1 Hessafe guye, Ayhudeti Yesuusa wodhanaw koyiya gisho I Yihuda aggidi Galilan simeretees. 2 Ayhudeti bonchiya Shaqara Ba7aaley bonchetanaw matis.Leewe 23:34; Zaare 16:13. 3 Hessa gisho, Yesuusa ishati, “Ne tamaareti neeni oothiya malaatata be7ana mela haysafe dendada Yihuda biitta ba. 4 Baw eretanaw koya asi oonika ba oosuwa genthenna. Neeni haysata oothada nebaa alamiya erisa” yaagidosona. 5 Iya ishati hessa giday iyan ammanibona gishosa.

6 Yesuusi entako, “Taw inje wodey gakibeenna, shin hintew ubba wodey injetees. 7 Alamey hintena ixanaw danda7enna, shin taani alamiya oosoy iita gideysa markatiya gisho tana ixees. 8 Hinte baaliya biite; ta wodey gakiboonna gisho taani baaliya biike” yaagis. 9 I hessa gidi Galilan attis. 10 Iya ishati ba7aale bonchanaw bidaape guye Yesuusi oonaka erisonna qosan he bessaa bis. 11 Ayhudeti ba7aale bonchiya bessan, “I awun de7ii?” yaagidi iya koydosona.

12 Asay kalkashidi iyabaa odetoosona. Baggay, “I lo77o asi” giya wode harati qassi, “Akay, I asaa balethees” yaagosona. 13 Shin Ayhude halaqatas yayyida gisho oonika iyabaa qoncen odetenna.

14 Baaliya bonchidi giddo gathiya wode Yesuusi Xoossa Keethi bidi tamaarso oykis. 15 Ayhudeti, “Ha addey timirte tamaaronna haysa ubbaa waati eridee?” yaagidi malaaletidosona.

16 Yesuusi zaaridi, “Ta tamaarsiya timirtey tana kiitida Xoossaa matape yaa timirtefe attishin, tabaa gidenna. 17 Xoossaa sheniya oothanaw koyiya oonika ha timirtey Xoossaa matape yaakonne woyko taani taape odiyako erana. 18 Babaa odiya oonika ba huuphe boncho koyees. Shin bana kiittidaysa bonchuwa koyiya oonika I tumancho; iyan wordoy baawa. 19 Musey hintew higgiya immis, shin hintefe oonika higgiya naagibeenna. Yaatin ayis tana wodhanaw koyeetii?” yaagis.

20 Asay zaaridi, “Nena Xalahey oykis; nena wodhanaw oonee koyey?” yaagidosona.

21 Yesuusi, “Taani issi malaata oothin hinte ubbay malaaletideta. 22 Hinte, hinte nayta qaxarana mela Musey kiittis. Shin qaxaro hinte mayzati doomidosonape attishin, Muse gidenna. Hessa gisho, hinte Sambaata gallas adde nayta qaxareeta.Leewe 12:3; Medhe 17:10. 23 Muse higgey kiitida gisho, hinte Sambaata gallas qaxariyabaa gidiko, taani issi asa kumetha asatethaa pathida gisho, taara ayis kacceetii?Yoha 5:9. 24 Tuma pirda pirditepe attishin, asa som7o be7idi pirdofite” yaagis.

25 Yerusalaame asaape issoti issoti, “Enti wodhanaw koyiya uray haysa gidennee? 26 Heko, I qoncen odees; enti iya aykoka gookona. I Kiristoosa gideysa Ayhude halaqati tuma eridonaasha? 27 Kiristoosi yaa wode I awupe yaako oonika erenna, shin I awupe yidaako nu eroos” yaagidosona.

28 Yesuusi xoossa keethan tamaarsishe ba qaala dhoqu oothidi, “Tuma hinte taani oonekonne ta awupe yidaako ereetii? Taani ta maatan yabiike, shin tana kiittidaysi tumancho; hinte iya ereketa. 29 Shin taani I kiittin iya matape yida gisho iya erayis” yaagis.

30 Hessa gisho, enti iya oykanaw koydosona. Shin iya wodey buroo gakiboonna gisho oonika iya bolla kushe wothibeenna. 31 Shin daro asay Yesuusa ammanidi, “Kiristoosi yaa wode ha uray oothida malaatatape dariya malaata oothaneyee?” yaagidosona.

32 Farsaaweti daro asay Yesuusaba kalkasheysa si7idosona. Kahine halaqatinne Farsaaweti iya oythidi qashisanaw Xoossa Keethi naageysata kiittidosona.

33 Yesuusi, “Taani hintera guutha wode gam7ana; hessafe guye tana kiittidaysako baana. 34 Hinte tana koyana, shin demmeketa. Taani de7iyasuwa hinte yaanaw danda7eketa” yaagis.

35 Ayhudeti issoy issuwara, “Haysi nuuni demmonaso aw baana hanii? Girike kataman de7iya Ayhudetako bidi Giriketa tamaarsanaw haniyee? 36 ‘Hinte tana koyana, shin demmeketa’ qassi, ‘Taani de7iyasuwa hinte yaanaw danda7eketa’ guussay ay guussee?” yaagidosona.

37 Baaliya bonchiya gallasatape wolqaamanne wursetha gallasan Yesuusi dendidi, ba qaala dhoqu oothidi, “Saamotida oonika taako yidi uyo.Leewe 23:36. 38 Tana ammaniya oonika Geeshsha Maxaafay gidaysada de7o immiya pulto haathay iyape goggana” yaagis.Hiz 47:1; Zaka 14:8. 39 I hessa giday iya ammanidaysati ekanaw de7iya Geeshsha Ayyaanaba. Yesuusi buroo bonchetiboona gisho, he wode Geeshsha Ayyaanay imetibeenna.

40 He asaape daroti I geysa si7idi, “Tuma haysi nabiya”*Nabiya: Ha bessan nabiya geetetiday yaana gidi enti naagiya nabiya qoncisees. (Yoha 1:21 xeellite.) yaagidosona.

41 Harati qassi, “Haysi Kiristoosa” yaagidosona.

Shin harati qassi, “Kiristoosi Galilape waanidi keyii? 42 Geeshsha Maxaafay, ‘Kiristoosi Dawita sheeshape Dawiti de7ida Beeteleme katamaape yaana’ yaageneyee?” yaagidosona.2 Same 7:12; Miki 5:2. 43 Hessa gisho, Yesuusa gaason asay banta giddon shaaketidosona. 44 He asaape issoti issoti iya oykanaw koydosona, shin oonika iya bolla kushe wothibeenna.

45 Xoossa Keetha naageysati kahine halaqatakonne Farsaawetako guye simmi yin enti, “Ayis iya ehibeketii?” yaagidi oychidosona.

46 Xoossa Keetha naageysati entako, “Ha addey odeteysatho oonika odetenna” yaagidi zaaridosona.

47 Farsaaweti zaaridi, “I hintenaka balethidee? 48 Ayhude halaqatape woyko Farsaawetepe iya ammanida asi de7ii? 49 Muse higgiya eronna ha asay baadetidaysata” yaagidosona.

50 Farsaawetape issoy qamma Yesuusako bida Niqodimoosi entako,Yoha 3:1, 2. 51 “Issi asi giyaba si7onna woyko I ay oothidaako eronna de7ishe koyrottidi iya bolla pirdeysi nu higgiyan de7ii?” yaagis.

52 Enti zaaridi, “Neenika qassi Galila biitta asee? Galila biittafe nabey keyonnaysa Geeshsha Maxaafape pilgada demma” yaagidosona. 53 Issoy issoy aggidi ba soo ba soo bis.