1 Yesuusi woosa ongidaape guye, ba tamaaretara Qediroona zangaara pinnidi, he bessan de7iya atakiltiya giddo gelidosona. 2 Yesuusi ubba wode ba tamaaretara yan shiiqiya gisho Yesuusa aathidi immida Yihudi he bessaa erees. 3 Hessa gisho, Yihudi paanose, xompe, tooranne gondalle oykida daro wotaadareta, kahine halaqatinne Farsaaweti kiitida Xoossa Keetha naagiya wotaadareta kaalethi ekidi, he bessaa bis.

4 Yesuusi bana gakana haniyaba ubbaa eridi, gaxa keyidi, “Oona koyeetii?” yaagis.

5 Enti zaaridi, “Naazirete Yesuusa koyoos” yaagidosona.

I zaaridi, “Taani Yesuusa” yaagis.

Yesuusa aathidi immida Yihudi yan entara eqis. 6 I, “Taani Yesuusa” gida wode enti guye shiiqidi, sa7an kundidosona. 7 Yesuusi qassika, “Oona koyeetii?” yaagidi oychis.

Enti, “Naazirete Yesuusa koyoos” yaagidosona.

8 I zaaridi, “Taani Yesuusa gideysa hintew odas. Hiza, hinte tana koyaba gidiko haysata yeddite” yaagis. 9 I hessa giday, “Aawaw, neeni taw immidaysatape hari attoshin issuwaka dhaysabike” gidaysi poletana melasa.

10 Simoon Phexroosas mashshay de7ees. I he mashsha shoddidi kahine halaqaa aylliyas ushacha haytha shocidi, qanxi yeggis. He aylliya sunthay Malkosa. 11 Yesuusi Phexroosako, “Ne mashsha shoohuwan zaara. Ta Aaway taw immida xuu7ape taani uyonnabaa new daanii?” yaagis.Maato 26:39; Mar 14:36; Luqa 22:42.

12 Roome wotaadaretinne enta halaqay Xoossa Keetha naagiya wotaadaretara issife Yesuusa oykidi qachidosona. 13 Koyro Yesuusa Haannako efidosona. Haanni he laythi kahine halaqa gidiya Qayyaafa bollo. 14 Qayyaafi, “Asa ubbaa gisho, issi asi hayqiko lo77o” gidi kase Ayhudeta zoridaysa.Yoha 11:49-50.

15 Simoon Phexroosinne hara issi tamaarey Yesuusa kaallidi bidosona. Kahine halaqay he hara tamaariya loythi erees. Hessa gisho, I Yesuusara kahine halaqaa zabbaa gelis. 16 Shin Phexroosi karera dirsaa pengen eqis. Kahine halaqay eriya hara tamaarey kare keyidi, pengiya naagiya na7ees odidi, Phexroosa gaathi gelsis. 17 Pengiya naagiya na7iya Phexroosako, “Neeni, he addiya tamaaretape issuwa gidikii?” yaagasu.

Phexroosi zaaridi, “Akay, taani gidike” yaagis.

18 Sa7ay meegiya gisho, aylletinne naageysati xiifa tama eethidi, kayoosona. Phexroosika entara eqidi tama kayees.

19 Kahine halaqay Yesuusa, iya tamaaretabaanne iya timirtiyaba oychis. 20 Yesuusi zaaridi, “Taani asa ubbaas qoncen odas. Taani Ayhude ubbay shiiqiya ayhude woosa keethaninne xoossa keethan ubba wode tamaarsas. Geeman aykoka odabike. 21 Yaatin, neeni tana ayis oychay? Ta odishin si7ida asaa oycha. He asay taani odidaysa eroosona” yaagis.

22 Yesuusi hessa gida wode, he bessan eqida wotaadaretape issoy Yesuusa baqidi, “Kahine halaqaas haysada zaaray?” yaagis.

23 Yesuusi zaaridi, “Taani iitabaa odidaba gidiko haysan de7iya asa ubbaa sinthan oda. Shin taani tuma odidaba gidiko tana ayis baqay?” yaagis.

24 Hessa gisho, Haanni, Yesuusi qashetida mela kahine halaqaa Qayyaafako yeddis.

25 Phexroosi yan eqidi, tama kayishin, harati iyako, “Neeni ha addiya tamaaretape issuwa gidikii?” yaagis.

Phexroosi zaaridi, “Akay, taani gidike” yaagidi kaddis.

26 Kahine halaqaa aylletape issoy, Phexroosi haythaa qanxida addiya dabboy, Phexroosako, “Taani nena iyara atakiltiya giddon be7abikina?” yaagidi oychis.

27 Phexroosi qassika kaddis; ellesidi kuttoy waassi aggis.

28 Wonta guura, enti Yesuusa Qayyaafa soope deriya haareysa ooso keethi eki efidosona. Ayhudeti Paasika Ba7aale kathaa maanaw bantana tunisonna mela deriya haareysa ooso keethaa gelibookona. 29 Hessa gisho, Philaxoosi entako kare keyidi, “Ha addiya ayis mootetii?” yaagis.

30 Enti, “I iita oothonnaba gidiyako nuuni iya neeko ehoko” yaagidosona.

31 Philaxoosi zaaridi, “Hinte iya eki efidi, hinte higgey geysada iya bolla pirdite” yaagis.

Ayhudeti, “Oonaka wodhiya maati nuus baawa” yaagidosona; 32 Hessi haniday Yesuusi ay mela hayqo hayqaneko erisanaw odidaysi poletanaasa.Yoha 3:14; 12:32.

33 Philaxoosi ba ooso keetha zaari gelidi, Yesuusa xeegidi, “Neeni Ayhude kawo?” yaagidi oychis.

34 Yesuusi Philaxoosa, “Ha oysha neeni neepe oychaye woyko hara asi new tabaa odidee?” yaagis.

35 Philaxoosi zaaridi, “Ta Ayhude asee? Ne asaynne kahine halaqati nena taw aathidi immidosona. Ne ay oothadii?” yaagis.

36 Yesuusi, “Ta kawotethay ha alamiyana gidenna. I haysan gidiyako ta Ayhudeta halaqatas aadhada imetonna mela ta aylleti taw oletana. Shin ta kawotethay ha alamiyana gidenna” yaagis.

37 Hessa gisho, Philaxoosi Yesuusako, “Yaatin, neeni kawoyee?” yaagidi oychis.

Yesuusi zaaridi, “Tuma ta kawo gideysa ne gadasa. Taani yeletidaynne ha alamiya yiday tumatethaas markatanaasa. Tumaa bagga gidida oonika taani geysa si7ees” yaagis.

38 Philaxoosi, “Tumi aybee?” yaagis.

Philaxoosi hessa gidaape guye Ayhudetako kare keyidi, “Taani iyape ay iitaka demmabike. 39 Shin Paasika Ba7aale gallas, issi ase hintew qashope billiya meezey de7ees. Taani hintew Ayhudeta kawa billana mela koyeetii?” yaagis.

40 Enti zaaridi, banta qaala dhoqu oothidi, “Barbaana billafe attishin, iya gidenna” yaagidosona. Shin Barbaani panga.