21
Iyyoba Haasaya
1 Yaatin Iyyobi haysada yaagidi zaaris;
2 Ane ta oda akeekidi si7ite;
hessi hinte tana minthethida mela gido.
3 Taani issi toho odetana mela taw wode immite;
taani haasaya simmiko tana qelqisite.
4 Taani mootetey asara gidenna.
Yaatin, danda7ay wuriko hessi malaalsiyee?
5 Ane tana xeellidi malaaletite;
hinte kushiya hinte doona bolla wothite.
6 Ta hessa qopiya wode tana daganthees;
ta asatethay kokorees.
7 Iita asati ayis paxa de7oona?
Enta laythay ayis aduqii?
Enta wolqay ayis dari dari bidee?
8 Enta naytinne nayta nayti,
diccishininne injen de7ishin enti ayis be7oona?
9 Enta soy hirgi bayna saro de7ees;
Xoossaa xam7ay enta gakenna.
10 Enta miizati biraysi ekidi koxokona;
yelishe awucayokona.
11 Banta nayta dorsaa wudeda kessoosona;
enta nayti duroosona.
12 Karaabo baqishe diithi diixishe,
suusul7e punnishe ufaysan yexoosona.
13 Enti banta de7o laytha injen de7idi,
duufo sarora boosona.
14 Gidoshin, enti Xoossaako “Nuupe haaka!
Nuuni ne ogiya eranaw koyoko” yaagosona.
15 “Nu iya goyinnanaw Ubbaa Danda7iya Xoossay oonee?
Nu iya woossidi ay go7etanee?” yaagosona.
16 Enti duretetha banta minotethan demmida goosona;
shin taani enta qofaa ekike.
17 “Hanoshin, iita asaa xompey to7ii?
Entana boshi gaki erii?
Xoossay ba hanquwan enta seeri erii?
18 Carkoy enta kaleda efida wodey,
Gotey enta baanada denthida wodey de7ii?
19 Hinte, ‘Xoossi aawata bala gisho enta nayta seerees’ yaageeta.
Ane Xoossay nagaranchota enta huuphen seero;
yaatiko enti banta naaquwa erana.
20 Nagaranchoti banta seera bantaw eko;
Ubbaa Danda7iya Xoossaa hanqoy enta bolla wodho.
21 Asi hayqidaape guye,
ba naytabaa ay erii?
22 “Dhoqa bessan de7eyisata pirdiya Xoossaa,
eratethi tamaarsanaw danda7iya asi de7ii?
23 Issi issi asi kumetha wolqaynne saroy de7ishin,
inje duussu de7ishe hayqoosona.
24 Enta asatethay orde shin,
enta meqethaa kolizey shica de7ishin hayqoosona.
25 Shin harati lo77oba be7onna,
meton un7etidi kayotida mela hayqoosona.
26 Nam7ayka hayqidi biittan moogetosona;
enti guxuntoosona.
27 “Hinte tana qohanaw qopidi,
hinte wozanan qopida qofaa ta loythada erayis.
28 Hinte, ‘He gita uraa keethay awunee?
Iita oothiya uray de7iya soy awunee?’ yaageeta.
29 Oge asata oychibeeketii?
Enta markatethaa ammanibeketii?
30 Enti, ‘Iita asay dhayo gallas qohetokona;
Xoossaa hanqoy qonciya gallas enti attana’ yaagosona.
31 Iita asi iya iitatethaa gisho kaccanay oonee?
Iya oosuwa gisho iya seeranay oonee?
32 I hayqin, iya aha duufo efoosona;
iya duufoy bonchon naagetees.
33 Zangaara biittay iyaw injetees;
daro asay iya sinthan boosona;
tayboy bayna asay iya kaalloosona.
34 Yaatin, hinte tana pathonna qaalan waati minthethanee?
Hinte ta oyshaas zaariya zaaro ubbay wordo” yaagis.