1 Yesuusi Yohaanisape daro kaalliya asaa baako shiisheysanne xammaqeysa Farsaaweti si7idosona. 2 Gidikoka Yesuusa tamaareti xammaqidosonape attishin, Yesuusi oonaka xammaqibeenna. 3 Yesuusi asay iyabaa geysa si7ida wode Yihudape dendidi Galila bis. 4 I, Galila bishe Samaarera aadhanaysi attonnaba gidis.

5 Hessa gisho, Yayqoobi ba na7aa Yoosefas immida gadiya matan de7iya Sikaare geetetiya Samaare katamaa bis.Medhe 33:19; Iyya 24:32. 6 He bessan Yayqooba haatha ollay de7ees. Yesuusi hemethan daaburidi he haatha olla matan uttis. He wode sa7i usupun saate heera.

7 Issi Samaare katamaa maccas he ollaafe haathe tikanaw yasu. Yesuusi he maccaseeko, “Tana haathe ushsharki” yaagis. 8 He wode Yesuusa tamaareti kathi shammanaw katama bidosonashin.

9 He maccasiya zaarada, “Neeni Ayhude ase gidashe, Samaare maccas gidiya tana waanada haathe ushsha gay?” yaagasu. Hessa iya giday Ayhudeti Samaaretara gahetonna gishosa.Izi 4:1-5; Nahi 4:1-2.

10 Yesuusi zaaridi, “Neeni Xoossa imotanne haathe tana ushsha geysi ooneko eridaba gidiyako iya ne woossana; ika new de7o immiya haathi immanashin” yaagis.

11 Maccasiya zaarada, “Godaw, new duuqiyabay baawa; ollayka ziqa. Yaatin, de7o immiya haathi ne awupe ekanee? 12 Nuus ha haatha olla immida nu aawa Yayqoobape neeni aadhay? I, iya naytinne iya mehey ha ollaafe uyidosona” yaagasu.

13 Yesuusi, “Ha haathaafe uyida oonika zaari saamotana. 14 Shin taani immana haatha uyaa oonika ubbaka saamotenna. Taani immiya haathay iya giddon merinaa de7o immiya goggiya pulto gidana” yaagis.

15 Maccasiya zaarada, “Godaw, taani saamotonna melanne haathe tikanaw ha bessaa yoonna mela taw he haatha imma” yaagasu.

16 Yesuusi iiko, “Bada ne azinaa xeegada ya” yaagis.

17 Maccasiya zaarada, “Taw azini baawa” yaagasu.

Yesuusi iiko, “Taw azini baawa gashe balabaka. 18 New kase ichashu azinati de7oosona. Ha77i neera de7iya addey ne azina gidenna. Neeni ha77i tuma odadasa” yaagis.

19 Maccasiya zaarada, “Godaw, neeni nabe gideysa taani eras. 20 Nu aawati ha zumaa bolla Xoossaa goyinnidosona. Shin hinte Ayhudeti asi Xoossas goyinnanaw bessiya bessay Yerusalaamena geeta” yaagasu.

21 Yesuusi, “Ha maccasete tana ammana; ha zumaa bolla woyko Yerusalaamen Aawas hinte goyinnona wodey yaana. 22 Hinte Samaareti eronnaysa goyinneta. Shin nuuni atotethay Ayhudepe yaa gisho nu ereysa goyinnoos. 23 Shin Aawas tuman goyinneysati Ayyaananinne tumatethan goyinnana wodey matatis; ha77ika gakis. Hiza, Aaway koyey haysa mela ogiyan goyinneyisata. 24 Xoossay Ayyaana; iyaw goyinneysati Ayyaananinne tumatethan goyinnanaw bessees” yaagis.

25 Maccasiya zaarada, “Kiristoosi yaanaysa taani erayis. I yaa wode nuus ubbaba odana” yaagasu.

26 Yesuusi, “Ha neera odetey taani iya” yaagis.

27 Enti odetishin, Yesuusa tamaareti bida bessaafe simmidosona. Yesuusi maccasara odetishin enti be7idi daro malaaletidosona. Shin maccaseeko, “Ay koyay?” Woyko Yesuusako, “Iira ayis odetay?” giday oonika baawa.

28 Hessafe guye, maccasiya ba haatha otuwa aggada guye katamaa bada asaako, 29 “Taani oothidaba ubbaa taw odida addiya be7anaw yedhite. I Kiristoosa gidandesha?” yaagasu. 30 Asay katamaape keyidi Yesuusako bidosona.

31 Hessi hanishin, iya tamaareti Yesuusako, “Guuthaba marki” yaagidi woossidosona.

32 Shin I, “Taw hinte eronna kathi ta meysi de7ees” yaagis.

33 Hessa gisho, iya tamaareti banta giddon, “Iyaw miyaba asi ehonna aggenna” yaagidosona.

34 Yesuusi entako, “Ta kathay tana kiittidaysa sheniya oothanaysanne iya oosuwa polanaysa. 35 Hinte, ‘Oyddu ageenape guye kathay caketana’ geeketiyee? Shin taani hintew odayis; kathay kaxidi shiishoos gakidaysa loythi xeellite. 36 Zereysinne cakeysi issife ufaytana mela cakeysi damooziya ekees qassi kathaa merinaa de7os shiishees. 37 Hiza, ‘Issoy zerees; hankoy qassi cakees’ giya oday tuma. 38 Hinte daaburiboonaysa shiishana mela taani hintena kiittas. Harati oothi daaburidasuwan gelidi hinte enta daabura ayfiya ekideta” yaagis.

39 Maccasiya, “I, taani oothida ubbaba odis” gada markatida gisho he kataman de7iya Samaare asaape daroti Yesuusa ammanidosona. 40 Samaare asay Yesuusako yidi, banta matan gam7ana mela Yesuusa woossin I yan nam7u gallas uttis.

41 I odiya qaala gisho kaseysafe daro asay ammanidosona. 42 Qassi enti maccaseeko, “Ha77i nu ammaney nu huuphen I geysa si7ida gishosafe attishin, neeni markatida gishosa gidenna. Qassi I tuma ha alamiya ashsheysa gideysa nuuni erida” yaagidosona.

43 Nam7u gallasape guye, Yesuusi yaape keyidi Galila biitta bis. 44 Yesuusi ba huuphen, “Nabey ba biittan bonchetenna” yaagidi kasetidi odis.Maato 13:57; Mar 6:4; Luqa 4:24. 45 Yesuusi Galila gakida wode Galila asay iya mokidosona. Ayis giiko, Paasika Ba7aale bonchiya gallas enti Yerusalaamen de7iya gisho I oothidaba ubbaa be7idosona.Yoha 2:23.

46 Yesuusi haatha woyne ushshi laammida bessaa, Galilan de7iya Qaana katama bis. Qifirnahooman kawo keethan oothiya issi shuumas na7ay hargetis.Yoha 2:1-11. 47 Yesuusi Yihudape Galila yidaysa he shuumay si7idi iyako yis. Hayqanaw matida ba na7aa bidi pathana mela Yesuusa woossis.

48 Yesuusi shuumako, “Xoossay oothiya malaatatanne oorathabata be7onna de7ishe hinte ubbaraka ammaneketa” yaagis.

49 Shuumay zaaridi, “Godaw, ta na7ay hayqonna de7ishin taara yedharki” yaagis.

50 Yesuusi, “Ne soo ba; ne na7ay paxana” yaagis.

He shuumay Yesuusi gidaysa ammanidi ba soo bis. 51 I ba soo bishin iya aylleti iyako yishe iyara ogen gahetidi, “Ne na7ay paxis” gidoosona.

52 I ba aylleta ba na7aas ay saaten lo77idaako oychis. Enti zaaridi, “Zine laapun saaten mishay aggis” yaagidosona. 53 Na7aa aaway Yesuusi baako, “Ne na7ay paxana” giday he saatiyan gideysa akeekis. Hessa gisho, inne iya soo asa ubbay ammanidosona.

54 Hessi Yesuusi Yihudape Galila yidi oothida nam7antho malaata.