoori merinaw workanati de7iya mela biitta gidana. Oonika yan deenna; asi yan uttenna” yaagees Goday.

34 Yihuda kawoy Sedeqiyaasi koyro kawotida wode, Elaamaba Godaape Ermiyaasako yida qaalay haysa; 35 Ubbaafe Wolqaama Goday haysada yaagees; “Elaamas wolqa gidida donge dukiya asata ta wodhana. 36 Ubba bessara ta Elama bolla carko ehana; enta he carkuwan laallana. Hessa gisho, Elama asay laaletidi gakonna biitti deenna. 37 Enta morketa sinthaninne enta wodhanaw koyeyisata sinthan ta Elama daganthana. Ta gita hanquwan enta bolla dhayo ehana. Ta enta dhaysana gakanaw mashshan yedethana. 38 Taani Elama kawanne enta halaqata dhaysada ta araata yan wothana. 39 Gidoshin, wursetha wode taani Elama zaarada oorathana” yaagees Goday.