Yohaanisi Xaafida
Yesuus Kiristoosa Wongela
Gaatha Qofa
Yohaanisi Yesuusa, “Ase gididi asa giddon bentida Xoossa Qaala” yaagidi qoncisees. Ha wongelay xaafetiday, maxaafa nabbabiya oonika Yesuusi ase ashshanaw yaana geetetida Xoossa Na7a gideysa ammanana melanne iya ammaneysatas merina de7oy de7eysa enti erana melasa (20:31).
Wongelas koyro kifiley merinaw de7iya Xoossa qaalaynne Yesuusi issino gideysa odees. Yohaanisa wongelay, Yesuusi ashsheysa gididi yaana gida Xoossa Na7a gideysa bessiya dumma dumma malaatata qoncisees. Ha wongela xaafey, Yesuus Kiristoosi ba huuphen tuma Xoossa Na7anne Xoossa aawara issino gideysa (1:1) qoncisis. Yesuusi ba huuphen, “Taani Abrahaamepe kase de7ayis” (8:58) yaagis. Wursethan Toomasi, “Ta Godaw, ta Xoossaw” yaagidi xeegis (20:28). Hessafe kaallidi, ha malaatatape bentida ayfiya odiya taariketi kaalloosona. Ha kifiley issi issi asi Yesuusa ammanidi iya kaalliya asi gididaysa odees; qassi harati iyara waanidi eqetidakonne waanidi ammanonna ixidaako odoosona. Shempo 13-17 gakanaw Yesuusi oyketida omarsi, ba tamaaretara iyaw ay mela mino gahetethi de7iyako, qassi wontetha gallas kaqetanaape sinthe giigetethinne minthetho qaala entaw odidaysa qoncisees. Wursetha shempoti Yesuusi oyketidabanne pirdas shiiqidaba, iya kaqetetha, iya denduwanne ba tamaaretas qoncida qoncetha odoosona.
Maxaafa Ayfe Qofata
Gelo qofa (1:1-18)
Xammaqiya Yohaanisanne koyro Yesuusa tamaareta (1:19-51)
Yesuusi qoncen ooso oykis (2:1—12:50)
Yerusalaame heeran aathida wursetha saaminta (13:1—19:42)
Hayqope dendonne asaas bentuwa (20:1-31)
Galilan zaaridi ba tamaaretas bentuwa (21:1-25)
1
De7o Qaala
1 Qaalay koyro de7ees. Qaalayka Xoossara de7ees; he Qaalay Xoossaa. 2 Koyrope Qaalay Xoossara de7ees. 3 Xoossay ubbaba Qaala baggara medhis. Medhetidabaape issoyka iya baggara medhetonabay baawa. 4 Iyan de7oy de7ees; he de7oy asaas poo7o. 5 Poo7oy dhuman poo7ees; dhumay poo7uwa xoonibeenna.
6 Xoossay kiitida, issi Yohaanisa geetetiya asi de7ees.Maato 3:1; Mar 1:4; Luqa 3:1-2. 7 Asa ubbay poo7uwan ammanana mela I poo7os marka gididi yis. 8 I poo7uwabaa markatanaw yisipe attishin, ba huuphen poo7o gidenna. 9 Asa ubbaas poo7isiya tuma poo7oy alamiya yees.
10 Qaalay alamen de7is. Xoossay Qaalan alamiya medhis, shin alamey iya eribeenna. 11 I ba asaako yis, shin iya asay iya ekibookona. 12 Shin I bana ekidaysatasinne iya sunthan ammanidaysatas Xoossaa nayta gidana mela maata immis. 13 Enti Xoossafe yeletidosonape attishin, asi yeletiya wogan woyko adde shenen woyko asa amon yeletibookona. Xoossay I enta aawa.
14 Qaalay ase gidis; aadho keehatethaanne tumaa kumidi nu giddon de7is. I aawas issi na7aa gididi ekida iya bonchuwa nuuni be7ida.
15 Yohaanisi iyabaa markatis. Ba qaala dhoqu oothidi, “Taani, ‘Taape guyera yeysi taape kase de7iya gisho taape aadhees’ gada markatidaysi haysa” yaagis.
16 Nuuni ubbay iya aadho keehatetha kumethaafe anjo bolla anjo ekida. 17 Xoossay higgiya Muse baggara immis, shin aadho keehatethaynne tumatethay Yesuus Kiristoosa baggara yis. 18 Xoossaa be7ida asi oonika baawa; ba Aawa matan de7iya issi Na7aa xalaali baw Xoosse gididaysi iya qoncisis.
Xammaqiya Yohaanisa Markatethi
(Maato 3:1-12; Mar 1:1-8; Luqa 3:1-8)
19 Yerusalaamen de7iya Ayhude halaqati, kahinetanne Leeweta, “Neeni oonee?” gidi, Yohaanisa oychana mela iyako kiittin, Yohaanisi entaw markatida markatethay haysa.
20 Yohaanisi, “Taani Kiristoosa gidike” yaagidi, geeshshidi markatisipe attishin, kaddibeenna.
21 Enti, “Yaatin, neeni oonee? Neeni Eeliyaaseyee?” yaagidi oychidosona.Milki 4:5; Zaare 18:15-18.
Yohaanisi, “Akay, gidike” yaagis.
Qassi enti, “Neeni yaana geetetida nabiyayee?” yaagidi oychidosona.
Yohaanisi, “Akay” gidi zaaris.
22 Yaatin, “Neeni oonee? Nuuni nuna kiitidaysatas odana mela neeni nena oona gay?” yaagidosona.
23 Yohaanisi zaaridi, “Nabiya Isayaasi gidaysada,
“ ‘Godaa ogiya suurisite!’
gidi mela biittan waassiya uraa qaalay tana”
yaagis.Isa 40:3.
24 Qassi Farsaaweti kiitida asati 25 Yohaanisako, “Neeni Kiristoosa woyko Eeliyaasa woyko nabe gidonna ixiko, yaatin ayis xammaqay?” gidi oychidosona.
26 Yohaanisi zaaridi, “Taani haathan xammaqayis, shin hinte eronna asi hinte giddon eqis. 27 I taape guyera yees. Taani hari attoshin iya caammaa wodoruwa billanaw bessike” yaagis.
28 Hessi ubbay Yordaanose Shaafape hefinthan, Bitaane kataman, Yohaanisi xammaqiya bessan hanis.
Yesuusi Xoossa Dorse
29 Yohaanisi wontetha gallas Yesuusi baako yishin be7idi, “Alamiya nagaraa quchiya Xoossaa Dorsay haysa! 30 Taani, ‘Taape guyera issi asi yaana. I taape kase de7iya gisho taape aadhees’ gada odidaysi haysa. 31 I ooneko taani erike. Shin Isra7eele asaas iya qoncisanaw haathan xammaqashe yas” yaagis.
32 Yohaanisi haysada yaagidi markatis: “Geeshsha Ayyaanay salope holleda wodhishininne iyara de7ishin be7as. 33 Hessi hananaape kase taani iya erike. Shin haathan xammaqanaw tana kiitida Xoossay, ‘Geeshsha Ayyaanay wodhidi iyara de7ishin neeni be7anaysinne Geeshsha Ayyaanan xammaqanaysi iya’ yaagidi taw odis. 34 Taani hessi hanishin be7ada, I Xoossaa Na7aa gididaysa markatayis” yaagis.
Koyro Yesuusa Tamaareta
35 Qassi wontetha gallas Yohaanisi ba tamaaretape nam7atara issife eqis. 36 Yesuusi aadhishin, Yohaanisi be7idi, “Xoossaa dorsay haysish!” yaagis.
37 Yohaanisa nam7u tamaareti Yohaanisi geysa si7idi Yesuusa kaallidosona. 38 Yesuusi bana kaalleyisata guye simmi be7idi, “Ay koyeetii?” yaagidi oychis.
Enti zaaridi, “Astamaariyaw, neeni awun de7ay?” yaagidosona.
39 Yesuusi entako, “Haa yidi be7ite” yaagis. Enti bidi I de7iyasuwa be7idosona. He gallas sa7i tammu saate heera gidiya gisho iya matan pee7idosona.
40 Yohaanisi gidaysa si7idi, Yesuusa kaallida nam7u tamaaretape issoy, Simoon Phexroosa ishaa Indiriyasa. 41 Indiriyasi koyro ba ishaa Simoonara gahetidi, “Nuuni Kiristoosa demmida” yaagis. 42 Indiriyasi Simoona Yesuusako ehis.
Yesuusi Simoona be7idi, “Neeni Yoona na7aa Simoona; ne sunthay Keefa*Keefa: Giya qaalay Aramike doona gidishin, Girike doonan birshethay Phexroosa woyko zaalla guussu. gidi xeegetana” yaagis.
Filphoosanne Natina7eela Xeegetethaa
43 Wontetha gallas Yesuusi Galila biitta baanaw qofa qachis. I Filphoosara gahetidi, “Tana kaalla!” yaagis. 44 Filphoosi, Indiriyasinne Phexroosi de7ida Beetesayda katamaape yida ase.
45 Filphoosi Natina7eelara gahetidi, “Musey higge maxaafan, qassi nabetika iyabaa xaafida Yoosefa na7aa Naazirete Yesuusa nuuni demmida” yaagis.
46 Natina7eeli zaaridi, “Naazirete katamaape lo77obay keyanaw danda7ii?” yaagis.
Filphoosi, “Yada be7a” yaagis.
47 Natina7eeli baako yeysa Yesuusi be7idi, “Geney bayna tuma Isra7eele asi haysa!” yaagis.
48 Natina7eeli Yesuusako, “Neeni tana awun eray?” yaagis.
Yesuusi zaaridi, “Filphoosi nena xeeganaape sinthe, neeni balase mithaa garsan de7ishin taani nena be7as” yaagis.
49 Natina7eeli zaaridi, “Astamaariyaw, neeni Xoossaa Na7aa! Neeni Isra7eele kawo!” yaagis.
50 Yesuusi iyako, “Taani nena balase mithee garsan be7as gida gisho ammanay? Neeni haysafe aadhiyaba be7ana!” yaagis. 51 Qassi Yesuusi, “Taani hintew tuma odayis; saloy dooyetin, Xoossaa kiitanchoti Asa Na7aa bolla keyishininne wodhishin hinte be7ana” yaagis.Medhe 28:12.