15
Elfaaza Haasaya
1 Temaana biittafe yida Elfaazi haysada yaagis;
2 “Cinca asi carkoda oyketonnaba odeetii?
Woyko doloha bagga carkuwan ba uluwa coo kunthii?
3 Pathonna qaalan zuuzumii?
Woyko gatey bayna odan mootetii?
4 Neeni Xoossas yayyeysa aggadasa;
harati Xoossaa goyinnona mela dhubbadasa.
5 Ne iitatethay ne odan eretees;
shin ne cinca oday nena genthees.
6 Ne doonay ne bolla pirdees tana gidike;
ne inxarsay ne bolla markatees.
7 “Asape koyro yeletiday nenee?
Neeni dereti medhetanaape kase yeletadii?
8 Neeni Xoossaa xuura duulatan de7ay?
asa cincatethi ne xalaalas de7iyee?
9 Nuuni eronnabay neeni eriyabay aybee?
Nuus geemmidi new qoncida ayba cincatethi de7ii?
10 Ne aawape bayratiya asati,
cimidi puulumida asati nuura de7oosona.
11 “Xoossay new immida minthethoy gidenneyee?
nuuni kahaamatethaba odida qaalay guutheyee?
12 Ne wozanay nena ayis wora efii?
Ne ayfey ayis dereeqidi xeellii?
13 Yaatada neeni Xoossaa bolla hanqetadasa;
iita qaala ne doonape kessadasa.
14 Asi Xoossa sinthan geeshshi gidanaw danda7ii?
Woyko maccafe yeletida asi xillo gidanaw danda7ii?
15 Xoossay ba kiitanchotan ammanetena;
hari attoshin saloti iya sinthan geeshshi gidokona.
16 Iitanne tuna gidida asi,
nagara haathada uyaa asi waanidi ammanetanee?
17 “Ane si7a, qoncisada ta new odana,
taani be7idaba ubbaa new odana.
18 Cincati banta aawatape ekidaysa,
ta new genthonna odana.
19 Biittay enta xalaalas imetis;
hara biitta asi entara walaketibeenna.
20 Ase un7ethishe de7iya iita asi,
ba de7o laytha ubban waayetishe de7ees.
21 Daganthiyabay iya haythan si7etees;
I saro de7ayis gishin dhayseysati iya bolla keyana.
22 Dhumape kessi ekoy iyaw hanenna;
iya qaaday mashshan dhayo.
23 Iya ahay anko quma gidana;
baw dhuma gallas matatidaysa I erees.
24 Metoynne un7i iya bolla yaana;
olanaw keyida kawo mela iya bolla goobana.
25 Hessika I ba kushiya Xoossaa bolla denthida gishosa;
Ubbaa Danda7iya Xoossaa bolla xaalida gishosa.
26 I eqetanaw minonne dalga gondalle oykis;
otoron Xoossaako hordofees.
27 “Iya kilahoy muumida gisho,
iya xeessay kumida gisho,
28 I laaletida katamatan,
kaysa keethaninne,
kundanaw gakida keethan de7ees.
29 I ba duretethan daro gam7enna;
iya zaway aakenna.
30 Dhumape kessi ekenaw danda7enna;
tashiya tami labida mithadanne
carkoy ciishsha qoqofida mithada gidana.
31 Pathonnaban ammanetidi bana cimmofo;
iyape aykoka demmonna attana.
32 Wodey gakonna iya ubbay melidi
tasheyka aaconna mitha mela gidana.
33 I teeronna qawu7e de7ishe qoqofetiya woyne mela;
ciishshan de7ishe qoqofetiya shamaho mela.
34 Xoossas yayyonna asaa kochay dhayana;
wodhaafen keexetida keethay taman meetetana.
35 Enti iitatethi qanthatidi meto yeloosona;
enta uluwan geney kumis” yaagis.